Malaysia dailenbuk khatpan gultawh akibang ganhing golpikhat pusuakkhia

Malaysia dailenbuk khatpan gultawh akibang ganhing golpikhat pusuakkhia

Malaysia, Alor Setar aom innkhat ii dailenbuk “Toilet” panin gultawh akibang ganhing lamdangkhat pusuakkhia ahih manin, innteekte lau in, dipkua mahmah uh cihi.

Tua ganhing pen Toilet sungpan in apusuahkhiat laitak Video Clip tomcikzong zaihman uhhi. Video sungah tua ganhing pen gultawh kibang in, ahi zongin gultaktak zong hihtuaklo a, nga gul “eel” ahih keileh vok golpi peuhtawh kibang hi.

Nungkal Friday ni in Alor Setar innsung khatah thupiang hi a, damdam in Toilet sungpan in apusuah khitciangin innsung ah kinil kawikawi cihi.

Innteek te genkhiatna ah hihpen ka omna kuamsung tengah kamuh ngeizel gul tetawh akibatpih omlo in, ganhing lamdang khat hi ci’n genkhia hi.

Tuaban ah Toilet pen avekin bitmahmah, kuaheng avang omlo ahih manin, hihpen Toilet Pipe sungpanin hong pusuak hiding in ka ummawh ci uhhi. Dailenbuk Pipe sungah sauveipi aomcipden hiding a, atatnawnloh ciangin apualam ah hong pusuak hikhading ci uhhi.

Tua ganhing pen asauna Meter 2 (Pi 6.5) bang sauding ci uh a, thaumahmah cisawnsawn hi. Apumpi agol mahmah hangin alu neumahmah a, ameizong tommahmah cihi.

Hih innsung ah naupang zong aom hi a, ahi zongin naupangkhawng anethei namding tawh kibanglo, atukleh cihciangbek hikhading cihi.

Video: Mysterious ‘swamp creature’ crawls out of toilet in Alor Star house

https://www.youtube.com/watch?v=XD1pHewGQHU

Hih innteekte omna pen buhlei vive in a umcihkhat hi a, hih ganhing pen buanlak, buhleilak panin akhangkhia a, Toilet Pipe sung atungkha hitheiding kici hi.

Related: Bangkok ah numei khatin dailenbuk azat laitak gul in anuaipan tuto

Innteek te’n hih ganhing pen hingmat uh a, thatlumlo in, ageinai aom luisung ah khahkik uh cih kiza hi. Toilet sungkhawng ah tut hithiat laitak hihbang ganhing hong pusuak khiamawkleh bangcih mawkding? Toilet leh innsung kuangsawpna, tuizatna “Basin” tepen khatveivei tuisa velvel honkhattawh buahsuk zelzelding hoihmahmah hi. Adiakdiak in kuangsawpna “Basin” te ah tuisa buaksuk zelzelleng, asungah agepcip sathaunel teng taisuk in, tui luangtheilo in, awkcip cihte phatuam hi. Sawltak #zomidaily