Bang i ci gamtat dinghiam? ~ Tual Khan Suan

Bang i ci gamtat dinghiam? ~ Tual Khan Suan

“Khan kilam dang, pian kilam dang, Bang i ci gamtat ding hiam?” A lui khempeuh i pai pah diam, A thak khempeuh i pom pah diam?” By Sukte T. Hau Go – Leitung huihnun zia (trend) kikhelna hangin i nuntakna sungah i gamtat zia, i nek zonzia, i kikholhzia ( kholkhop zia) leh i ngeina te ki lamdang toto hi. A hoihlo, a kilawmlo ngeina, paizia pan a hoih zaw ngeina, paizia ah a kilaih a om bangin, ngeina hoih leh paizia hoih pan in a hoihlo ngeina, paizia ah a kilaih tampi tak mah om hi.

Tua kikhelna/ kilaihna tampi te hangin i minam ngeina mangthang ding cih lau in i langpan tentan diam? A hih kei leh, tua bang kikhelna te pen khantohna leh tulai dan ( modernism) hi ci’n i sang pah zaw diam? Khan ki lamdang, pian kilam dang hi.

Lai neilo Zomi te khat leh khat lai kikhak in thu i kiza ziauziau thei hi. Laisim theilo Zomi te laisiam leh mipil i om hi. Minam dang sang naupang a om Zomi te’n nam dang te tungah sangsia i sem hi. Khuang leh zam bek tum a lasa Zomi te’n Guitar, Drum, piano leh tum theih tuamtuam tawh la i sa thei hi. Bi inn nuai sunga teng Zomi te’n taih inn i nei hi. Mawtaw mu ngeilo Zomi te’n mawtaw i nei hi.Inn sung/ khua sung khat bek a thu piang thei Zomi te’n leitung bup a thupiang second kihallo in i thei hi. A meii dawn a om Zomi te a lu dawn ah i om hi.Khan kilam dang, pian kilam dang!

Gal beng sa beng, gal ai sa ai a om Zomi te’n kilemna deih in i zong hi. Pianpih sanggam melma a kinei a phuba kila Zomi te mawh kimai sak in an kuang i um khawm liliai hi. Khual mi, zin leh lengla deihlo Zomi te zi leh pasal in ki nei in innkuan khat sungah i om khawm hi. Zu kham sa kham a lam Zomi te Pasian thu kham in i lam hi. Khan kilam dang, pian kilam dang!

Lokhawh, singpuak bek tawh annek ding zong Zomi te’n khua-ul luang lo in buh leh bal i ne hi.Dangka san pek khat na ngawn a mu ngeilo Zomi te’n kham leh suang manpha tawh sum i bawl hi. A khum a al ne ngeilo Zomi te’n bawng nawi leh khuaizu kham in i om hi. Khual kai ( khual zin) khia ngeilo Zomi te tuipi gal dong i tung hi. Khan kilam dang, pian kilam dang!

Innkuan khat sungah mo nih leh thum a kemkhawm thei Zomi te zi nei ma in inn i tuan hi. Nu leh pa zahtak leh thu mang Zomi te zi te hangin nu leh pa tawh inn kikhen khia hi. Zi te it man a nu leh pa, pianpih sanggam tawh kilem ding hanciam Zomi te’n nu leh pa leh sanggam te i toto hi.Sum leh pai a muh uh teh nu leh pa a ap masa Zomi te’n zi neih khit teh nu leh pa khut sungah bang mah tung nawnlo hi.

Nu leh pa thu nial ngeilo Zomi te’n zi neih khit teh nu leh pa thu mang nawnlo uh hi. Zing thoh ciang in nu leh pa zahtakna tawh a hopih masa Zomi te’n a zi te uh hopih masa uhhi. Nu leh pa thu dot a nei Zomi te’n Zite thu dot in i nei hi. Khan kilam dang, pian kilam dang!

Pasal te muang a bel mothak Zomi te’n pasal te thu i nial hi. Pasal te deihna a dong masa Zomi te’n ei deihna pasal te kiang i gen masa zaw hi. Pasal te nasep a huh Zomi te’n ei nasep hong huh ding i gen zaw hi. A kilem innkuan nuam sunga om Zomi te, ei i om teh kilemlohna om hi. Apuah ding a kuan Zomi te’n i siasak zaw hi. “ Ka nu leh pa” a ci Zomi te’n “ ka teekte” i ci hi. A mau a ding a kuan Zomi te’n ei a ding i suak sak hi. Khan kilam dang, pian kilam dang!

Zawl kihel a ngeina zui a zuthawl kipiakna tawh kipi, kila Zomi te i zawl tai hi. Zawlta deih lo, sim mawh Zomi te’n zawlta i nei hi. Numei te ang sawk man sialpi khat kiliau sak/ kigam Zomi te a mawkna in i kipia hi. Mi tanu te siatsak man/ zawl gai man ( zawl lei kici) sialpi kua ki liausak Zomi te kam khum tawh niangtui sai ah i kimai sak hi. Biak inn sungah numei pasal tutna kikhen dimdiam Zomi te i tu khawm ngeingai hi.

Lawm kingai mahmah te mitmei hek bek tawh thu kigen kiaukiau Zomi te khut leh khe tawh i holim hi. Nungak leh tangval a kikhen thei sinsen Zomi te nupi leh nungak, tangval leh papi kikhen thei nawnlo hi. Kiten ma huna om khop ding a ut lo Zomi te i ki malep hi. Ngeina zui a kiten khit ciang bek a lupna khat kitaang Zomi te, living together in i om khawm hi. Zi khat, pasal khat tawh a tul Zomi te angkawm in i lungleng hi. Khan kilam dang, pian kilam dang!

Nu leh pa hilhna tawh a gamta Zomi te’n nu leh pa i sim mawh bawl hi. Nu leh pa thugen a zui Zomi te’n nu leh pa i thuhilh hi. Nu leh pa tawh an nekhawm Zomi te’n nu leh pa om loh teh an i zong khualkhual hi. Nu leh pa tungah thupha a bawl Zomi te’n nu leh pa i samsia hi. Khan kilam dang, pian kilam dang!! Tual Khan Suan