Cingno tawh lenna gam – 7 ~ Hau Za Cin

Cingno tawh lenna gam – 7 ~ Hau Za Cin

Sumo Champion tawh khut kilen kha! :: Japan cih i a min i zak ciang Zomite lungsim ah “Japan Gal” cih hong kilang masa penpen hi. Tua pen kei adingin kapa khang pan hi a, ka pu khangah “Piantit pai” cih ahi hi. Tua pen Zomi te i tenna khuata nono pan leitung minam khangto masa te tawh i kisawhkhakna kipatna ahi hi. Japan gal pen 1937 pawl pan kipan kum 5 sung khawnga thupiang hi a, tua sungin amau galkapte mahmah Zogam hong sikto hi cih i misiamte leh lai at, thuthei te in a gen den uh hi.

Aizawl ah Zolai atsiam mahmah Pa PL Mung Naulak in Japan gal lai Zomite ciammuih khawng hong gen ciang amau inn ah ka giak zan uh gilvun na liangin ka nui uh hi. Piantit paina thu bel gina leh kicing taka kigelh (Zokam tawh) a om diam ka thei kei a, ‘gelhsa pawlkhat leh behlap ding pawlkhat omlai’ ciin a kicingzaw-a gelh dingin Japan a Nu Haukhek in a kisam teng (materials) kaikhawm khin hih tuak hi.

Tulai khangthak hun ah Japan cih i zak ciangin technology a khantoh dan uh mitkha ah hong kilang pah hi.

A gam thu a kician zaw leh a thukzaw theite in a gen uh ciang leitung mun dangah a om hetlo khat pen Sumo Wrestler kici te hi. Hih Sumo kibuan mite pen a theite in hong gen dan in a liansa a piang hilo a, a kiliansak tawm, a kithausak tawm, a kitolsak tawm hih tuak hi. A kimawl ut sunguh kiliansak uh a, an tampipi ne in, a gil uh a, a awm uh, a phei uh, a ban uh liansak uh hi. Tua pen a kimawl ngap nawnloh uh, a pension uh ciang ci maini, a retire uh ciang annek khiam uh a, limtak in kikem in Zomi te ciacia mah pha kik uh hi. I theih ding khat pen Japan te pen mi thalian hilo a, Zomite ciacia mah a pha hilel hi.

Ka zinpi Pa Nang Lian Thang leh Nu Haukhek (Nu Man Ngaih Hau) te veng pen Sumida kici a, ‘Sumo kimawlte khua’, Sumo village cihna hi kici hi. Tokyo khuapi ka lut uh, amau vengsung ka tun uh ciang Ryoguko station ah ka kum uh ciang ka taklam vuah inn lianpi khat om deda a, Mizogam bang hi leh Community Hall hi ding hi. Tua pen Tokyo khuapi a Annual Sumo Competition kimawlna innpi ahi hi. Pa Thang in hong gen dan in ka tunma kal nih laiin kimawlna khat na zo lian uh a, November ciang zong om kik ding hi. Amau innlam zuana paisuk na vuah milim bawltawm (statue) pawlkhat ka mu pah a, Sumo Champion te lim ahi hi. Lamkabom khempeuh ah kimu thei phial hi.

Ka tunni a zingsang ciang Ngaih Anglai Ah te video shooting na lam en dinga ka pai lai un (Shinjuku station) Pa Thang tawh zingmawng in ka kuanto uh a, ama nasepna ah a boss pa tawh ka kimu kha phophot uh hi. Amah pen ama hun lai in Sumo Champion hi a, tu in sanginn nei in ama sangnaupangte Sumo kibuan dan a sinsak hi.

Amah (amin mangngilh zel… Kasima ahi na?) tawh ka kikhutlet ma un amai ah kun in zahtakna ka pia phot vua, tua ciangin Pa Thangin hong introduce in ka kikhutlet vua, maan nihvei ka kilakpih khit ciangin a nasepna innsungah a lut kik hi. Ka hamphat dan ka nung theih kik ciang a lamdang hi. Footballer minthang mahmah David Beckham tawh kimuh ding ahaksat dan tawh akibang, tua zah a mikim in mimal a amuh mengmeng loh uh mu kha ka hih manin ka khualzinna ah ka ciamteh, ka phawk leh ka mangngilh ngei nawnloh ding thu ahi hi. Zomi mihau khat in Zomi Siamsin magazine khat sungah a gen ka phawk kik a, “zingsang tho hakte tawh ka kikhawl nuam kei hi” cih hi. Mikangte inzong ‘early bird catches worm’ ci a, a lawl te mah a hampha masa hi takpi hi. Khatvei lol sunsun!

