CRPH thusuah tawh kisai etkikna (1)

CRPH thusuah tawh kisai etkikna (1)

Federal Democracy Thusuah (Federal Democracy Charter) ci-in CRPH in thusuah a bawlna khenpi khatna leh khenpi nihna cih bangin kikhen hi. Amau tawh kipawl ding teng zawn kawikawi-in a kikul dan zui-in suaikaitek ding, ci uh hi. Tua thu tawh kisai-in ukcip galkapte nawhkhiat nadingin a kicing ding hiam, cih thukhun leh gamvai tawlet panin etkikna anuai abangin Legal Aid Network pan kong bawlkhia uh hi.

1. Thusuah thulupi pen Kawllai tawh Pareihngeing ( ) cih kammal kizang hi. Tua hi-in Myanmar gam in a zat tulaitak a pareihngeing thukhun tawh a kituak ahih ding kisam ding hi. Pareihngeing thukhun cih ciangin pawlzawnte leh a kizawn mipawlte a om uh kul hi. A tawm pen pawl nih a om ciang bekin tuate kihona panin thukimna, cih hong om thei pan ding ahi hi.

Ahi zongin CRPH in a thusuah a bawlna limtak en le hang amau hoih sak teng bek a suaksak uh ahih manin lang nih ahih kei leh pawl nih thukimna, cih theih ding hi lo hi. Thulut lo pareihngeing suak pah malam cih ding hi. Hih thusuah in a gen thukimna a palsatte tungah thu bawl ding hi leng, Myanmar gambup thukhen zum koi mah ah thu kibawl thei ngei lo ding ahi hi.

2. A thulu en le hang kammal dang khat a kizang pen bang hiam cih leh ‘tangkona’ cih ahi hi. Mangpau in Charter/Declaration cih kammal kizang hi. Taitakin kikupna a om khit ciangin a kitangko nam hi loin a pawlzawnte in zothawh kawm sa-in a bawlkhiat uh tangkona nam tawh kibang hi. A zui nuam a om leh zuih ding hi a, a zuilote ahih leh phamawh lo hi, cih tawh kibang hi. UN Charter te ciangin a kisai khate in a zuih kei uh leh bangci danin thu kibawl thei ding, cih a thu kiguang pah sitset ahih manin thukhun zui-in thupalsatte tungah thubawl theihna ding thu om ahi hi.

Atlantic Charter leuleu ah UN Charter danin a thu kibawl theih zia ding thu kiguang kha lo ahih manin a palsatte tungah thu bawl theihna ding a thu om lo leuleu hi. Tutung a Federal Democracy Charter kici pen zong tua bangmah hi a, zuih loh phamawh ahihna thu kiguang kha lo hi. Thukhun zui-in gamsung hi ta leh leitungbup thukhen zumte ah thulut thei nam hi lo ahi hi.

3. CRPH thusuah pen federal kilamzia thuguipi tungah kinga lo ahih manin kip lo ding hi. Tuni ciang dong a kip penpen Panglong thukimna tungah zong kinga kha het lo mawk hi. 1990 pan kipan 2008, kum 18 sung tawntung a kigelh Federal Union of Myanmar kilamzia ding thukhunpi nihvei kipeuah pen zong tawmvei beek zat theih dingin kipsakna nei lo lai hi. Kallak ah tawmvei sung a kizang pak ding thukhun hi, cih zong sianggenna bangmah nei lo hi. En pak leng ahi ding mahmah bang sak napi, a taktak adingin takna nei lo a hawmpi ahi hi. Tua ahih manin thukhun zui-in gambup a kalsuanpih thei ding thu ahih loh banah gamvai ah zong mitphial kilak pak tawh kibang hi phot hi.

4. Thusuahte en suksuk le hang kiteelna tawh kisai thubulpi thulut dejure ci-in tua tungah thusuahte tampi kinga hi. NLD in 2008 thukhunpi nuai panin kiteelna nawk kha loin matkhai (25%) galkapte kihelna innnpi vaihawmna nei-in galkapte deihlak Ministerte omna kumpi sungah galkapte a tamzaw a kihelna defense leh security vaipuaklaknate ah kalsuan hi. Tua pen galkapte in deih bangin peipei thei ding cih mu gige napi NLD in thulut mah hi, ci-in kipsak cihna ahi hi. Tutung tangkona leuleu ah mualmite lungdeih thute kipsakna bangmah nei hiau lo leuleu mawk hi.

2008 thukhunpi nuai ah mithat galkapte 25% a om ding phalin kumpi vaipuaklaknate ah za ah sawm 10% kihelsak hithiat lel uh hi. Tua pen thukhun zui-in thulut hi, ci-in kipsak cihna hi. Tua tawh a kilehbulhin tu-in mualmite lam pan za ah sawm thum leh nga 35% pen gambup kilamzia thukhunpi sungah hel hamtang dingin kigenpih napi kizakmawh bawl uh uh hi. Thudon lo uh hi. NLD/CRPH in hih bang ciang tawh federal gampi hong phuhkhiat ding pen mualmong et mah tawh kibang ahi hi.

5. CPRH thusuah a masa lam leh a nunung lam zong kituak lo hi. Khen khat, nambat 4, nambat neu 2, laigual khatna ah, Union gampi sung a om State te leh tua State sung a om mipite in tualsuak thuneihna bulpi a neite ahi uh hi, ci-in kigelh hi. Ahi zongin khen 2, nambatpi 2 na ah State te in thukhun a bawl nadingun bang teng Union ah ap ding, bang teng union tawh kikum a bawl ding, bang teng State in ama thuneihna tawh bawl thei ding, cih limtak kigen lo hi.

CRPH thusuah pen a takin a kalsuan thei dingin ngaihsun leng thuneihna kituhin ni kitum thapai ding ahi hi. Hih bang tawh a cidam leh a kho gambuppi khat phuhkhiat nadingin a khuambulpi muanhuai het lo, cih hong phawksak hi. NLD/CRPH bek in ama ut bangin State leh gambup ah thukhun bawl thei ding cihna ahi hi. (Zop lai ding…).

(Kawllai tawh CRPH thusuah etkikna a sim nuamte adingin a patpan a tawp dong anuai a link ah kicing takin om hi. Zolai version tawh sim theih dingin Tedim Post tanute in khen 3 suahin hg kisuaksak ding hi). Photo: Zomite kihelin Union of Burma kici gampi hong piancil lai a kizang Dialkhai masa pen hi. The Tedim Post