Bonn Museum hawhna (1) ~ CS Khai

Bonn Museum hawhna (1) ~ CS Khai

May 20, 2010 ni zingsang nai 9 in Professor Frau Wennekamp leh sangnaupang 20 Bochum pan in Bonn zuan dingin Meileng tawh ka pai khia uh hi. Nai 2 sung meileng Regional Express tawh ka pai khit uh ciangin Bonn ka tung uh hi. Bonn ah mu nop tuamtuam en dingin khuasung ah ka vak kawikawi uh a, tua te sungah Bonn University zong ka en kha uh hi.

Bonn University pen 1689 kum in ki phut/ ki hong a, Germany gam bek hilo, leitung University Top Ten te lak ah khat in ki hel hi, ci in ka Professor nu in hong gen hi. Tua ciangin Zonet a, ka laisim ngeikhat phawk ka hihman in, ka nui simsim hi. America ten leitung a, University minthang te, a hoih pen te, (The Best University) te a gen uh ciangin, a vekpi phial in USA gam sung ah om in gen uh a, Germany ten a gen uh ciang in, Leitung ah University hoihpen Top Ten te lak ah Bonn University zong khat ahihi ci zel uh hi. Koi zaw thu dik hi ding hiam? USA te gen maw, Germany te gen, koi zaw thudik hi ding hiam? Ngaih sut zawh hilo hi. A hi zong in ka ngaih sut thu in, The Best cihin, khiatna (Interpretation) a tuamtuam om hi khading hi ka ci hi. The Best cih ciangin a Building te, sanghuangte a gen nuam uh hiam? a hih kei leh bang a gen nuam uh hiam? Education hoih pen a ci nuam uh hi zaw ding hiam? Education a hoih pen ahih leh bang Field, gentehna in Science, Biology, Theology, cih ban in ngaih sut ding hong om tohtoh takciangin A HOIHPEN a om thei taktak lo ding ahih na thu ka phawk thak hi. A hangin University pawlkhat gtn. in Science field ah a hoih pen a hi phial zongin, field dang ah a hoih pen hi zolo zel ding ahih man in, the best cih taktak a om thei ngeingei lo ding ahih lam ka phawk hi. The Best cih kammal pen a gen khiate tung ah ki nga hi lel a, a hi zong in a hoihpen taktak cih bang a om thei ding hilo hi. Amerika te a maumah a hoihpen in a ki ngaihsut bang mahin, Germany, Britainte, Norway etc. te in a mau mah a hoihpen a pil penin ki ngaih sun uh hi. A taktak in ci le hang a mau le a mau a ki ngaihsut na uh hi a, a hoih pen cih a gen theih ding kua mah om tuanlo hi. Hih thu tung tawnin Zomi te in ih ngaihsut ding, ih lungsim ih bawl phat ding pawl khat ka pu lak nuam hi.

1. Mikangte khempeuh a pil dingin ki ngaihsun kha: Mikang khempeuh pilkimlo
Zomi te bek hilo, Asia mi le Africa mi a tam zaw te in Mikangte a hihnak uh leh eite sangin pilzaw, siamzaw, hauzaw in ngaihsun ih hih manin ih tunget den hi. Khial tuanlo hi hang. A maute hangin eite in khua ih muh lawh a, ih mit a keuh hong suak hi. A hi zongin mikang hai tampi tak mah na om veve a, mikang vakvai zong tampi tak mah na om veve hi. Khatvei gunpi geikhat ah mihau pa in Alu (Potatoe) cin ki pan hi. Khuakhal hun sung teng alu tuha, limtak in na sem hi. A hi zongin tuk hun ciangin guah hong zu a, tui hong khang ahih manin, a tuhsa, Alute tui in taimangkhin hi. Alu lak hunin lakding bangmah nei lo hi. Tua bang haksatna tuak hi na pi in kum 10 sung, kumsim in gun pang ah Alu tuh thithe den hi. A nasep zawh kum 10 hong cin ciangin, mihaupa in a ngaihsutna hong khel hi. Kum simin Alu tuh den ing a, citak tak in na sem hina pi ingin, bangmah lawh cing thei mahmah lo ka hih man in, ka ngaihsutna kakhelding kisam hi. Hi bangin Alu ka cin sangin hih gunpang ah, Vatawt khawi leng hoih zaw dinghi, ci in vatawt khawi hong kipan hi. Khuakhal hun hongbei in, tuk guahzuk hun, tui khanhun hong kipan ta hi. Guahtui hong khan ciangin, vatawt te in nuamsa in, tuitung ah lam ngeingai uh a, tui khangin amaute ngawngkai sak zolo hi. Vatawt te tuk hun sungin punpi in pung a, mi haupa in kum 10 sung, Alu cinna hang a, a sup sum le paai te vatawt kum khat bek a khawina tung panin ngah kik hi. Ih thu ngaihsutna, ih khel masiah, bang mah ki khello ding cih hong phawksak hi. Zomite a pil dingin ih ki ngaih sut leh mipil te hiding hihang, mi hauding in ih ki ngaihsut leh hauding hi hang. A kipum khat dingin ih ki ngaihsut leh ki pum khat ding hi hang. Tampi tak gending om lai in teh. Hi lai ah ih gennop bulpi in, Zomi te sangin Mizote, Kawlte, Mikangte peuh a pil zaw, a siamzaw in ngaihsun lo ding hi hang. Mizote, Kawlte, Mikangte, a mau le a mau mipil in a ki ngaihsun te uh ahi uh hi. Tua bang a ki ngaihsutna lungsim te in, a lungsim uh na hansuah den a, a omom na mun uh ah, kisuanglo in, a gennop uh gen ngam, paungam uh ahih manin, ei sangin a pilzaw, a siamzaw a, a ngaihsun kha ih hi zaw hi. A taktak in Zomi, ih pu ih pate, a pil bek hilo in, ciim mahmah lai uh hi. Mizote, Kawlte, Mikang te eisang a a pilzaw ding a ngaihsutna, slave mentality, sila lungsim pen ih khelzawh na ding in hanciam ni. Tua bang lungsim khelpak ding, thakhat thu in a piangzo ding hilo hi. A hi zong in a hi thei ding thu ahi hi. Zomite mi pil, misiam, miciim, mi hoih, ki pumkhate hi hang ki cici phot dih ni. Tua bang ih ki cihcih nate in ih theihloh kalin Zomite mipil, misiam, miciim, ki pum khatte hong tangsak/suaksak ding hi.

