Church Councils ~ Evan. Suangh Dal

Church Councils ~ Evan. Suangh Dal

Tanglai Christian Pawlpite pan palai sem makaite in kimuhtuah hun nei zel uh a, tua pen thuzuihna (doctrines) pawlkhat tawh kisai a hunhun a hong piang upkhialhnate a kimutuah palai kah tengin kikupkhopna nei uh hi. Tua banga thu vailian kikupkhopna khawmpi pen Church Council kici hi. Pawlpi masate’ hun lai-in thu vailian kikupna khawmpi pawlkhatte a nuai-ah en dih ni. Tuate in: –

Hih a tunga khawmpite khit le tuhun modern ecumenical movement ong kipat ma kikal Christian khawmpi Church Council tawh kisai pen Roman Catholic Pawlpi sung bek ah kibawl zelzel lai hi. Modern ecumenical movement a khiatna pen khangthak kimlepam kipumkhat nading hanciamna cih ding ahi hi. Hih banga Church councils te buaipih tanglai thu upkhialhna nam giatte a nuai-a bang ahi hi.

1. Jerusalem Khawmpi (Sawltak 15)

Jerusalem Khawmpi tawh kisai Sawltak 15na bup ah kisim thei hi. A buaipih uh thu pen Judah ngeina le thukham ahi hi. Judah mi, Gentile mi cih bangin minam vai zong kihel hi. Judah ngeina tawh kisai buaina ahih manin Judaism kici hi. Hih pen Christian khawmpi khempeuh lakah a masa penpen ahi hi.

2. A Khatveina Nicea Khawmpi (Council of Nicea I)

Hih khawmpi ah Arius a kici pa’ thusuak kibuaipih hi. Tua pa’ thusuak pen Ariansim kici hi. Arius pen tulai pau leh Alexandria khua ah Sya a sem khat ahi hi. Khrih pen mihing sangin vanglian zawin Pasian sangin zaneu zaw hi. Khrih pen Pasian taktak hi lo hi cih thu hilh hi. Khrih pen a kipiang sak khempeuh lakah gah masa pen hi a, a tawntungin Pasian tawh a om khol gige sa hi lo hi, cih bangin hilh hi.

Khrih pen a kipiangsak ahi hi cih upna nei hi. Hih thu upkhialhna pen misiangtho Athanasius hanciamna tawh Nicea I khawmpi pan upkhialhna hi ci-in A.D. 325 kumin kitangko hi. Upna maan ih cih in Jesuh Khrih pen a kipiang sak hi loin a tawntung pan a tawntungah Pasian tawh kiza kimin a om den Tapa-Pasian (God the Son) ahi hi. Jesuh Khrih ii a mihing hihna za ah za up kul a, tuamah bangin za ah za Pasian ahihna zong up kul hi (Phil. 2:6; Rev. 1: 8).

3. A Khatveina Constantinople Khawmpi (Council of Constantinople I)

Hih khawmpi ah Apollinarius a kici pa’ thusuak kikum uh hi. Hih pa in (A.D. 310-390) kikal hun sung tengin Jesuh Khrih pen za ah za Pasian taktak hi a, ahi zongin za ah za mihing taktak bel hi lo hi cih thu ong hilh leuleu hi. Hih pa’ thusuak pen Apollinarianism kici hi. A Pasian hihna in a mihing lungsim luah khia a, mihing lungsim taktak nei lo hi.

Pasian pen mihing pumpi tawh ong kineih hi beka, mihing taktak hi lo hi cih thu hilh hi. Hih thu zong upkhialhna hi ci-in Constantinople I Khawmpi in A.D. 381 kumin tangko hi. Upna maan ih cih pen Jesuh Khrih pen za ah za Pasian bek hi loin za ah za mihing taktak zong ahi hi. Jesuh in mihing lungsim taktak nei kei leh mihing taktak hi thei lo ding hi (Heb.2:14; 1 John 4:1-3).

4. Ephesus Khawmpi (Synod of Ephesus)

Hih khawmpi in Nestorius kici pa’ thusuak buaipih hi. Hih pa pen (A.D. 451) kumin si hi. Hih pa’ thusuak pen Nestoriansim kici hi. Hih pa in Topa Jesuh Khrih sungah a kibanglo minih, mihing le Pasian kigawmin tengkhawm hi cih bangin thu hilh hi. Jesuh Khrih in lungsim nih nei hi. Tua ahih manin mihing nih pha uh hi cih bangin hilh hi.

