Dahna Pulakna: Mangpha Pa Lian Za Pau (Jacksonville)

Dahna Pulakna: Mangpha Pa Lian Za Pau (Jacksonville)

Zomi Innkuan USA
Executive Committee

Dahna Pulakna: Mangpha Pa Lian Za Pau

Florida State, Jacksonville khuapi a teng, Jacksonville Zomi Innkuan kipawlna Pawlmi, Zogam a Thangzang khuami, Pa Thang Khan Dal kici Pa Lian Za Pau in damlohna hang tawh Oct. 15, 2014 ni in Jacksonville Zatopi panin a leitung nuntakna hong nusiata hi. Pa Lian Za Pau pen Tedim khuapi pan a khangkhia, Gualnam suan hi a, US gam ah peemta in a hong tun’zawh kum nih valdeuhbek hipan hi. A hong nusiat laitak in kum (53) a cing panin kiciamteh a, US gam ah cidamna ngah in, nuntakna anuam zaw a lam dingin hong kuan himah leh, khang cing nailopi in hong nusia ahih manin na kisa mahmah hi.

Pa Thang Khan Dal hong nusiat manin adah akap, Kawl gam a om a zi Nu Khoi Sian Dim leh tapa Tg. That Suan Kim, a nu leh a pa Pu Cin Za That leh Pu On Khaw Niang-te a kipan, US gam sung Miami khuapi a om a sanggam pa, Pa Pau Za Kap (Nu Cing Muan Thang), Durham khuapi a om Nu Khup Sian Ning (Pa Khen Khan Mang) leh a sanggamte teng, meeltheih tanaute, a pawlpi leh a kipawlpih khua leh tui tawh a kibang in Zomi Innkuan USA kipawlna Executive Committee pawlzong kidah mahmah hi.

Pa Thang Khan Dal in July 31, 2014 ni in, US gam sung a om Zomi-te kihuaina ahi ZIUSA Genvai kipawlna hong lut ahih manin, ZIUSA Genvai Thukhun tawh kituak in Zomi Innkuan USA kipawlna in a luang kipham/kivui ding hi. Ama luanghawm pen Oct. 18, 2014 ni ciangin biakna ngeina tawh, Zomi Agape Pawlpi in hong vuisak ding hi.

Pa Thang Khan Dal hong nusiatna hangin adah akap lungleng khuangai a om laizom u leh nau, nu leh pa, lawm leh gual khempeuh tung ah anungta Pasian in hong hehnem henla, adamlai teng cidam takin nisim mabante kalsuan in, thupha tawh thathak ahong guatna dingin thu ka ngen uhhi.

Dahna tawh;

Executive Committee
Zomi Innkuan USA, Inc.

Tulsa, OK
October 17, 2014