Na nisim nasep hamsa nasalua hiam? Bangladesh gamsung ah tuinin paikhiatna hawkguam ahahsiangpa “Sewer Cleaner” ii nasep pen leitung ah nasep aki deihlo penpente lakah kihel hi.
Tuapa nasepna pen Bangladesh, Dhaka City Corporation ah asem hi a, tuinin leh ektui te aluankhiatna hawkguam te aki khakcip ciangin apuahsakzel khat ahihi.
Akhangtosa gamte bangin Safety Equipment bangmah neiseselo a, akhutguak mahtawh hawkguamsung, dumsung ah tuaksuk in, Pipe ki khakcip, ki hucip te apuahzel khat ahihi.
Dhaka khuapisung tuinin luankhiatna tepen awkcip, kikhakcip pahpah a, tuabang aom ciangin guatawn khattawh holhkawikawi in, akisapleh guaktang in tuaksuk in holhkhia cihi.
Maituam “Mask” cihbang peuhmah zangvetlo ahih manin tuinin tui uih te panin aki khahkhia “Poisonous Fumes” kici te’n khuutgawp thei sawnsawn hi.
Bangladesh ii khuapi ahi Dhaka City ah mimal aom Population pne 14 Million khengvalkhin hi. Abeisa asawtnailo hunsung in guihtui tamlua in tuikhangthei a, tuiluan khiatna Drainage System tepen ginalo ahih manin tuinin te awkcipthei hi.
Hihbang nasep asemte sungpan in asi aliam tammahmah cih kizaza himahleh hihbang nasep asem “Sewer Cleaner” tepen Safety Equipment bangmah ki vaihawmsak tuanlo a, guaktangphial mahin tuaksukziau in ki semsak cih Daily Mail pan kiza hi.
Tuhunciang gamkhangto te’n gamzawng te nasepzia hong kihsak, hong neumuhsak uh hangin amauzong hunkhatlai in hihbangin asep hun uh omngei ngel khamahding hiven mate.
Zogam ah ekbuk sungah nai “Watch” kiasak in, atawmkik cihkhawngzong ki omlelngel hiven mate. Tuahunlai in Camera zong kinei khollo, kuama’n hong muhpih kikkik khollo hikeileh 🙂 ZD Sawltak #zomidaily
Comment piaknop aomleh...