Christ’ a Pasian deih leh gel

Christ’ a Pasian deih leh gel

(Theihkholhna, telna leh Sehkholhna)

Amah maia siangtho leh dembei a om dinga leitung pianma a eite hong na teltak bang ngei in, Aman a deiha atup bangbang in, eite Jesu Christ vanga atate hi dingin, itna jiak in hong nasep kholh khinta hi. (Ephe. 1:4, 5; I Pet.1:2).

Pasian geldan pianjia hibang ahi, theihkholhna a masa a, tua khit in teelna a om a, tua khit in sehkholhna a om. Peter in (I Pet. 1:2) agen chiang mahmah a, teelna pen theihkholhna bangin ahi a, tuaban ah sehkholhna zong teelna hih buchinna ahi. Pasian in a theihkholhna in Topa Jesu Christ ummite khempeuh Tapa lim batpih dingin a sehkholh chih Lai Siangtho sung panin a kichian mahmah hi. (Rom. 8:29); Tua bangin a ummi peuhmah “Leitung pian masang in”(Ephe.1:4) Christ ah teel a hita uh a, a minte uh zong Belamno Hinna Laibu sung ah a kikhumta hi. Tuachi’n sehkholhna pen van gam lut ding leh gawtmun meidil sung lut ding genna ahi kei a, Christ sunga om Christ tawh hamphat khawmna thu a hizaw hi. Theihkholhnate, teelnate, leh sehkholhna te’n hotdamna bangchik mah in a sai kha kei hi. Pasian in (Jn. 3:16) a ummi peuhmah in tangtawn hinna a neita a chih manin. Tua tangtawn hinna pen hehpihna hanga upna tungtawna ngah ahi- mihing deihtel theih ahi. “A ut peuhmah” bel teel ahi mai ua, “a ut lo peuhmah” pen teel loh ahi mai uh hi.

1. CHRIST A OMNA: Kahiang in gah a suah theihna dingin guipi tawh kizoma a om kul hi; tuabang mah in a ummite Christ tawh kizoma a om kul hi. Christ zong a ummite tawh kizoma a om a kul (Jn. 15:4) Amah tawh kizoma om gige theihna dingin hinna pen a mai a laibu phensa banga a om ding kisam hi. Khelhna vaihawm khit lohte (siansaklohte) a om ding ahi kei hi; hun tenga a hong om pih theihna ding dandana om a kul hi. Kuapeuh in a lungzin mangbatna khempeuh amah puak dingin a tungah a nga ding a, amah tawh kikal ah bang mah in a khenloh ding a deih lam a hizaw hi.

2. TA HIHNA/TA SUAHNA (Adopted): “Ta hihna” I ngah theihna dingin (Gal.4:4,5). Greek ham ah ta hihna chi a I theih pen ‘huiothesia’ ahi, tua pen “Ta banga koih” chihna ahi. Nidanglai in ta pasal pen a kum chin masang tapa-gouluah a seh ahi nai kei hi. A hong pichin/kumchin chiangin tapa gouluahpa chi-a phuankhiakna a om hi. Tuabang phuankhiakna zekbawlni pen ‘huiothesia’ akichi hi. Pasian in a tate hikhinsa-lote tate in a bawl kei a, ta hihna I chih pen kitanauna lam hilo in dinmun genna a hizaw hi. Mi a pianthak chiangin Pasian’ ta in a piang hi. Tuachi’n Pasian in a innkuan sunga tapa dinmun buching ah a koih hi. A ummi sunga teeng Khasiangtho in hih theihtelna a neisak hi. Topa hong pai kik chianga a ummite pumpi bawl lamdang ahih khit chiangin hih dinmun thupitak a kichianzaw in a lang semsem ding hi. “Ta i hihna” (pumpi tatna pen) ngak in I om, chi’n Romte 8:23 ah eite hong kihilh hi.

3. HINDAN LEH GAMTAT ZIA LEH DINMUN, HIHNA: (a). Hindan leh gamtat zia- Gal. 5:22,23 sung ah “Kha-gah” I mu hi. Hihte kigawmkhawm in Christian hindan, gamtat zia a bawl hi. Hih kha-gah kahiangte a kizopdan un, hi bangin a khenzak theih uh hi. Itna, kipahna leh muanna- hihte Christian khempeuh ah a om chiat hi. Thuakzawhna, migitna leh hoihna (siamna) hihte midangte tunga gamtatna ah a kilang ding hi. Upna, chingkam(lungnem)a omna, kidekzawhna- hihte Pasian lama i lungsim put dan leh hindan ah a kilang ding ahi hi. John 5na sungah tua gahte a kimu hi. Hih gahte pen sepzawhna hanga gah ahi kei a, kipiakzawh hang, Christ tunga kipiakzawh hanga gah a hizaw hi.

(b). Dinmun leh Hihna- A ummite’ dinmun (I Cor.1:2-9) pen Christ sunga a dinmun uh ahi a, ahihna uh (I Cor.1:10-13) ahih leh tua innkuan a omdan uh ahi, a nisim gamtatna uah a ki nga, a nisim omdan bang zel un a hihna uh a kikhen thei hi. Mikhial a pianthak phet-in Pasian innkuan sungah dinmun (Innkuan sung mi hihna) a nei a, tua dinmun pen tangtawn in hehpihna hangin a lamdang in a kikheng tuam kei hi, hih dinmun pen bel misiangthote upna-a hatpen leh zawngkhal pen zong a kibang uhi. Pa’ ta hihna ahi a, itpa (Jesu) hanga san/pom in I omta (I Jn.1:12,13; Rom.8:1, 15-17; I Cor.12:12,13; Ephe.1:3-14; I Pet.2:9).

A ummi hindan/gamtatdan pen a dinmun sanga niamzaw, a dinmun tawh kilawmlo zong ahi thei hi, banghang hiam I chih leh nisima Kha’ thununa a om kei leh a omdan a hindan a niam ding hi. Misiangtho bel a hikhin zou a, tuabang ahih manin misiangtho hindan dinga kilawma a gamtat ding kisam hi. Kha in hong sungluah na hang bel, I dinmun tawh kilawma I om dan gamtat dan a san theihna ding ahi, tuachibang ahih theihna dingin Pasian’ thu eimah ah a semsak a, omdan tatdan hoih lam zuan in hong huh hi. (I Cor. 11:32; Heb.12:10). Ama’ nasep mahmah in zong hong huh hi(Ephe.4:11,12) a vekpi a omdan kipumkhek nading in zaw Topa Jesu Christ hong pai kik chiangin ahi pan ding hi. (I Jn.3:2).

Pastor laikung pan..
Zomi Christian Fellowship, Delhi