China ah ganhing khawina asimlutsawm khat Sahang in na petlum

China ah ganhing khawina asimlutsawm khat Sahang in na petlum

Eastern China aom ganhing khawina khatah Sunday ni in sahang in mikhat petlum cih The South China Morning Post te’n genkhia uhhi. Hih petlup athuakpa pen ganhing khawina Zoo sungah lutman pialo in, dai pi 10 dektak (3 Meter) tawh aki umcip nihvei kantan in, Zoo sungah alupsimna panin sahang kikoihna tawh kituakkha in petlup athuak ahihi.

Hih thupiang pen Sunday ni in China, Zhejiang Province sung aom Ningbo Youngor Zoo akicihna ah thupiang hi a, amukha pawlkhatin Video nazaihkha uhhi. Video sungah tuapa pen sahang in talkaihgawp a, silehnai tawh kidimcip hi.

Zoo sungah ganhing kemte’nzong tuamipa petlup athuakloh nadingin hanciam mahmah uh a, sahang khatzong kaplumliang uhhi. Tuaban ah sahang te ageipan lau in ataikhiattheih nadingin kep ihcih Firecrackers khawng lotsan in hanciam mahmah uhhi.

Sahang peh athuakpa pen naikhatsungbang khitciangin ki honkhiathei himahleh zato akipuakna ah sihlawh vevemawk hi.

Ganhing khawina thunei te’nzong hih buaina hangin amanlang in Zoo sung aom mite hemkhia uh a, athu kanpah uhhi. Hih sahang te akikoihna pen mipi et theih nadingpan in tuikulhno khatleh suangtum dai akikai ahihi.

Hih Zoo hontheih nadingin thunei ahi “Ningbo Oriental Fortune Lake Tourism District Management Group” te genkhitna ah asipa leh alawmte khatpen Zoo sungah luttheih nadingin Ticket naleilomawk uh a, Zoo sungah asimlutsawmna panin sahang kikhawina lamah alutkha uh hihtuak hi.

Zoo thuneite Statement bawlna ah asipa leh alawmpa alutsim hi a, asipa in suangtum dai sangpitak akikai pen kankhin in, alawmpa in kanmanlo cihi. Hihte lawmta pen azi atate uhtawh Zoo ah hongpaikhawm uh hi a, azi atate uh adingin Ticket leisak uh a, amau lawmta pen asimlutsawm uh cimawk hi.

Sahang petluppa bangpen atate nihleh azi tawh Zoo ah ahawh uh hi a, azi atate bek adingin Ticket lei uh cihi.

Hih Zoo sungah lutman pen ulian te Ticket khatciangin US$19 (130 yuan) hi a, naupang tepen Ticket khatciangin US$10 (70 yuan) ahihi.

Sahang in apetlaitak Video Clip tomno khatzong anuai ah YouTube panin ki enthei hi. Hih Video Clip pen Social Media tungtawn ah tulaitak minthang mahmah hi.

Pawlkhat in sahang aki kaplup pen hehpihhuai sazaw uh a, banghangin thunei te’n mawhneilo sahang kaplum uh ahiam? Ticket leilo in, sahang kikhawina sungah atuaksukpa mawhna hizaw hi ci’n Comment apiazong tampi om cih kiza hi. Sahang petluppa pen Ningbo Company ah 2000 kum akipan nasep kician aneikhat hi a, khasum zong ahoihmawhlo kici hi.

More: Banghang U Ko Nyi kithat hiam ~ Khawm Pau

Khatveivei sum cilluatzong ahoihkhinlo ihcidiam? Na ngaihsutna anuai ah hong Comment dihve leh lawm… ZD Sawltak #zomidaily