Col. Khen Za Moong leh Ih Zomi mipil, misiam, milian luite pahtawina ih pia uh hi

Col. Khen Za Moong leh Ih Zomi mipil, misiam, milian luite pahtawina ih pia uh hi

Dear, laisim mipih teng, “Khenzamung zong apil lua aciimlua vangvang hilo in Newin kumpi sawl bangbang mang ahihmanin zalian kipia hi.” (Tong Luang)

Hih Full Colonel angah masa pawl ahi Pa Mung Khen Za Mung leh ih Zogam galkap mang milian masa pawlkhat zaliat sung ko naupang lai khawng akipan hi’n, khat leh khat ih kinial kikup na’uh thute aciang khat bang ko thutheih hun ahih manin, aman pawl aom tei hang’ ama theih cianlo thu leh midangte gen azak ngei akicianlo thu tampitak kigen in, nidang ama uh hun lai ih mipih teng aa ding vang kineih lawh kisa mahmah ngei hi.

Tu aa Chin ih cih uh Hakha, Falam, Matu, Mada, Zotung, Zophei, Kanpalet, Paletwa, Matupi, Mindat, etc, teng bangin hong sang et mahmah in Chin Special Division hun leh Chin State ih ngah zawh uh Tedim (Zomi) te khut sungah kum tampi aom auk ngiat hun sau mahmah ngei in, ih milian teng ahi Col. Dal Za Kam, Col. Khen Za Moong, Col. H. Kam Pum, Col. Ngo Cin Pau, Major. Son Khaw Lian, Col. Son Khaw Vum, Lt. Col. E.K Kim Ngin, Lt. Col. Khai Mun Mang, Lt. Col Kam Do Khup te Zogam (Chin State) uk Kumpi mahmah abat uh hun Kawlgam galkap bup level Quartermaster General in Major-General Tuang Za Khai tua teng azaliat ban thamlo galkap sung mikangte hun pan kipan anung lam dong Zomi sung Lt. Col. Lian Cin Zam, Lt. Col. Kap Za Thang, Lt. Col. Son Khaw Pau, Lt. Col. Put Pau, Lt. Col. Suan Do, Lt. Col. Ving Ceu, Lt. Col. H. Ngo Zam, Lt. Col. Kap Cung Nung, Lt. Col. Dam Khan Cin, Lt. Col. Pau Khan Thang, Lt. Col. Thian Khaw Khai, Lt. Col. En Tual, Lt. Col. Son Za Thang, Lt. Col. Zam Khan Thang, Lt. Col. Tual Do Dal, Lt. Col. Kam Do Khup, Lt. Col. Gin Za Thang, Lt. Col. Hang Khaw Thang, Lt. Col. Lian Khan Thang, Lt. Col. Kam Cin, Lt. Col. j. Suan Lian, Lt. Col. Dr. Suang Za Pau, Lt. Col. Thang Suan Khai, Lt. Col. Kam Khan Thawng(M.B.B.S), Lt. Col. Kam Lian Mang (BSI)

Majors te tampitak omlai atua teng khempeuh mah Ne Win hun (Mah-Sah-Lah) hun Ne Win kumpi sawl bangbang amang teng cihsak leng’ hong deidan den keei ahi Kawlte khut nuai ah, ih pu ih pa te uh hi zah ciang dong ih minamte na tawisan zawh nading leh namdang te lak aa, hi zak mipil, milian, mimang gual tungtuang aa ana op zawh na un, ih minam bangzatak hong tawisang cih lampan zong ih ngaihsut ciat ding leh taangthu ,tuanthu te ih kan kik ding uh leh, pahtawina ih piak ciat ding uh zong ei khangthak te mawhpuah khat hong suak ahih lam zong phawk huai sa ingh.

Gen ding tam simsim om ahih tei hang’ atung aa, Tong Luang in Col. Khen Za Moong agenna kei theih na ciang tawh, tawm hong gen nuam ingh. ” Khenzamung zong apil lua aciimlua vangvang hilo in Newin kumpi sawl bangbang mang ahihmanin zalian kipia hi.” Tong Luang gen bangin Col. Khen Za Moong zaa (Rank) avek in Ne Win piak na hilo hi. Kua mapeuh in U Ne Win pen kikta lua uh kisa amai tang zong tangtak in en ngamlo cih gen thamlo U Ne Win in lungkimlona khat neih leh amuh khat peuh tawh mi deng thei ek ci lai hi.

Tua bang kawmkaal ah, thuman thutak anuntakpi Kawlgam bup hun khat ” Thukhen mang asem ngei” Col. Khen Za Moong in U Ne Win Zong kikta vetlo cih thu kazak ngei khat ah, hun khat lai U Ne Win leh Colonel pa kitawng in U Ne Win in azaa neih nateng lakkhiatsak ding (Court-Martial) piak asawm leh Colonel pa’n ” Hih nang hong piak Full Colonel zaa (Rank) bek khawkkhia theih ci’n langlut pan kipan Mikang (British) te hong piak Lieutenent Colonel (Rank) dong nang tawh kisai hetlo hi ” A cih ciang U Ne Win in bangmah lawh ngam nawnlo in U Ne Win thugen ih zak ciat sa uh thu khat ahi ” Na pil uh leh Khen Za Moong bangin pil unla, nahai vet uh leh Van Kulh bangin hai un” ci-in kigen ahi hi.

Tu Kawlgam khua hun kikhel keei sa aa, Democracy tawh kiukna api cing khawng ih sak zenzen leh U Ne Win patsa anung zui U Than Shwe te tawh akizom lai Uniform suahkhia bek U Thein Sein te’n aban azomto lai ahih mah bangin tuhun sungah ei Khamtung mual mite U Ne Win hun zak in galkap milian, mimang hong kipialo cih gen thamlo biakna zaletna lam ah nasiatak hong ki deidan semsem in ih Hluatdaw (Taangmi) Representatives teng inla nidang sangin zek zaw kanlai in, ih Zogam aa ding agen ngamlo, kamdim tuimuam tawh kibang in koih uh ahi hi.

Tua bang veve ki lamdanna cincia zong om tuanlo ahih manin, U Ne Win hun aa ei Zomite vaang hong pia, hong tawisang namdang te’n thupi hongsak pih ih pu ih pa te a taang thu te gensiatsak lo cih gen thamlo ih lungdam ding aa, asih ma uh thu leh la thuman thutak te ih dot mengmeng ding uh ahih zawh lam kong theihsak nuam uh hi. Topa thupha sungah, Kham Khan Suan (Artist Kyaw Kyaw Oo)