Batsep Sem taktak , Thalawh Lawhcing

Thucin khat in, “Na lawhcin nopleh mi lawhcingte bang cih lawhcin aa,
mipilte bang acih uhleh pil uhhiam”,cih kan masa in cihi. Hih ciang a
tung mikhat bang a sepman abang cih manin lawhcing aa, mipil milian
suak uh cihte kikan khalo in amau thupitzia ki limgen zaw thei hi. Mi
thupi ahih nangun bang tanin hanciam, thalawh, tupna..cihte neih masa
cihthu ngaihsut huai hi.

Tukum 2015 Tan 10 All D ngah Zomi sungah mi 2 om hi. Tua te geel pen
numei tuak hi uh aa, tuate in Lia Niang Sian Tawi Lun leh Lia Cing
Deih Lun te ahi uhhi. Amau te nihin hih ciang a tunna dingun hun
bangzah, kum bangzah na thalawh khin uh aa, hanciamna lungtang bangtan
ngaihsutna nei cih ngaihsutpih huai hi. Hampha tak uh ei icih hangin
amau hanciamzah in ahanciam ding mi tam hetlo ding hihang.

Zomi sungah mihau in aminthang mahmah ngei khat ahi Pu En Kap kiangah
mikhat in tu-in nang hau mahmah cileng hampha tak cia acihleh Pu En
Kap in ka van puakpuakna ka Lu zang samkolh aa, van puakna
Hakkol/Kolhak bangzah siasak cih ki genzolo ding hi. Kei hanciam zahin
hanciam lecin kei sangin hauzaw ni uhteh cihsan hi kici hi. A beisa in
a hauhna dingun bangtanin Thalawh khin uh aa, bangzah gimna lungkhamna
na thuak khin ding uhhiam cihte ngaihsutpih huai hi. Amau thuakna leh
sepna tan tuakzo dingin i ki ngap hiam?

Greek mipil Socrates kiangah mikhat in nang bangin pilnuam in ci-in
dong hi. A tomin Socrates in tuisungah tua mipa phumsuk hi. Tua mipa
kiangah bang kisam na hiam acihleh Huih ci hi. Huih om keileh na bang
cidia acihleh si ding hi-ing cihi. Socrates in huih om keileh si ding
hi-ing na cihzah khat in, pilna ka neih keileh si zaw thamning ci-in
na hanciam mateng na pilzo kei ding hi cihsan hi. Ih pilnop mahmah
hangin ahanciam zah uh a hanciam ding mi haksa mahmah zel hi. Lai
Siangtho sungah Jesu in na seplo te anpia kei un acih tawh ki nai
peuhmah hi.

A lawh cing ding mite in hun tampi thalawh masa in, kum tampi na
batsep masa uhhi. Na i sep ciangin i sepma in sum pia khol cih om
ngeilo hi. Bat sep phot, thalawh masa phot in tua khitteh thaman ki
ngah pan bek hizel hi. Kei a ki panin ngahziau ding, sinlo semlopi in
a baihsa ngah ding cih a ngaihsun ki om kha ding hi. Tua bang tawh
bangmah nuntaak kai ngeilo ding na hizel hi.

Thu khat peuhpeuh i zak aleh a hoihlam vive in la masa photphot leng
thuhoih in hong zui ding na hihi. A hoihlam thu khat peuhpeuh Bat lak,
Bat sep, Thalawh masa photphot leng Thaman a pia ding Pasian in hong
manggilh hetlo ding cih ka phawksansan hi. Lungdam.

Thawn Tuang
Nashvile TN USA
June 11,2015
Ka laigelh tengteng>>www.zomi-angvaan.blogspot.com