Aung San Suu Kyi pen April khabei ciangin Europe sung aom gam 4 te ah zinkawikawiding cih Myanmar State Counsellor pan genkhia uhhi. Deputy Director General Zaw Htay in agenna ah Aung San Suu Kyi pen April khabei in European Countries gam 4 ah zinmasading a, tuakhit ciangin May khasung in China ahzong zinding cihi.
European Countries gam 4 azin nading tepen Belgium, Italy, France, Britain cih gamteng ahihi. Akhualzin nading Program akicianzaw in asawtlo in ki tangko khiatading cihi.
Europe gamsung panin aciahzawh asawtlo May khasung kal nihna in China ah akibawlding OBOR Road Safety Forum kahding in zinkhiakik leuleuding cihi. Tuamun ahzong leitung gamtuamtuam panin gammakai World Leaders tampitak kihelding uhhi.
Aung San Suu Kyi pen Kawlgam ah kumpi makai asepzawh Official Visit in Belgium, Italy, France gamthum te zinngei nailo ahih manin, tukhabei ciangin azindingpen amasapen hiding hi. UK gam ahihleh NLD in kumpi asawpzawh khatvei zinngei khin a, tutungpen anihveina hitading hi.
Ataktak in Suu Kyi pen akhangno hunsung sawtpitak England, Oxford khuapisung azang ahihi. Tuapan in pasal nei in tapasal zong nih nei hi. Apasal pen British gammi Michael Aris hi a, 1999 kumin sihsan hi. Suu Kyi ii atate anihin British Citizenship ahihna tawh kizui in Kawlgam sungah Aung San Suu Kyi in President asemtheilo ahihi.
Nungkum inzong UK gamsung ah Suu Kyi khatvei kumpivai tawh Official in zinkhin a, tuahunlai in British Prime Minister Theresa May tawh kimuhkhopna neikhin uhhi.
Kawlgam ah NLD kumpi akahkhitzawh Aung San Suu Kyi pen gampua azinkhiat masakpenpenna ahihleh China ahihi. Nungkum in China Official in khatvei zinkhin a, tukumzong azinkik leuleuding ahihi.
Related: Aung San Suu Kyi Security apiading thautawi Bodyguards kibehlap
Kawlgam ah thautawi kipawlna tetawh Peace Talks ci’n “21st Century Panglong Conference” neihkikding ahunpen gencianna omnailo hi. Ahi zongin May kha laizangpawl in Suu Kyi pen Ethinic Leaders te leh Armed Groups tuamtuam pan makai Reprensentatives tetawh kimuding uh cih kiza hi. ZD Sawltak #zomidaily
Comment piaknop aomleh...