Dahpihna ~ Revd Thang Khan Do, Revd Cin Thian Nang leh Revd James Khai Tual

1. Revd Thang Khan Do (kum 50) valdeuh khawng hi’n teh. A pianna
Lezang khua hi a, a Pasian’ nasepna pen Tuithang Carmel A.G ah Senior
Pastor a seplaitak ahi hi. Amah pen 16/4/2015 ni-in Singpua-in a tapa
tawh gamsung a vakna panin keen ah kia-in hong nusia cih thu kiza hi.
Gupna thugenna te ah Pasian in hong zatsak mahmah Pasian’ nasem
kiciantak khat ahih manin it-in dahpihna thu i kitheisak hi.

Sia Do pen 2008 kum pawl, Youth Pastor kasep hun sungin Khangno Camp,
Theizang Mualpi ah ka bawl lai-un nitak sim thugenpi a ka zat khat uh
leh sunin Gupna thugenna ah Revd Vung Kap (Tuilang) tawh ka limzat
mahmah khat uh ahi hi. Itin pammaih kasa mahmah hi. Hih thu ka
khualzin sung tawh kituak ahih manin ka khuanung theih pan hi.

2. Zani 20/4/2015 sunhun pawlin SRBA sungah Pasian’ nasem Pastor nih
in Valung khuapam ah Motor Accindent in hong nusia, cih thu kiza hi.
Hong nusiate geel pen Taingen Tuiphum Pastor, Revd Cin Thian Nang leh
Revd James Khai Tual (Youth Secretary, CBC) in a phual panin hong
nusia pah cih thu kiza hi.

Tuni Kalaymyho pan ka galzakna uh ah, a phual pan mi thum in hong
nusia a, mi khat pen zato ah lamet bei simsim in om, cih thuthang om,
a tel theih te’n hong gen le uh teh. Hih vaite tawh kisai thu a hoih
pen a hong om nading leh a dam lai, dah-le-kap a omte’ ading thungetna
tawh phawkpih ciat ni.

Mun nih pan a hong nusia, Pasian’ nasem laizomte dahpihna tawh,

Peter Khampu