‘Awlmawh loh’ pilna ~ Peter Suumpi

‘Awlmawh loh’ pilna ~ Peter Suumpi

American gam, California aa tuikulh tung khat ah American Eagel akici muvanlai nam khat om hi. Tua muvanlai te pen mipawl khatin man tampi pia in lei uh ahihman in tualai aa khua mite in man ngeingai uh hi. Hibang tawh damdam in tua tuikulh tungah tua muvanlai namte hong tawm semsem hi. Atawpna ah mu akici limlim aliim amel in kimu zo nawnlo ahihman in mite in leitung ah tuadan mute bei siangta (cimang ta) hi ci in um uh hi.

American muvanlai ih cih pen akoi cidan vasa nam hiam? Akhancin’ khin muvanlai khat ii gihna 20 kg bang gikin akha zaak leh 3 meter ciang bang asau vasa nam ahihi. American muvanlai in vantung pan thakhat in kikhawh sukin tuisung aa saham khat ciangciang pen alno takin aman zo vasa nam ahihi. Hibang dan vasa te cimang ta ahihman in mite in pammaih sa in kisik mahmah uh hi.

American muvanlai te hi leitung ah cikmah in kimu ngei nawn kenteh akicih laitak in hidan vasa namte akantel khat ahi American minam ahi Steve Ogle akici pa in S-America aa om Andes mual dung aa om kuahawm sung khat ah tua vasate hong mu hi. Azai mahmah tuipi tungah agamta tua muvanlai te hibang aa akuaciik kuahawm sungah om unteh cih pen kuaman ummawh kha ngei lo hi.

Tua kuahawm te ii sung lam pen aguh gimgem in suangte tawh akidim lam Steve Olge in aphawk kha hi. Tua kawhawm ii anawlte khat le khat 0.5’ bek kihal hi. Akawcik pen mun ahih leh anawl le anawl akimat phial hi. Mun khatkhat ah suangte pen temmai bangin pekin ahiamna mun le siktawn bangin azumna mun zong aom hi. Hibang kua vang sungah amau bang aa apum gol ci ken kawlgit nangawng zong anuntak zawh ding baihlo kha ding hi. American muvanlai te bang ci nuntak cihpen mipilte in akhuak uh tawh ngaihsun zolo uh hi.

Steve in van pawlkhat zangin tua kawhawm sung aa muvanlai khat hong man hi. Tua pan sikling tawh akibawl bukhat sung ah apiakhiat nading 0.5’ azai khat hong bawl hi. Hih vasate hih avangneu sung pan koi ci pusuah uh ahitam cih a entel hi.

Muvanlai pen tua abubawl sungah akhum hi. Asawtlo in tua avang neupang hong lengkhia hi. Manglang lua ahihman in koi ci lengkhiat cih kimu manlo hi. Ahihang Steve in a vedio record napan damdam in paisak in (slow motion) tawh a en kik hi.

Avangneuno sungpan hong pusuah laitak in tawmvei sungin muvanlai in akhate gel agil ah abelhsak hi. Akhete gel pen apumtawh kizui in mamsak hi. Alu le angawng pen amei tawh kitang sak in agol mahmah apumpi pen khauzang bangin nem sak hi. Mihing te ngaihsut ngeiloh zah in ama hihdan pen ol mahmah leh kilawm hi.

Tua muvanlai tawh kisai Steve in a etcik lai in apumpi tungah abawk apawn pawlkhat amu hi. Tua abawk apawnte pen suang tawh akitat zoding zahin khauh hi. Hun khat lai aa mite matna pan asuahtak nading un muvanlai te in kuahawm sungah kibu uh hi. Kuahawm sungah anuntak theih nading in avangneu kuahawm sung pan alengkhiat theih nadingin agol mahmah apumpi uh kikui kek gawpin nungta uh hi. Apumpi uh ciangtawn bangin amam theih nading in tua kuahawm sungah kisin uh hi.

Mihingte matna pan kamsiatna tawh akipelh zolo American muvanlai te ahi uh hi. Avang neu akawciik kuahawm te amau khel thei lo uh hi. Ahihang in amau le amau kikhel in nuntak nading hamciam uh hi.

