Bible Sunday kici ngei napi Bible Day kici ta ~ Sia Khoi Lam

Bible Sunday kici ngei napi Bible Day kici ta ~ Sia Khoi Lam

Kawlgam ah Pawl namkim kigawmin August nipi thumna pen Bible Sunday ci-in thungetna, piakkhiatna le Lai Siangtho tawh kisai thupi taka kidemna, phatna la sakna tuamtuam a kizang den ahi hi.

Hun khat lai in, Anglican (Church of the Province of Myanmar) in November kha in tuam zat uh hi. Sunday i cih hangin SDA in kiginni (sabbath ni) in zang uh hi.

I kibat lohna tuamtuam a om hangin Lai Siangtho ah a kigawm Christian pawlpite in tua bang a Bible Sunday tuamzat ding sangin a kibang a zat ding hoih kisa zaw ahih manin ki vaihawm khawm a,

1. A beisa kum 20 khawng a kipan Anglican (Church of the Province of Myanmar) pawlpi in a tuamin zang nawn loin, August nipi thumna ah zang suakta hi.

2. SUNDAY icih ciangin Sabbath ni kikhawmte kihel lo zel ahih manin nipi ni bek hi lo, a thupi theithei a zat ding utna tawh BIBLE DAY kici hi. A huamkim ding deihna ahi hi. a nei tuam om lo ding deihna ahi hi. Min hanga thanemna a om loh ding deihna ahi hi.

3. Tu in pawlpi tampi (Kawlzang ah tam phadiak) Bible Day pen kal khat sung zang uh a, tatsat loin Lai Siangtho sim uh hi. Nitak sim kikhop bawl uh hi. (Zanitakin Kawlpi pan phone tawh hong kihopih a, Pyidawtha khua kiang Samit Kwin ah nipi ni nitak a kipanin Piancilna a lian khat pan pan ciatciat in Lai Siangtho sim hi, hong kici hi. BIBLE DAY kalkhat sung Kawlpi dungsuk ah a tawm pen pawlpi 20 bangin tatsat lo Lai Siangtho sim nei den hi.)

Lai Siangtho lo tawh leitungah bangmah KHO LO hi. BIBLE DAY pen Bible Society ading a bawl i hi kei a, ei ciat ading a bawl ihi hi. Lungdam, Khoi Lam