A mihing hihna pen a Pasian hihna in ukzaw hi ci hi. Ahi ding bang napi-in upkhialhna hi ci-in Synod of Ephesus in A.D. 431 kumin tangko khia hi. Upna maan ih cih in Jesuh Khrih pen lungsim nih nei mihing nih kigawm cih bangin kihilh lo a, Pasian’ pianzia le mihing pianzia nei cih ding hi zaw hi. Jesuh Khrih pen nih hi loin khat ahi hi.

A pianzia tawh kisai-in a mihing hihna ah si a, a Pasian hihna ah si ngei lo hi. Jesuh sihna pen Pasian’ pianzia a nei lo mihing khat ii sihna ciang bek hi mawk leh vangliatna nei zo lo ding hi (Maangmuhna 1: 12-18).

5. Chalcedon Khawmpi (Council of Chalcedon)

A.D. 500 ma diak pawlin thu buai khat ong piang leuleu a, tua pen Eutychius a kici pa’ thusuak ahi hi. Hih thusuak pen Eutychianism kici hi. Hih thusuak in za ah za Pasian, za ah za mihing hihna tawh a kidim tawntung Jesuh Khrih ii a pianzia thu nial hi. Gentehna, a mihing pianzia pen damdamin a Pasian’ pianzia in valhtum ahih manin Pasian’ pianzia bek nei ta hi. Amasa-in mihing bangin ong pian ma hunin Pasian’ pianzia bek nei hi.

Nihna ah, mihingin ong pian a kipanin a Pasian hihna tawh kigawm pianzia nih ong nei hi. A thumveina ah, a mihing 00suangdalpianzia pen a Pasian’ pianzia in valhtum kik ahih manin bei ta hi, cih bangin thu hilh hi. Hih thuhilhna a hoih a bat hangin upkhialhna hi ci-in Chalcedon Khawmpi in A.D. 451 kumin tangko hi.

Upna maan ih cih pen in Khrih pen mimal khat ahihna (the unity of person), a tawntungin mihing pianzia za ah za, Pasian’ pianzia za ah za tawh kidim ahihna, Khrih pen mihing taktak hi kei leh mawhnei mihingte tangmi dingin palai sem thei lo ding ahihna, tua mah bangin Pasian taktak hi kei leh hotkhiat zawh nading vangliatna nei thei lo ding ahihna thu kihilh hi (Phil. 2:6). Mi nih lungsim nih tawh kidim het lo napi-in pianzia nih a nei thei Jesuh Khrih bek om hi. Christ has two natures. Yet he is one person.

6. A Nihveina Nicea Khawmpi (Council of Nicea II)

Hih khawmpi in a buaipih uh thu pen lim le milim vai ahi hi. Hih lim le milim vai pen Mangpau in Iconolatry kici hi. Christian biakna ah milim zatna le sing pek tung khawngah Topa lim le taang misiangthote’ lim suai-in biakna ah zatna thute hih khawmpi in endik hi.

Hih bang daanin biakinn sung le nisim upna le zuihna ah lim le milim zatna pen Christiante’ zia ding hi kei ci-in A.D.726 kumin kitangko hi napi-in, A.D. 787 kumin a nihveina Nicea Khawmpi panin zat theih dingin hong phuang kik uh a, tuni dongin Greek le Nisuahna lam Orthodox pawlpite ah hong kilim zat mahmah kik hi. Pu RC te bel gen vet loh hi.

Ei Emmanuel Tuiphum Pawlpi in bel tang misiangthote’ upna mah bangin ih biakinn singah lim le milim peuhmah ih zat het lohna pen Topa’ ong ompihna thupha taktak ahi hi. Ih mission gamte le ih area pawlpite in zong hih limpha hong etteh ding uh hi.

Note: A nihveina Constantinople Khawmpi le a thumveina Contantinople Khawmpi tawh kisai gelh nading laimai kicing nawn lo ahih manin kong guang nawn kei hi. Evan. Suangh Dal References: A dictionary of Theological Terms — M.E MANTON, Dogmatics: Christology — lectures of Grace Ministirial Academy, Manila.