Banghang US gamah Zomi Pawlpi te kitam denhiam

Banghang US gamah Zomi Pawlpi te kitam denhiam

US gam pen vangam zom ah anuam mahmah gam cinapi hang in Zomi te kum ongthak sial in pawlpi kitam, Pawlpi vai buai hiden ihihman in iki itna iminamsung tampinongsukha hi. Tua ahihman in mailam ah Pawlpi kitapna atawmzawk ding deihna tawh hih thu onggelh mai ing.

Kei pen thuthei pen leh pilna siamna anei zong kahikei a ahizong in kum-10 kiim bang Pawl pi Upa cihte ah na kihel in Pawlpi zong nihvei aphut pawl ah nakihelkha ngei kahihna tawh Pawl kitapna atawm abeitheih nading in kamuhzia onggelh hizaw ing.

Pawl pi icihciang in upna-doctrine lam hilozaw in US gam a Zomi Pawlpi te atangpi a kilamzia onggen nuammasa ing. Tal guai liang in ngaihsun in talkolh zen in ikankan a, Greek in tuaci, Hebru in tuaci icici zong in USA ah Zomi te Pawlpi pen nampi-3 in kikhen thei hi.

• 1. Thu um mi pawl khat kipawlkhawm a kiphut pawlpi
• 2. Sia khat Pasian in vision pia a aphuhkhiat pawlpi
• 3. Abawng bawng akhuakhua a behbeh akiphutkhia pawlpi

cih bang in namthum in kikhen thei hi.

Pawlpi kitap theihna atangpi in anuai a bang hipha diak hi.

• 1. Upa te leh Sia te thunei nuam kituh
• 2. Pawlpi sung ah khuapai behpai tanau pai lua in kideidanna om
• 3. Pawlpi nungluut pawlkhat founder te sang thunei nuamzaw founder pawllah nadual tuanlo

Tua ahih man in thunung thuma ah buaina atawm theih pen nading in hih anuai a thu te Sia te leh pawlpi luutding te ahizong in Zomi ten hoihtak ngaihsut masak ding kisam kasa mahmah hi.

Thu um mite phuh pawlpi

Thu um mi kipawlkhawm a kiphut pawlpi pen atamzaw Sia kihello a kiphut pawlpi ahihman in Upa thuneihna zong kici thei hi. Hibang pawlpi te in itheih ding in Sia i cialciang Sia pillua eisang pilzaw ithu ongzui zolo ding te cialkei leng kilemna omzaw pek hi.

Tua mah bang in hibang pawlpi ten Sia ding in ongcial leh athu thu uh mangzo ning amau tawh nasemkhawmthei mah ning nakicih leh bek sem inla, nang ma thu nazatnop sawm veve leh lah thungen in ki ap inla nadeihdan lian in Pawlpi kipan zaw in.

Pastor pa phuh pawlpi

Hih pen ol mahmah apaizia zong Laisiangtho tawh kigenteh thei zawtham pek hi. Sia pa sawl bangbang semding acih bangbang semding thumangding, Siapa panpih in huhtawntung zoding nacih leh luutpan inla nang thu zangnuam zel Sia te peuh hawmthawhding nahih leh nang le nang in pawlpi kipan zaw lel in.

Abawngbawng akhuakhua, abehbeh a kiphut pawlpi

Tua khua ten thunei lua tua khua te tamlua tua beh te tamlua nacihnop ding a nalung aleen ngapding leh hibang pawlpi te ah luut vetken Sia zong vasem vetkei zaw in amau athunei nuam mah atamding mah a agel uh ahihi.

Atawpna ah Zomi pawlpi te sung ah akiza mun mahmah pen ki founder sak cih ahihi. Ataktak in a founder te pen a founder mah hipah uh ahihman in hikei teh vacihtheih omlo a ei a founder lopawl founder te sang thu ineihnop teh akibuai nahizaw hi. Founder icih ten sum le paai tha le ngal pilna siamna gensiatna tampi tak nathuak uh ahihman in credit bel piaktak veve hi. Kithuneisak ci a ikhasiat nop ding leh eizong kuama kiang ah luut selo in pawlpi kipan ziau leng a founder hipah hihang.

Hih atung a thu bilbial teng hoihtak ngaihsun masalo in Sia vasem, Pawl valuut ihihman in buaina apiang zelzel ahihi. Mi inn sung khat ah vahang kalkal leng bel kuan ongdawm mah dia maw…

Mihing a ongbawl masa leh ongnei pen Pasian hi a Adam le Eve hi. Tua ban siah mihing khat apian nading in Pasian in akhut tawh ongbawl nawnlo in Numei le Pasal nazang hi. Tua mah bang in Pawlpi founder masa leh anei pen Zeisu hi a ahizong in pawlpi tampi ongpian theihnading in Zeisu ongvak kawikawi in pawlpi ongphut nawnlo a mihing te mah founder ding in ongzang toto hi.

Mihing te abawl Pasian hilel ee aneituam omkei ci a utbang in igamtat theihloh mah bang in Pawlpi khempeuh Founder Zeisu hi kuamah tawh kisai kei vacih phialphial theih omsamloding hi.

Athu pi pen ah Pawlpi khempeuh leh Pawlpi mi khempeuh in Zeisu alianpen ah ikoihding ahihi. *A ut peuh in suakta tak in comment/share thei hi. Kuama Pawlpi mimal genna hilo hi* Thang Khawm Pauzomi