Biakpiakna Zia le Tong ~ Rev. Fr. Damian Dal

Biakpiakna Zia le Tong ~ Rev. Fr. Damian Dal

Topkhak Lasakna :: Biakpiakna mantakciang in, siampi pa ahih kei leh deacon pa in “Biakpiakna kiman zo hi lungnuam tak in napai un!” ci in, hongtangko hi. Latin lai in “Ite Missa Est” hi a, akhiatna in, “you are sent” cihna hi in, eipau in “Kuankhia in” ci-in, sawlna ahihi. “Kuankhia in!” cihciangin, biakpiakna kimanta a, biakpiakna pan nangah thupha, nazak Pasian kammal leh hong kipia abei theilo thupha te hawmkhia dingin kuankhia ta in cihna ahihi. Atomin, nangahsa nasansa thupha te huamkhia dingin sawlna ahihi.

Hih sawlna pen Pawlpi in “nang le kei” hongsawlna ahihi. Topa ading kuankhia in, Pasian hong itna, hong hehpihna, hong kamciam thupha te leh a tapa Jesu Topa hangin hong hotkhiat na thupha te akipan simzawhloh, genzawhloh nisim naisim hong kep, hongvak, hong ompihna thupha te mite tungah nagamtatna, nakampauna, nanuntakzia te leh, na nekzia, nadawnzia te tawh valakkhia in la, mite zong Topa itna sungah hongpai pihkik in, nang tawh akibangin, Topa mai ah biakpiakna hongpiak theihna’ng na vasem in ci in sawlna ahihi.

Pawlpi hongsawlna ahi “Kuankhia un” ahih kei leh “Biakna kiman zohi, lungnuamtak in napai un!” cih hongki tangko khitciangin, topkhakla ci-in, la kisa hi. Hih lasakna pen mitampi te in athupi lo dankhat in ngaihsun thei in, lasa lo in, galtai bangkeek in, nawhsa takin biakpiakna munpan taikhia henhan thei hi. Tua in akidamsak miphaksawm sungpan lungdam athei lo mihai kua te tawh akibang ahihi. Laisiangtho sungah,

Jesu tawh a kigamla munah ding uha, nakpi takin kiko-in, “Topa Jesu aw, kote hong hehpih in,” a ci uhhi. Jesu in amaute a muh ciangin, “Pai un la siampite va kivelsak un,” aci hi. Amaute ava pai uh ciangin lamkalah adam uhhi. Amaute sung panin a damlam akitheih ciangin khat hong lehtai kik a, nakpi takin Pasian aphat hi. (…) Tuaciangin Jesu hong paukhia a, “Mihing sawm kidamsak hilo ahihiam? Adang kuate koi lai-ah om ahi uhhiam? Banghangin hih gamdang mipa bek Pasian’ tungah lungdamna a ko dingin hong kileh ahi hiam?” aci hi. Tuaciangin Jesu in ama kiangah, “Tho inla ciah in. Na upna in nang hong damsak hi,” aci hi (Lk 17: 12-19).

Pasian in ama thupha lianpi hongpia in, Pawlpi in tua thupha te atangko ding, ahawmkhia dingin “Nang le Kei” hongsawl a, “Lungnuam takin thupha hawmkhia dingin napai un!” hongci hi. Topa phatlo in, Topa tungah pawlpi mite tawh awkikhat in pahtawina la salo in kua i om ngamding hiam? Tua ci omding kua in kilawm isa hiam? Biakpiakman ciangin topkhak lasakna in, Topa adingin Pawlpi hongsawl na bangleh Topa deihna bangin, kuankhia in kanungta dinghi, Topa ading na kasem tading hi ci in, ki-apna leh, thalakna ahihi.

Topa Jesu in anunung nitak annek na ah, an anekkhit (biakpiakna aman khit) ciangin, khedap bulh in, athungip zamin, nataipah vingveng lo hi. Anungzui pi te tawh Pasian phatna la nasakhawm in, Gethsemane huansungah athuakding gimnate leh, Pasian sawlbang in anuntakna apiakkhiat zawhna ding, a Pa Pasian hoihna te la tawh phat in, lungdam nako a, athuakding gimna khempeuh adingin, tha nala hi. Laisiangtho sungah:

Tua bangin an a nek laitakun, Jesu in anlum la-in lungdamna akohkhit ciangin balnen a, a nungzuite kiangah pia-in, “La unla ne un; hih pen ka pumpi ahihi,” aci hi. Tuaciangin hai la a, lungdamna akohkhit ciangin amaute tungah pia-in, “Na vekpi-un dawn un. Mi tampite’ mawhna a maina dingin a luangkhia, Pasian’ thuciamna a kipsak, ka sisan ahihi. Tua ciangin la khat sa uh a, Oliv Mual tungah a pai uhhi (Mt 26:26-28, 30).

Pawlpi in “Biakpiakna te ah, lasakna, phatna la, Salan late a kipan, lahoih lapha te tawh Topa pahtawi in lungdamko a, ama min leh ahoihna iphat ding pen, Laisiangtho leh Pawlpi sungah pa masa te akipan, akhangkhangin hongkizomsuk alianbel Siampi te honghilhna zong ahihi” ci in hong hilh hi (Vatican II, Sacrosanctum Concilium, 112). Biakpiakna le kikhopna te ah lahoih lapha sakna te ahoihsemsem nading leh akikhawmi khempeuh in awkikhat in Topa aphat theih semsem nadingun nakpitak in hanciam ding akisam mahmah ahihi (Vatican II, Sacrosanctum Concilium, 114). Damian Dal