Canada ah Muslim biakinn thautawh kikap, 6 si

Canada ah Muslim biakinn thautawh kikap, 6 si

Jan. 30, 2017: Zan nitak 8pm local time (01:00 GMT) in Quebec khuapi sunga om Quebec City Islamic Cultural Center ah Muslim ten thungetna a neih lai un thau tawi ten biakinn (mosque) va bukap uh a, mi guk a sih banah mi 8 in liamna tuak uh hi ci-in police ten ci uh hi. Thau tawi ten biakinn a kap lai un biakinn sunga thungen mi 40 kiim om uh hi. Police ten thaukap dinga upmawh mi nih kiman ta a, midang om beh lo dingin ki-ummawh lo hi ci uh hi.

Quebec City Islamic Cultural Center biakinn a kikap lai takin Quebec City Islamic Cultural Center mosque president Mohamed Yangui om lo a, biakinn sunga kikhawm patau ten phone in hih thupiang zasak uh hi. Hih banga gamtatna pen Muslimte tunga hai gamtatna (barbaric acts) hi ci-in Mohammed Yangui in ci hi.

Canadian Prime Minister Justin Trudeau hih bang thupiang pen dipkhuatna leh patauhna piangsakte gamtatna leh suamna (terrorist acts) hi a, Quebec Muslim mite a thuakpihna pulak in, mi dawilokte gamtatna hi ci hi ci-in a Twitter ah tuangsak hi.

More: Mihing Hamphatnate Khuavannuai Tangkona

Hih Quebec khuapi ah Muslimte biakinn June 2016 in Muslim ten Ramadan pawi a bawi lai un a biakinn sungah vok lu va kikoihsak hi (Vok pen Muslimte ading sa siang lo ahi hi). Montreal Gazette managing editor Basem Boshra in Quebec khua-ah Muslim biakinn guk omte lakah Quebec City Islamic Cultural Center biakinn pen a golpen hi a, member 5,000 kiim pha hi ci-in Al Jazeera newste kiangah gen hi.

Behlapna:

Canadian Prime Minister Justin Trudeau in Muslimte a muak pong hangin Canada gammite Muslimte mudah tam mahmah veve hi.
Source: Al Jazeera and news agencies/ Thang Khan Lian