Mihing in ih piankhiat khit ciang eite zong dingtang theilo, awnkheikhai zah dongin ihkiim ihpam pan haksatna in hong tuam thei hi. Tua haksatna namkim te kantan in ih nuntak theih nading in American muvanlai te bangin ih hanciam ding hi. Ih pumpi aneu theih zapen in neusak in atangzai pen in ih nungta ding hi.

Ih pumpi ih neusak zawh nading pen baihlo hi. Liamna baina zong om ding hi. Khitui luan hun zong om ding hi. Ahihangin tua haksatna te athuakzo te in avangneu pan kantan zo in azai mahmah vangtung amu ding uh hi.

Ih pianna khua, ih nu ih pa le ih innkuan te eitel theih hilo hi. Ahisa ih nuntakna pen eikhel theih hilo hi. Bangzah aa haksatna te bangzah vei ciang thuak ding cihpen en theih kholh theih hilo hi. Tua ahihman in abeisa aa thu te khempeuh hamsiat siat mawhsak sak tuan se lo in sangsiam in ei le ei ih kimai sak ding ahi hi. Ahihang mailam aa hong tung ding thu te ei tel theih ahi hi. Lam khatpan cileng ih kitukna pan ih thawhtoh kik ding pen ei teltheih ahi hi.

Ih gen bangin nuntak ding olkei ci in pawl khat in gen hi. Ahihang ih pumpi ihkihek ding ih dingtan ding haksa lo hi. Athuman lam tawh buaina te siangsak ding hi hang. Athuman lam ihcihpen bang hiam? Ih kituk hunciang “hong thokik sak, hong kituk sak nawnlo” thu ahi hi.

Hibang hunciang ei hih theih thu nih om hi. ‘Mangngilh bawlna’ le ‘awlmawh lohna’ cih ahi hi.

Kum 20 na cinma in ‘awlmawh lohna’ na hihthei ding hi. Awlmawh lohna nakisin ding hi. Awlmawh lohna pen hai gamtatna hilo in nuntak nading lampi ahi hi. Adiakdiak in thanem hun, kilepam haksat hun ciang nang le nang nakidal zawh nailoh laitak aa zat ding ahi hi.

Azenzen in nang nazawn laitak ahihleh midangte hong zahpihna te awlmawh loh kisin in. Azenzen in mi te pian bang in apiang na hihleh midangte hong neu muhna, nang tung ah zawhtawhna te awlmawh loh kisin ding hiteh. Azenzen in na innkuan pih te in bangmah hong guanzo lo ahihleh aguan zo mi te ii vante a englo bangin awlmawh loh kisin ding hiteh.

Awlmawh lohna pen maisakna namkhat ahi hi. Ei aa ding in suahtakna namkhat zong ahi hi. Awlmawh lohna in ih vangik pawlkhat hong zangsak tuam hi. Ol tak in hong nungta sak hi. Ih sepnop ih lunglutte hong semthei sak hi. Haksatna te awlmawh lohna in ei le ei tha kiguan tawh ih kibang hi.

Awlmawh lohna pen thakidimna lah hi in ei hong nen vangik pawlkhat zong suahkhiatna tawh kibang hi. Ih ngah khakloh thu te ih awlmawh lohna pen ei aa ding adang hamphatna khat ih ngahna tawh kibang hi.

Adang khat pen ‘mangngilh bawlna’ ahi hi. Ih maisak zawhloh thu te mangngilhna pen ei aa ding in a ol pen lungnop ngahna khat ahi hi. Akhial tawh kipatna ih mangngilh bawlna pen aman tawh ih tawp nading ahi hi. Hun khat lai aa haivai tak aa ihteelna khat pen ih mangngilh bawlna in nidang ciang tua thu hoihtak ih ngah theih nading ahi hi.

Ataktak in nuntakna sungah awlmawh lohna le mangngilh bawlna pen ih awmsung aa akhalte, hong nencipte hong damsak thei zatui hoih khat ahi hi. Lungsim daihna hong pia thei hi. Awlmawh lohna le mangngilh bawlna pen hai gamtatna hilo hi. Ih tupna ih sawmna ih tun nading ih lampi te ah tha hong pia thei hi. Peter Suumpi