Banghangin Pasian in Coronavirus phalhiam? ~ Thang Pau

Banghangin Pasian in Coronavirus phalhiam? ~ Thang Pau

Mihingte in siatna i tuah simin banghangin Pasian in hih bang hong thuaksak hiam cih dotna taanglai pek panin kinei den hi. Pasian in na khempeuh piangsak a, amau leh amau dan a nei tek dingin bawl hi (Piancilna 1).

Siatna lianpite zong tua nate’ dan hang hithei hi. Huihpi, Pimpei, Tuikhang cihte khuahunte lampialna hang ahi hi. Zinling zong leitung kipei dan a manlohna hang hi a, tsunami i cih zong tuipi nuai zinlinna hang ahi hi.

Lai Siangtho sungah Jesuh in vantung leh leitung aom na khempeuh uk hi (Kolose 1:16-17). Tua ahih leh Pasian in siatna lianpite dal zo lo hiam? Khuahunte tungah thunei lo hiam? Thunei lua hi.

Thuhilhkikna 11:17, James 5:7, Gamlak vakna 16:30-34, hih Lai Siangtho munte sim lehang’ khatveivei Pasian in mawhna thukhen na dingin siatna lianpi na tungsak hi. Mangmuhna laibu a lian 6,8 leh 16 na sungah puul natna a kipan siatna lianpite kimu thei hi. Tua ahih leh siatna lianpi khempeuh Pasian’ thuhilhna a hiam? Hi khin lo hi.

Mi gilote’n a sia a bawl dinguh Pasian in phal hi. Piansak nate zong mawhna hangin siatna a thuak dingin phal hi. Ahi zongin lametna omlai hi. Pasian’ bawlsate, nikhat ni ciangin muattheih nading thu panin suakta-in Pasian’ tate tawh a nuam suahtakna a ngahkhawm ding uh hi. Tuhun ciang dong Pasian’ bawlsa khempeuh nupi nausuak ding bangin na sa-in a tauna uh i thei hi. Rom 8:19-22.

Siatna lianpi banghangin piang hiam cih i tel ta hi. Pasian in banghangin hihte phal hiam cih i tel zo kei hi. Asia gamah tsunami tuihualpi hangin mi teng 2 leh tul 25 val in banghang’ sihna thuak hiam? Banghangin Pasian in zinling, gamkang, pimpei leh siatna tuamtuam hangin mi tampi sih ding phal hiam?

Hih thute i lungngaih laitakin i nuntakna sungah lungnopna ahong pia thei thu khat bek a om hi. Tua in nuntak tawntungna ahi hi. Tua bang siatna lianpi a bei ciangin mite in biakinn hong zuan ding uha, hih i leitung nuntakna a bei ziau thei ahih lam hong tel ding uh hi.

Eite in Pasian hoih hi ci’n i tel hi. Siatna lianpi i tuah laitak nangawn nakpi takin i kiko leh Pasian’ nalamdang lianpite i mu ding hi. Siatna lianpi-in mi tampite a nuntakna uh kikheelsak hi.

A thuak khate tungah tapidawte in Khazih sungah upna taktak a neih theih na dingin thugenpihna, thapiakna, thungetsakna leh huhna tuamtuam i sep ding phawk gige hi. Pasian in na lianpi hong sem ding hi. Thang Pau