2. Mi kiphasak, mi kisa thei Germante:
German mite pen minamdangte tawh kibanglo in, ki ho khakding, ki theih khakding haksa mahmah hi. German pau tawh ih pau kei leh, ih theihnop thu khat dot ding zong baih lo hi. Amau bek mah hi a kisa te a hi uh hi. A mau pau tawh a paute bek thupi sim uh hi.1386 kum in The University of Heidelberg ki hong a, German University te lak ah a upa penpen a hihi. October 12, 1492 kum in Spain mi Christoph Kolumbus in USA gam muh khiat hongkipan hi. German mite gen theih ka zak thu khat in, USA leitang a kisat ma, a pian ma in ko Germany gam ah leitung a pilna sangpen Ph.D, Doctor ciang dong sangkah theihna, University neizo hi ung ci thei uh hi. A gennopna uh ahih leh, Ko mimasa te hi ung, thupi na sak mahmah uh USA te khawng zan mahmi hi a cinuam tawh kibang hi. Tua bangin ki phasakna, ki liatsakna, kisak theihna lungsim neiden uh ahih man in, leitung galpi khatna, nihna te a mau hangin a piang khiahi, a ki ci thei thu a hi hi. Galpi nihna ( II World War) a ven khit, Germany gam om zia, Bonn Museum ah ka mu kha hi. Inn le lo tampi, a vekpi phial in kisia a, mi hing a theihsa, vui zong ki vui zo nawn lo in, lam kim, lampam ah, uino si, akno si bangin om zelzul uh hi. Nupi tul 300 (Sang thum) te pasal te zong galsung ah si khin uh hi. Pasal tampi galsung ah si a hih manin, numei te in na a seploh uh hong phamawh ta hi. Pasal na sep, numei nasep cih omlo in, numeite in Germany gam puahkik nadingin na sep hong kipan uh hi. Tua a hih man in German mite in Frauen Macht ( The Power of Women) cih thu cin khat na nei uh hi. Germany gam hong lamkik pen Numei te a hi uh hi, ci uh hi. Galpi nih na lai a, vut le vaisuak Germany gam tu hun ciangin gam thupi leh gam hau, tha khat thu in hong suak kik uh hi. German ten a gen theih uh thu khat in, Amerikaner te in ka inn, ka lo uh, ka setzung (industry) te uh, ka pu ka pa te uh hong thahsak theih hangin German mite Idea (Idealismus), pilna nate pen hong suksiat sak theilo ahih manin, tu ni in vut le vai suakkhin sa, German pen tu a na muh bang uh hi, ci uh hi. Galpi nihna hun in vut le vai suakta leh tu in genzawh loh in khangto in gam hau, gam thahat hong suakkik ta uh hi. Hih thu hangin ka phawk thu in, Mi namdangte a pilzaw, a siamzaw in ngaihsun tuan kei ni, Zomi ki phasak lo in, Zom hihna hangin kisa thei mahmah lel ni. Ei a ding in ni hong suah hun om ding hi.

Zop laiding, Bonn Museum thu pawl khat…..

CSKhai