Pu Thang hong nusiatna hangin Dahna pulaakna – Mangpha Pu Thang

Pu Thang hong nusiatna hangin Dahna pulaakna – Mangpha Pu Thang

Kawlgam Federal Pupi, Zomi te Aksi pi leh Zomite Pupi Pu Cin Sian Thang (Pu Thang) in Kalaymyo Innpi pan tuni hong nusia ahih manin Zomi bup leh Democracy Alliance ten kidahpih mahmah hi.

Pu Thang in anuntakna atamzaw gam leh minam aading, Federal democracy ding hong piakhia ahi hi. Committee Representing the People’s Parliament (CRPP) kiphuhna ah makai pi khat in pang in Kum tampi sung democracy ngah nading hong semkhia bek thamlo in Galkap kumpi te ii hencipna kum tampi sung hong thuak ahi hi.

Pu Thang pen hong nusia sa ka Sanggampa Tg. Vung Za Pau tawh ZNC vai, minam vai, gam vai ah kum tampi sung anuntakna uh piakhia in asem khawm uh hi aa, ahatsakna, agentheihna, apiakkhiatna te uh ka mit in tampi amu ka hi hi. Military Intelligence (MI) ten Pu Cin Sian Thang hong mat zawh uh ciang ka sanggampa U Pau zong mat ding hong zong uh aa, tua hun sung teng ko innkuan aading ahatsat mahmah hun sung ahi hi.

2012 kum in Zomi Innkuan D.C te ii Khuadopawi ah Zinmangpi in kipai aa, tua lai ah Pu Thang tawh ka kithuah kha uh in anunung pen ka kimuhna uh zong ahi hi. Pu Thang bangin i minam sungah akipiakhia, ahang san, acitak, gam leh minam aading anuntakna apiakhia kitawm mahmah ding ahi hi.

More: 21st Pinlong Conference a Pu Chin Sian Thang thugente thupi mahmah hi ~ Khaibawi

Pu Thang hong nutsiatna hangin i minambup bek thamlo in Kawlgam democracy Alliance khempeuh ii supna lianpi khat hi aa, kidah mahmah hi. Topan aom lai a innkuanpih te hehnepna hong pia ta hen. Dahpihna lianpi tawh, Thomas On Siang Mung (Thomas Mung Guite) Washington D.C July 31, 2021.