Dahpihna thupuak ~ Tg. Kap Sian Khai

Dahpihna thupuak ~ Tg. Kap Sian Khai

Date: September 28,2015
Kawlgam sung Tonzang khuapi uk, Tuitum khua mi, tulai tak a Kyaukmyaung,Tamwe, Yangon a teng, Pa Pau Khan Thang (Samte) leh Nu Don Lian Cing te sung pan a piang Tg. Kap Sian Khai in Columbus, Ohio, USA pan in nimit 09-27-2015 zan nai 11:15PM in tuipekna tuikhuk sungah kia in a bawlpa a nungta Pasian kiangah hong ciahsanta hi.

Tg. Kap Sian Khai pen 1988 kum January 28 ni a suak khangno khat hi a, pilna deih a hih bangin kum 2008 kum in Bachelor of Arts ( B.A) lukhunelkai ngah hi.

Tg Kap Sian Khai pen leitung nuntakna nop zawkna ding lunggulhna tawh Malaysia gam tawn in April kha ni 28, 2015 in USA gam a tung hi a, a nu leh pa, sanggam laigui zomte in a muan leh suan mahmah uh khangno khat a hihi.

Tg. Kap Sian Khai in lam-et hetloh in hong nutsiatna hangin a ma’ innkuan pihte leh laigui zom sanggam u leh nau, innsung dongta khempeuh tawh a kibangin Zomi Innkuan USA in dahpihna kong pulak uhhi. I it mahmah Tg. Kap Sian Khai hong nutsiatna hanga, dahna khitui a nul mikhempeuhte tungah a nungta Pasian Kha siangtho in hehnepna thupha hong pia hen, cin thu kong ngetsak uhhi.

Tg. Kap Sian Khai i luang pen leitung ah a kiphum kikna ding a kisam vaisai ding thu khempeuh pen a sih hun lai tak a, a tenna USA gam sung Ohio gamke sung Columbus khuapi a om Zomi Innkuan kipawlna leh pawlpi pan in vanpih ding cih thei i hih manin dahna sungah i lungnop tuam hi.

A ma i sihna tungtang tha leh zung, a thu le la tawh a buai pih khempeuhte tungah Pasian in AMA thupha hong pia ding i lam-en hi. Leitung pen kikhenna gam a hih manin a dah a kap mi khempeuh in Pasian gelna a tangtung hi cin, i ki hehnep siam ni. Haksat hun ciang a hong huh pahpah Pa, Khasiangtho hehnepna leh daihna thupha note tungah hong tung ta hen!

Executive Committee
Zomi Innkuan USA
U.S.A