Billy Graham Crusade Yangon Zomi Choir vai zaksakna ~ David Suum

Dear Zomipih khempeuh,
Nov 20 (Sunday) ni a, Billy Graham Crusade pi ah Zomi tengin Hallelujah Chorus lapi tawh Pasian limtak leh ngaihtak in (lep leh sak thuah hilo) ih saktheih ziahziah theihna dingin anuai abangin 1) LASIN hunding, 2) LASIN ZIA ding 3) BUS vaihawm zia leh 4) KIGINZIA dingte hong zasak ingh.

1). LASIN HUN DING – HUN 3
a) November 18 (Friday), TBCY biakinn ah sunhun 12:00 -2:00 pm kikal sung.
b) November 19 (Sat), TBCY biakinn ah sunhun 12:00 – 2:00 pm kikal sung.
c) November 20 (Sun), TBCY biakinn ah sunhun 2:00 – 3:30 pm kikal sung.

2) LASIN ZIA DING
Sia Mun Khai, Sia Steven Mang, David Suum (Grace/GMI) te in Soprano, Alto, Tenor, Bass la-aw te atuam in group kikhen in hong hilh tek masa ding uh a, tua khit teh avek in kigawm khawm in sa khawm ziahziah ding.

3) BUS VAIHAWM ZIA (Bus tungah LOVE JOY PEACE Festival poster kisuang ding)
a) November 18 (Fri) – Ei atek tawh hanciam ding.
b) November 19 (Sat) – Khua sung Emmanuel biakinn pan zinghun 11:00 am in dingkhia in lasin man teh Emmanuel biakinn mah ciahkik ding hi.

c) November 20 (Sun) – Khua sung Emmanuel biakinn pan in sunhun 1:00 pm in bus khat, 1:15 pm hun in adang bus khat dingkhia ding hi. TBCY ah lasin khit 3:30 pm hun in bus 4 tawh pawi bawlna MCC (Myanmar Convention Center) kipai ding hi.

4) Lasakni (Nov 20 – Sunday) ni KIGINZIA DING
a) Zonik, zopuan silh tek ding. Anei lo te in puan kang leh nik/pheituam vom. Ih minam puan pen leitung bup in hong theihna ding hipah ahihna phawk in hoihtak kizem siam ni. La ah kisak ding mah bangin “kumpite’ Kumpi, tote’ Topa” minphat ding ih hih man in ahoih pen in kizem ni.

b) Stage tung ah hun kipat pan atawp dong (5:00 – 8:30 pm) aki om ding ahi hi. Video camera 10 bang in stage tungteng mat leh zet in hongzaih dending ahih man in OM DAN KHAWLDAN SIAM MAHMAH BEK HILO LO, MAITAI SIUSIAU ding kisam hi. Ih lasakna te leh ih omzia te LEITUNG BUP IN MU DING ahih man in ahoih thei pen in kiging ni.

c) Na dang atak theihleh tuithawl kiging in. Ahi hangin tuitam dawn lua lo ding. Tui tam na dawn luat leh na zun suak ding a pusuak nuam ding na hih man in hih nai 3 leh alang hun sung peuhmah pusuak lo in ih om zawh nang leh ih om siam nangin kiging ni.

d) Khua dakdak lo in Pasian thugenna leh la kisa te hoihtak ngai in note laibu tawh ciamteh zo leng video ah zong hong hoihsuah bek thamlo Pasian zong lungdam ding hi. (Video zaihte thusim: thu hoihtak ngai a, aciam teh te lim zaih sese uh hi.)

e) Muan theih tuamtuam ahi Khaini, Sahdah, Kunza, etc. cihte zanglo ding. (A muan te in agim nam azak loh hangin a muan lote tungah namsia mahmah hi). Na kidek zawh kei ding leh “la din lohna tawh Pasian minthang sak zaw ni.”

f) Aki gelh kha lo hoihding a na muh khempeuh tawh hong kiging in.

Thutuamtuam
Tu ciangciang lasinna ah nek leh dawn ding in hong kihelte:
1) Rev Dr Go Cin Zam family Ks. 50,000
2) Rev Khoi Lam Thang family Ks. 50,000
3) Pa Thang Khawm Cin family Ks. 100,000
Hih atunga sum kigawm Ks. 300,000 teng tawh TBCY nupi te in Nipi ni choir sading te’ nek dingin Sat nitak aki pan mi 300 ai ding buhman hong huansak dinguh hi.

4) November 19 (Sat) ni a lasin na ah nek leh dawn ding leh November 20 (Sun) ni a tuidawn (Tui, Juice) te bek kisam lai bek hi.

5) La ih sin theihnang in mun hong zanghsak TBCY pawlpi tungah ih lungdamna lian mahmah hi.

6) Hih crusade pi ah aki hel dingteng Nov 16 (Wed), 2016 ni in MCC mun ah nitak 7:00 pm meeting hongsam uh a, kava kihel thei hi. Tua mun ah music tumding te (Eg. Chit San Maung), lasa ding te (Eg. Sangpi), Choir tangmi (Eg. Yangon Zomi Choir), etc. cihte tungah festival makai mangkang te in hun zatzia ding, van zatzia dingte ahih sitset theihna ding in hong hilhin ni 3 aiding WORSHIP ORDER aki khen sitset in anai (minutes) tawh aki gelna hong lak uh hi. Hih pawipi pen alem bangbang cihdan in kipai lo ding a, hun lap lote’ kisuanna om lo in kikheng ding hi.

7) Billy Graham Evangelistic Association in kum 50 sung abawl crusade experience te bulphuh in akigeel pawipi ahih manin Zomi te in theih huai, sin huai,muh huai, zak huai, apai huai mahmah pawipi ahi hi. Thu umlo ih lawm ih gual tampi zawntek ni.

Billy Graham Crusade – Yangon Zomi Choir vai tawh kisai dotnop, kupnop, piaknop, hopihnop naneih leh:
1) Rev Khoi Lam Thang 09-4250-33037
2) Rev Dr Go Cin Zam 09-517-1312
3) Rev Dr David Suum 09-77-9999-095

Ih vai aman khit ciangin lai tawh hong zasak kik nungh. Pawipi ah hong kihel theilo Zomi teng in na omna muntak pan un thungetna tawh nong phawk na ding un muanna tawh hong cial ungh. Lungdam!

Vekpi tangin,
David Suum