Azenzen in nikhat ni hong lemkei leh ~ Peter Suumpi

Azenzen in nikhat ni hong lemkei leh ~ Peter Suumpi

Tuhun ciangin… Ih inn te hong gol semsem hi. Ahihang innkuan pen hong tawm semsem hi. Silh le ten, nek le dawn te hong lemtang semsem hi. Ahihang hun-awng te hong tawm semsem hi. Pilna laitan te hong sang semsem hi. Ahihang ciimna hong tawm semsem hi.

Thutheih pilna hong khang semsem hi. Ahihang ngaihsut khinkhiana hong tawm semsem hi. Mipil hong tam semsem hi. Ahihang buaina hong tam semsem hi. Zatui lam pilna hong khangto semsem hi. Ahihang natna namkim hong tam semsem hi. Sum mawkzatna hong tam semsem hi. Ahihang in gualnuam aa nuihkhopna lenglengna hong tawm semsem hi.

Lampi te hoih in mawtaw hong manlan mah bangin kihehsuah ding zong hong manlang mahmah hi. Zan luphak mahmah hang in laisim hun hong tawm semsem hi. Paulap hong tam semsem in kampau kidop hong tawm semsem hi. Neihsa ki hau semsem in manphatna hong kiam semsem hi. Tam pipi kigen in ahihang in deihsakna tawh nasep hong tawm semsem hi.

Inn te asang theithei in kilam semsem aa ahihang aniam semsem lak ah EQ zong kihel hi. Highway lampi te azai semsem ding in kilam aa ahihang in khua muhna te hong tawi semsem hi. Khapi tung ah mihing te kitung zo aa ahihang in inn veng te tawh aki ho ngello zong ki om hi. Leitung vantung khempeuh zong a uk ngap vive, ahihang ei ii lungsim aki ukzo kitawm semsem hi.

Lai tam pipi ih gelh hi. Ahihang sinna te hong tawm semsem hi. Vaihawmna ih hau semsem aa ma ihtut tawm semsem hi. Vai tam theithei in ih sem aa ahihang in kingak cih pen ih lungduai zo kei semsem hi.

Ih khasum te hong tam semsem aa ahihang in gamtatna te hong sia tektek hi. Computer te hong kibawl hi. Thuthang tuamtuam te kisim thei hi. Copy kibawl thei hi. Ahihang in khat le khat kiho khop cih te hong tawm semsem hi. Atam in kitam semsem aa ahihang in ataktak ki tawm semsem hi.

Tuhun pen… Ready made an hong tam semsem in gilpuak hun… Apumpi golpi pha napi’n lungsim gina neilo mi atam hun… Tawlngakna mun kibawl tam semsem napi’n tawldamna taktak atawm hun… Nek theih tam semsem napi’n malnutrition hun… Numei zonsa, pasal zonsa cih sum lutna mun nih om in nupa kikhen hun… Taih inn golpi etlawm napi’n asung ah innkuan sung kisia atam hun…

Tuhun pen na khat peuhpeuh na sep ding ciang in ani teltel se kei in cih ngaihsutna hong pia nuam ing. Ahang pen na nuntakna hun sung khempeuh pen nang aa ding ni manpha vive hi.

Lai tam pipi sim in. Thu theihna sulzuih in. Na innmai ah pai inla leitung ii hoihna khuadak inla gal et in. Na innkuanpi te le na lawm te aading nidang sang hun tam piazaw in. Na duh an te ne in. Na pai nopna mun ah zong pai in.

Nuntakna pen nuntak bek ding hilo in lungnopna tawh gawm ding ahihi. Na kep khinkhian wine dawnna hai te lakhia in. Na perfume te kepcip ding ngaihsun kei in. Na zatnop hunhun in zang lel in.

“Nikhat ni ciang”, “Khatvei teitei ciang” cih kammal te nang ii tongdot sung pan hemkhia in. Nikhat ni ciang gelh ning na cih lai tun gelh pah in. Na innkuanpih te tung bang zah in hong it ing cih tun gen in.

Nang hong lungnuam sak thei ding, hong maitak sak thei ding nasep te ziakai lo in tu in sem in. Nikhat, nai khat, second khat ciat te pen alamdang athupi vive ahi hi. Bang ni bang hun pen ei ii ni tawpna cih ii theih kholh loh pi ee… Peter Suumpi/ Sun Yueh (Taiwan limlak siam)