Dahna Pulakna: Mangpha Pa Cin Sian Tuang, kum 35 (Hatzaw, Phaiza)

Dahna Pulakna: Mangpha Pa Cin Sian Tuang, kum 35 (Hatzaw, Phaiza)

USA gam, Maryland State, Baltimore khuapi a teng Pa Cin Sian Tuang Kum 35 (Hatzaw beh) in abeisa January 04, 2017 ni -in atenna innphualzang panin Ihmu paisuak natna tawh mual ong liamsanta cihthu izakmanin Zomi Innkuan USA kipawlna in nakpitakin kidahpih, ki lainatpih hi.

Pa Cin Sian Tuang pen Zogam, Phaiza khuami Sakollam, Tedim khuapi ateng Pa Nang Za Khup leh Nu Cing Deih Lun ten tapasal 4 leh tanumei 1 a neihna sung uhah amahpen anautumpen zom leh Pasal lakah a a neupen ahihi. a zi Nu Cing Deih Lian a tanu Lia Khup San Lun te tawh nuntakhuasakna anuamzawding lunggulhna tawh abeisa 2014 kumin USA ongtung uh ahihi.

Pa Cin Sian Tuang pen DC Area bupphuh Zomite kipawlkhopna Zomi Innkuan Washington DC Area ah pawlmi kiciankhat leh USA gambup Zomite sihnavaiah luangkiphamnadinga kiphuankhia ZIUSA Genvai kipawlnaah Active member khat ahihna uhtawh kizui-in ZIUSA Genvai thukhun ombangin Pa Cin Sian Tuang pen Zomi Innkuan USA kipawlna in USD 10,000.00 (Tulsawm) luangphamnadingin kipiakhiadinga Paakkual khattawhzong Mangphakhakna kinei dinghi. Hih akipiakkhiat luangphamna sumtepen USA gamsung muntuamtuampana ZIUSA Genvai thukhunpom pawlmi 8,000 valtekiangpana ongkhakkhop uh sumte ahihmanin Vaphual lungtang neia ZIUSA Genvai ah ma ongpangkhawm Zomipih khempeuhtungah idahna ilunglenna kawmkalpanin lungdamna lianpi iko hi.

I it mahmah Pa Tuangno tawh a nunungpen hunzatkhopding pen ongtungding January 07, 2017 (Saturday) ni 11:30AM to 12:30PM kikalsungteng March Life Tribute Center, 5616 Old Court Road, Winsor Mill, MD 21244 ah luanghawm etnahun hiding 12:30PM pan 1:30PM kikalhunin tuamunmahah EBC Pawlpite makaihna tawh a nunungpen hehnep hunbawlna kineiding hi. tuakhitciangin King Memorial Park, 8710 Dogwood Road, Baltimore, MD 21244 ah Vuina, daitansakna kineiding hi.

I it mahmah Tuangno ongnusiatna hanga adah akap, alunglengkhuangai Pianna nu leh pa, pianpih sanggam laizomteng leh khuapihtuipih tanaumeltheih akuamapeuh leh anusiat a itmahmah azi Nu Cing Deih Lian leh a tano Lia Khup San Lun te tungah Meigong tagahte a nusia ngeilo, a maute pasal/Pa dinmun ah a pangden ibiak Vanglian Pasian khasiangtho in aluang khituite ong nulsakhenla lungnoptawldamna ongguatsak kimciat tahen cih Zomi Innkuan USA kipawlna in thu kongngetpih uhhi.

Dahpihna lianpitawh,
Executive Committee
Zomi Innkuan USA, Inc.
January 06, 2017