Canada ah pasal khatin temta tawh amuhpeuh dawtgawp in mi 5 liam

Canada ah pasal khatin temta tawh amuhpeuh dawtgawp in mi 5 liam

Canada gamsung ah pasal khatin khuasung mipi te abanban in temtawh dawtkawikawi ahih manin palik te’n mankhinta cih AFP pan kiza hi. Sunday ni in Canadian Police te’n amatkhiat uh hi a, aliam lakah Police Officer khatleh khuasungmi 4 kihel uhhi.

Tua pasalpa ii gitloh gamtatna pen Saturday zangkimlam in Edmonton City aom Football Stadium apualam ah akipan ahihi. Agitloh gamtatna akitheih ciangin Edmonton Police te’n matding in delhpah uhhi. Tuapa pen Truck mawtaw khattawh taikhia in, hattailua ahih manin khetawh mipi lampai Pedestrians teng nawkkha in, amawtaw zong kibung cihi.

Hihpa gamtatna pen gitloh ngongtatna “act of terrorism” hi ci’n Canadian Police te’n genkhia uhhi. Tuciangciang amahguak bekmah hiding in ki ummawh a, ahi zongin hoihtak thusitna leh kancianna kineilai dinghi ci’n Edmonton police chief Rod Knecht in genkhia hi.

Police Statement akhahkhiatna ah Canadian Football League tepen Edmonton Stadium ah Saturday ni in akimawl uh ahihi. Tua Edmonton Stadium ii apualam ah Police Barricade tengpen tuapa’n mawtaw tawh phupheigawp hi.

Tuabang in anawkphei ciangin Police Patrol Car mai ah ading Officer khatzong nawkkha in, tua Police Officer papen huihlak ah Pi 15 bang kilonto hi.

Video: Canada: Five hurt in Edmonton ‘terror’ attacks

Tuakhit ciangin tuapa pen amanlang in mawtaw sungpan in kumkhia in, temta khattawh Police Officer pa dawtgawp hi. Adang Police Officer te atunbehma in akhetawh taimang vingveng cihi.

Palik te’n azanzan in zongpah ngeingai uh a, Edmonton Downtown sungah Sunday zingsangtung lamin tua migilopa pen mankhiathei uhhi. U-Haul Truck mawtawpi khattawh mipi khetawh apaite anawkgawpsawm laitak in palik te’n delhgawp uh a, amawtaw kibung in tuapanin amatkhiat uh cihi.

Related: Canada ah “Sea Lion” tuisung ganhing khatin numeino khat tuisung ah kaisuk

Tuapa pen kum 30 gualpawl kici a, amin apuam bangmah pulakna omnailo hi. Canada gampen abeisa in Terrorist aomkhollo, aki zangngei khollo himahleh tulamlam ciangin gamsung buaina tuamtuam hongki behlap totota hi. Tulaitak leitung thuthang tuamtuam ah migilo te gamtatna vive kilimzak mahmah a, koimah ah bitna taktak omnawnlo hi. Sawltak #zomidaily