Democracy Pawlpisung kalsuandan pawlkhat

Democracy Pawlpisung kalsuandan pawlkhat

Thupatna: Eimite in Democracy ki ukna deih mahmah napi hangin, bang dan hiam, cihzong atel nailo, athei nailo leh thei napi-a, azui nuamlo omlai I hih manin, khat leh nih beek in aphat tuampih khak leh ci-in, man lah pipi a, kong gelh ahi hi. Saklam aom I sangamten Pawlpi acih uhteh leitunglam kipawlnate a genna uh hizaw pian-a, biak-nalam Pawlpi pen Saptuam naci uh hi. Ei khanglam aom ten Pawlpi I cihteh biakna pawlpi bek a genuam I hizawpian hi. Tua hi-a, hihmun ah Pawpi I cih takciang in biakna Pawlpi bek hilo in, leitunglam kipawlnate tawh anih in, a genuam I hi hi.

Kivai puakdan:

Pastor/President te dinmun :: TuTuhun pen IT hun ahih mah bangin nidang bang loin mit phiatkal sungin Pastor/President angahziau, a suakziau pawlkhat Zomite sung nangawn-ah hong omta hi. Tuamanin Pawlpi ki khenna, buaina zong hongtam ahitam cihnop huai hi. Pastor te pen Pulpit lam amasa in thupisak pen le-uh buaina atawm mah bangin, President ten zong amau Pawlpisung khantoh nading thupisak pen le-uh buaina taawm hi.

2. Khasum kipia in kipia takei leh a makaihpihte leh mipite phalna omlopi, theisaklo pi-in, pawldang leh mun tuamtuam ah zin, van leh nate zek/zang cihbang Democracy tawh kalsuan ten kizanglo hi. Tua cibang azang aom leh khalna kipia or ki tawpsak thei hi.

3. Pawldangte tawh na khat peuhpeuh sepkhopding ciangin makaite or mipite adot uh kul hi.

4. Pawlpi Letter Head leh Pawlpi min tawh, makaiteng thu kimna omlo pi-in, pawlpi pualam ah zang/sam cihbang Democracy pawlpi ten zanglo uh hi.

5. Khasum kipia lah hilo mipi thukimna tawh kila, kizang hilo in, ama phuat tawm pawlpi ahih leh ama ut dandan in hihthei, vaihawm thei-a, mipi in azuih nopkei leh phunlo in a paikhiatding ahi hi. Ahi zongin hidan pen Democracy pawlpi paidan kicilo in, Autocratic or dictatorship kipawlna or ki ukna kici zaw hi.

6. Vaithupite ah, Pawlpi pen ama phuattawm ahita zongin mipi sum leh tha tawh Pawlpi dingin dingkeita leh aphuanpa/nu bek in thu neitheilo a, mipite mah tawh thukhat peuhpeuh ah aki kupkul hi. Mipi ten zong tuadan vai aom khak leh Pastorpa/nu or President pa tawh aki kupkul hi.

7. Pawlpi picingte ah Pastor te pen meeting khempeuh ah kisam/kihel loin vaithupi te, thukhen hamsate ah kisam/kihel hi. Pastor kiciante zong tuabang hunte thusim in kihel hamtangpah uh hi. Leitunglam kipawlnate leuleu ah, Presidentpa theisak lopi in, Meeting kinei ngeilo leuleu hi. Biakna paawlpi a Pastor te leh leitunglam kipawlnate a, President te, a kilamdan na khat ahi hi.

8. Leitunglam Pawlpite in apualam kipawlnate leh vaithupite ah EC thukimna loin khensat theilo hi. Presidentpa in hoih asak mahmah hang, a tamzaw in athukim kei leh azuih kul hi.

9. Pastor/President te Khasum asan uh leh a Khasum uh zahtak uh hi. Makai apilte in Sum asan loh uh hangin mipite khualna tawh Pawlpizahtak bawl-in amau ut bangbang in na khensat, vaihawm ngeilo uh hi.

10. Pastor/President beh lungsim, khua lungsim, bawng lungsim leh etc, aneih uh leh mipi in ki khawlsak thei hi.

Biakna sunga UPate dinmun:

1. UPa sungah zong a lubok deuh ki guang tek-a, President or Chairman pen Siapa/nu in hih theihloh nakhat aneih a, Pastor dang aomkei leh tawan alak kul hi. Meeting sim-in, hun makaih thei-a, adang amatang, aseh nop leh zong kingah hi.

2. Meeting thu khen haksa omkha-a, mee(vote) kikim bang ahih tuak leh upa makaipa thu mankul hi. A lawmte a tamzaw thukim na aomkei leh ama thubek tawh bangmah vaihawm or khensat theilo hi.

Sum leh Paizekdan:

1. Sum pen koimun koimual pan ngah-in, hong lutta leh Sumkemte khutsung ah tung masa hi.

2. Zatding in Emergency lua mahmah ahih leh zatma in EC or OB theihsak tektek kul hi.

3. Sum zatding ciangin sum lai-atte theihloh in Sum kemten direct in piatheilo hi.

4. Khakhat sunga zatdingteng sum kemten sum lai-atte tungah koihkhol uh ahih manin amah oltuam hi.

5. Sum sazian sit ciangin sum kempa in sum lai-atte tungah apiakteng lak ahih manin sumkemte adingin buaina tawm hi.

6. Sum lai-atte in a kizekna khempeuh lai tawh limtak ciamteh in ahun leh a kulna mun-ah pulak hi.

Meeting: Meeting neihciang in atamzaw thu kimna ahih leh khat leh nih phunphun hangin naupang tengta kineih bangin kikhel kik themthumlo hi. Democracy pawlpi ahih leh atamzaw in hoihsa napi in, en hoihsa loin I zuih nopkei-a, I phunphun leh eima aituam banga, Pawlpi pen ngaihsunkha ki hithei ahih manin, mipi thu neihna pawlpi kici theilo-a, ei utthu tawh Pawlpi vinuam tawh kibang hi. Mipi atamzaw in, khel kikding utna pi-in, makai pipa or Pastor pa a utkei leh diklo leuleu a, mipi thuneihna Pawlpi kalsuan kici theilo hi.

Thukhupna: Na I telloh ciangin I khantoh dingzah in ki khangto theilo hi. Pawlpi sunga van leh nate leh biak-inn or Zum sappen mipi ki pawlna sum tawh a kisap, a kilei ahih leh mimal deihna tawh kizek cih bang omlo in, mipi sum/tha tawh kilei ahih mah bangin a tamzaw thukim na bektawh kizek hi. Na Democracy cihcih nuamin na um hiam?Hun neih the aban, puahlai zoplai ding! Khaibawi