Christian Hymn te’ tangthu: Keima’ Topa Zeisu Lamdang Honpa Hi

He Hideth My Soul
(Isaiah 32:2)
Fanny J. Crosby (1820-1915)
William James Kirkpatrick (1838-1921)

Fanny Crosby’ laphuahte tul thei lo-a tuni dongin kideih den hi. A hang tuamtuam tampite’ lakah, Fanny in la a phuah ciangin Laisiangtho mah bulphuh dena thungenin ki-ap masa-a a phuahna hang hi, kici hi. A la phuah peuhmah Laisiangtho tawh kituak dena, Laisiangtho upna thugil doctrine tawh kitukalh ngei lo hi. Hih la “Keima’ Topa Zeisu Lamdang Honpa Hi” mahmah zong tua banga a phuah ahi hi. Laisiangtho mun tampi bulphuh-a a phuah ahi hi. Isaiah 9:6 a, “Ama’ min in Lamdang,” a cihna muna kipan Late 16:8 a, “Amah ka taklam ah om ahi manin hong kiliingsak kei ding hi,” Thuhilhkikna 33:25 a, “Na ni tawh kizui-in na tha hat ding hi,” Isaiah 32:2 a, “Mi khat in huih nunna pana bukna mun, huihpi pana kiliahna mun; mun keu-a gun tui luang leh keugaw gama suangpi limliap bang hi ding hi,” Paikhiatna 33:22 a, “Suangpi kitam heengah kong koih dinga, ka khut-in kong liah ding hi” a cihna munte la-a a phuah ahi hi.

Hih la a phuaknu Fanny Jane Crosby pen America gam Southeast, New York ah March 24, 1820 ni-in suak hi. Kha khat leh a lang (nipi kal 6) a phak ciangin a mit na-a, zatui kinuh khial a hih manin a mit taw-a, a khan tawntung mit khua mu lo-in om hi. A sih dongin New York City a St. John’s Methodist Episcopal Church ah pawlpi mi citak mahmah khat-in om den hi. A neutunga kipanin a pi in thu le la kici khempeuh ah pantah hi. New York School for the Blind kici mit khua mu lote’ sangah pilna sin hi. 1847 kum panin 1858 kum dong tua sang mah ah sangsia sem hi. 1958 kumin tua sang mah-a sem mite’ zahtak mahmah music sia Alexander Van Alstyne tawh kiteng uh hi.

A neu tunga kipan in laphuah lam a vak hi a, ahi zongin a la phuahte leitung la pian vive hizaw hi. Church music lam-a minthang mahmah William B. Bradbury’ thuzawhna tungtawnin kum 40 a phaka kipan gospel lamal bek phuaka, ama’ genna ah “tua gam sunga a lungnuampen mi” hong suak hi. Fanny Crosby in la a phuah ciangin khukdin-in thungen-a Pasian’ makaihna zong masa lo peuhmah-in la phuak ngei lo hi. A Laisiangtho sungah American lan (flag) khat tep liklek den se hi. Ama’ hun-a gospel laphuak minthang mahmah Ira D. Sankey, William H. Doane, John R. Sweney, George C. Stebbins, George F. Root, William J. Kirkpatrick, leh a dang tuamtuamte tawh kithuah-in la tampi phuak hi. A khan sunga a laphuah pongpong dawng 8,000 val hi, ci-in kiciamteh hi. February 12, 1915 ni, ama’ kum 95 a phak laitakin i Topa’ kiang hong zuatsan hi.

Fanny Crosby’ phuah late lakah hih la, “Keima’ Topa Zeisu Lamdang Honpa Hi” (He Hideth My Soul) banah, “Hong Paisan Ke’n, Migi Topa” (Pass Me Not, O Gentle Savior), “Lungmuanna Thupha” (Blessed Assurance), “Amah Thei Ning” (My Savior First of All/I Shall Know Him), “A Sia Ding Honkhia In” (Rescue the Perishing), “Lam Tawntung A Hong Paipih Hi” (All the Way My Savior Leads Me), “Pasian Min Pha Ta Hen” (To God Be the Glory) cih la ngaihte kihel hi.

