Malaysia pan CI atuh tawh Myanmar aciahte kilutsak loding ci’n Embassy te’n gen

Malaysia pan CI atuh tawh Myanmar aciahte kilutsak loding ci’n Embassy te’n gen

Amasa penpen in Malaysia gamsung ah CI ihcihcih banghiam? CI ihcih ziauziau pen mihingkhat kuami kuasa hiam cih lahcianna “Certificate of Identity” ahihi. Malaysia panin Myanmar gammi te Legal takin aciahtheih nadingin Myanmar Embassy pan gammi taktak mahhi ci’n theihpihna, ciapteh sakna “CI” hongpia uhhi. Tua Myanmar Embassy panin hongpiak CI laidal tawh Malaysia Immigration zumah kipai leuleu in, liausum piakding aomte kipia in, ciahtheih nading hongbawlsak uhhi.

Ahi zongin pawlkhat te’n Myanmar Embassy ah painawnlo in, CI atuh bawlsaktawm ziauziau uh a, tua CI atuh laidal tawh Malaysia Immigration ah paiziau uhhi.

Tuabangin Malaysia gamsung aom Myanmar Embassy panin CI taktak lalo in, CI atuhtawh aciahte Yangon International panin Immigration te’n IC atuh ahihlam atheihkhiat uhleh Myanmar gamsung ah lutkhuan ki pialoding hi ci’n Malaysia aom Myanmar Embassy te’n tangkokhia uhhi.

Abeisa in Malaysia gamsung aom Myanmar Embassy panin IC angen te matpongtin leh innkuanlai cihbang akisamteng aomnakleh nikhatthu in IC piapah ziauziau uhhi. Ahi zongin tuabangin aciahsa pawlkhatte pen Yangon International Airport atun ciangin Myanmar gammi cih lahtheih nadingin akician omlo, pawlkhat pautheilo in Immigration te thudotte dawngkik theilo, pawlkhat CI angetna ah apiaksa Address leh aomna taktak kibanglo cihte akipan buaina tuamtuam omngei cihi.

Tua ahih manin 13 December 2017 akipan Malaysia panin CI angente ii Bio Data tepen Myanmar gamsung aom Immigration ah kipuak masaphot dinga, tuaciangin CI kipiapan dinghi ci’n aki tangko khitzawh CI atuh akibawl kici hi.

More: Kuala Lumpur khuasung aom Myanmar Embassy ah lungphona kineikik leuleu

Hihbangdan thuthang om, kiza ahih manin, Myanmar aciahsawm te’n kidop huai hi. Ahih theihleh CI ngetciangin Kuala Lumpur aom Myanmar Embassy mahah paitangtangding, puaisa ihzat lehzong amuanhuai acitak ahihding, CI atuhkhawng hongbawlsak ziauziau puaisa ahihlohding thupi khading hi. Sawltak #zomidaily