Leitung leh JAPAN thu a theizaw sem te hong genna ah America te in leitungah Japan mite bek thupi muh uh hi ci hi. Nasep a kuhkal dan uh, nasep hun a pelh loh dan uh, gual lelh a ut loh dan uh, minsiat a ut loh dan uh, a hoihzaw a delh tawntung dan uh… a mawk nop gamtat loh dan uh…

JAPAN te pen a mel uh en leng Zomi cia cia mah hi lel a, feet 5 leh inches 6 kiim mah a tampen hi pawl hi. Numei zong feet 5 leh inches 2 kiim a sandan uh hi lel a, valengtual ah ka tonpih Jenifer hong dawn Ayumi bang ka liangko ciang bek khawng mah hi lel hi.

Ahi zongin, ahi zongin cih khat om hi. Ki surrender ngeilo uh hi kici hi. Khawlsan ngeilo, zo kei ning ciin tawpsan ngeilo uh a, a zawh kei leh, a tawp a tun zawh kei leh zong a tunzawhna tantan hanciam hi kici hi. Tua lungtang pen amau gam kiukna kumpi (emperor) adingin a kul hunhun a si ngam dinga a ki-ap lungsim hang uh hi aci om hi. Tua manin Japan gal ah nitumna lam gamte in Atom Bomb tawh a khuapi uh nih a densak uh, a thanem uh ciang nungta sa a inntun kik pen kumpipa maiah ding ngamlo ding ciin amau leh amau kithatlum khin hi ci uh hi. Guallel a ciah sang a gualzawhna ciangciang vuah khawl a, aban a nung-a hong pailaite in hong zop dingin nusia zaw uh hi kici hi. Tua zah a lungtang pha hi leuleu uh hih tuak hi.

Tua ahih manin a neu lingleng uh hang kuamah lau tuanlo uh a, a khuak uh taathiam den mai uh hi. Thatang tawh galdo sawm nawnlo in pilna tawh galdo sawmzaw ta uh hi. Thatang lian bel ut veve uh ahih manin 1950’s pan in sanginn khempeuh ah kumpi in Bawngnawi a duh bang vua nek ding a piak tak ciangin a khangthakte uh Basket ball kimawl, volley kimawl, world class mahmah ta uh hi kici hi. Thatanga galdo a kul leh zong thatang hat ding mi tampi a pattah uh cihna hi.

Zomi te in zong amau kiang pan i sin ding tampi om ding hi cih ka um hi. Zi dingin Japan numei hoih penpen hi ci a leitung paunak omte kigen khin man nawnlo ding ahih manin Sumo kimawlte training dan ka muh themkhat gen lai in ka hialbawl ding hi.

Zingsang tungin tho in, a na’ uh (pasal ten bel a cil uh ci lel ven maw) a tuamzo ciamciam puan teeng in a sam uh a tukvum ah zial uh a, a kawng vuah khau kikhih in Jeep Tyre luite khau khih in lampi dung ah a taipih thanthan uh hi. Galmuh leng guaktanga moto pei kaai a tai hi mai hi. A photo ka zaihte lawmte pawlkhat ka khak leh en hoih nuam mello uh hih tuak!!

Tua zawh ciang a khua-ul uh nul in, a kimawlna innpi sungah hong lut uh a, leilak zikbem sungah mi nihta in kibuan hong pan uh hi. Lawital kisi mahmah bangin tua zikbem sung pan kisawn khiat sawm in kinawk keei uh a, muhnop mahmah hi… a dangte in a gei pan en a, amau hun ciat ah tua bangin a kimawl uh hi. A pute uh a zahtak dan uh bel gensiam ding hi kei, muh in zong kician kei, theih ding te pawl hizaw inteh!

Japan te a kimuh ciang lu su in, kun uh a, a zahtak huai dandan in tamvei, tawmvei kun hi mai in mu ing. Sumo kimawlte bang a pute mai ah kamkhat a hopih ma in zong tamvei kun sa lua mahmah mai ing.

……Khualpu nang hi sung na tung zel maw. Hih lai ah hawhhawh nawn ken kong ci veleh. Hong pai, kel kawng ah hong na ngak ding ka hi aw. Nang zi ding ko patau lo…… cih mai sangin bel kizahtak zaw le uh kilawm!! Dr. Hau Za Cin (Phuitong Liim)

Bawlphatna: Nervous lua ka hiam nupite min ka gelhna ah khial keei ing e, Japan Zomite in nong maisak uh hong thum ing… ahang pen Nu Nial Khan Cing, Nu Thang Khan Lun cih ding kimlai Nu Vial Khan Cing, Nu Thang Ngaih Lun ci kha keei ing. Sorry. Nungakte min bel kikhial lo buang hi inteh maw… tua in hong lungnuam sak deuh e!!

Tua lo khat, gen kizom in gen vet ni. Ka zin ding lai in ZONET ah kua hiam khat in, ‘Cingno kiangah na u Thang in mangpha hong khak…’ cih dan khat kamvaikhak om a, tua pen ka gen leh bangmah hong genlo in, nui ziau ei… bang a genna hiam nang theisiam zaw dingin lamen ing. Bangmah kamvaikhak kik hong nei kei. Hih zong sorry, kamvaikhak ka gen thu hong gen hi ing ei.