Hih la a aw a phuakpa William James Kirkpatrick bel February 27, 1838 ni-in Ireland gamah suak hi. A neu lai-in a nu le a pa tawh America gamah lal uh a, Duncannon, Pennsylvania ah teng uh hi. Khutsiam lettama nasep sema, ahih hangin a uk taktak bel music ahi hi. Violin, cello, tamngai leh fife tum sin hi. Kum 17 a phak ciangin Methodist Episcopal pawlpi ah lut a, biakna la lamah kipia hi. American Cilvil War (tual-gal) sungin 91st regiment of Pennsylvania Volunteers ah 1861-1862 sung galkap sung misic makai leh fife tumin om hi. (Fife i cih bel tamngai tawh a kibang pian tum theih namkhat hi a, galkap sungah kizang deuh hi. ZKK)

Tua khit ciangin tembaw lamna ah sema, kum 12 sung Philadelphia-a innsung vanzat furniture kibawlna ah sem hi. Sunday school nasepna thupisa dena, 1859 kumin camp meeting-a sak ding la pawlkhat khen hi. 1865 kumin Philadelphia ah organist leh music director suaka, 1878 kum ciangin a khutsiam nasep nusia kiuhkeuh ta hi. Gospel laphuah leh biakna la editor sema, John R. Sweney tawh kopkhawmin biakna labu 50 dektak kaikhawmin khenkhia uh hi. Amah guak in bu 40 khenkhia leuleu hi. September 29, 1921 ni-in Germantown, Philadelphia ah la dawng khat a phuah laitakin si hi. Tua la a phuah kawmin a Topa in sam ta cih thei leh kilawm hi. A taang masa leh a nunung lam a khutlam kibang lo-in nawh tektek leh kilawmin zulh semsem hi. A laisimna inndei sungah a ging a om loh ciangin a zi lungnuam lo a a et leh a laikung tawi kawmsa-in na si khin ta hi. A sih laitaka a phuah la hih bang ahi hi:

Just as Thou wilt, Lord this is my cry;

Just as Thou wilt, to live or to die.

I am Thy servant; Thou knowest best.

Just as Thou wilt, Lord labor or rest;

Just as Thou wilt, Lord- which shall it be;

Life everlasting is waiting for me.

Or shall I tarry here at Thy feet?

Just as Thou wilt, Lord, whate’er is meet.

A Mangkamin ngaih mahmah-a, ei’ kama i tei teh ngaih zo khol lo hi taleh, hih la ei Zokamin kong teikhia pong hi. A khiatna leh a rhyme mahmah ngaih zo khol lo ahih manin mun dangte bangah letkhia se lo-a a English version mah kong suahsak den ahi hi.

Nang’ deih bang, Topa, hih kong thumna;

Nang’ deih bangbang, hin ding leh sih ding.

Nang hong thei pen teh; Na nasempa.

Nang’ deih bang, Topa, sep ding khawl ding.

Nang’ deih bang, Topa – tua bang piang hen;

Nuntak tawntungna’n kei hong ngak den.

Aih keh Na khephung hiah ka khawl dia?

Nang’ deih bang, Topa, Nang’ deih bangzia.

William J. Kirkpatrick in la-aw ngaih tampi phuaka tuate’ lakah hih la “Keima’ Topa Zeisu Lamdang Honpa Hi” (He Hideth My Soul) banah “Huhpa Hong Pai Khin Ta” (The Comforter Has Come), “Hong Ciah Ing” (Lord, I’m Coming Home), “Thum lo-in Ngak In’ (Wait and Murmur Not), “Zeisu’n Hong Hon Hi” (Jesus Saves), “Deeper Yet,” “Jesus Comes,” “Heaven at Last,” “We Have an Anchor,” “Redeemed,” “Stepping in the Light,” “When Love Shines In,” “O to Be Like Thee”cih late zong a la-aw ama’ phuah mah ahi hi.

Rev. Zam Khat Kham
Christian Hymn te’ tangthu 2005