Awle khat ii khitui ~ Peter Suumpi

Awle khat ii khitui ~ Peter Suumpi

Kei pen akap theilo hong kici hi. Akhitui te zong abawltawm hi hong kici hi. Ko pen S. America gammangtu lak ah gamta in ka nungta uh hi. Kei pen athahat awle khat ka hi hi. Bang hang kap zenzen ding ka hia.

Khuazing sung pan atawntung in ka khanglo laklak hi. Nitak sim a ka mat ka mang sung pan in ka khanglo khia hi. Ka mang sung ah kei pen tha neilo khat bang in ka om hi. Ka mit te zeu hi. Ka khut ka khe te zaw hi.

Kei ka suah khit asawtlo in ka nu tawh lui gei teng ah ka bawhvak uh hi. Tua hun pen zingsang hi cih bel tel sinsen ingh. Nitang in tui akap ciang in ka pum tung uh ah khuavang in hong leng selhselh hi. Adai khipkhep kimlepan pen nuam ka sa mahmah hi.

Kei pen ka nu ii ta neu pen ka hi hi. Ka nu in kei an hong pia hi. Mun tuamtuam ah hong vakpih sam hang in ka nu pen khat vei zong nui ngei lo hi. Khat veivei amittang en leng maitai mahmah hi. Et lawm mahmah hi. Ahihang hi te pen tawm vei sung in hong bei kik pahpah hi. “Hi leitung ah athanem te pen athahat te in an in nei ding uh aa athahat te nungta ding cih thu khat om hi.” ci in ka nu in hong gen hi.

Tua ahihman in kua mah thanem theilo ding hong ci hi.

Tua ni zingsang ko hong kisimh hi. Luikawi khat pan in ka nu in na paisuak in ci in hong sawl hi. Ka nu thumang in ka taisuak hi. Ka nu in gal te hong nawh sak hi. Suang tawh ka kitatna in ka awmvun te dulh mang khin hi. Tawmvei khawl in ka nu ka leh et kik hi. Ka nu leh tai ding a kithawi ka mu hi. Kei zong abang ci ahitam ci in ka tel kei hi. Ki leh kik in ka nu ka nung delh hi.

Tha khat thu in ka kawng pan hong ki pet vat hi. Ahiam mahmah ha te in a ngek mahmah ka vun te hong pek hi. Kei zong ka ki tom hi. Ka mei tawh tui ka sat gawp hi. Ka nu in kei hong nung leh et kik hi. Ka nu mittang te kiktak huai hi. Ka nu hong gen ngei kammal khat ka phawk kik vat hi. Ko awle te dan ah ei nuntak nading ahi leh ih ta te luang zong ki pia ngam cih … Ka mit sung pan mit tui te hong luang khia hi. Nu … nu …

Hih gammangtu lak sung ah athahat pen lak ah sahang te zong kihel hi. Amau pen gamtat luhek hi khiankhian in aha te uh zong hiam mahmah hi. Zingsang lam in amau an zong uh hi. Khat veivei ciang in awle khat pen amau ii zingan manpha hi thei zel hi.

Kei hong man sahang pen sahang pi khat ahi hi. Kei ka lau kei hi. Ka nu in hong nusia in hong taisan khit nua ah bang mah lau ka nei nawn kei hi. Kei pen sahang no khat ii mai ah sahang pi in hong khia hi. Sahang pi pen thupi ka sa hi. Ka nu in zong kei hidan in an hong pia ngei hi. Ahihang hi dan in ki piak hiathiat cih om ngeilo hi.

Ano pen alei tawh liak in ngekbawl tak in zingan ne ding in sahangpi in hong sam hi. Sahangno pen kei lam ah hong kihel phei hi. Atal ah kil giat anei ni tawh akibang apawl bialbual khat om hi. Sahangno in kei hong neh in kei hong en hi. Ka lungsim sung ah “ne in … ne in … ahampha mahmah hiteh. Nang hibang aa hong it nu na neih. Ken hibang nu ngeilo hing. Sileng kei aa in hoih zaw lai” ci in ka ngaihsun hi.

Sahangno in kei hong en in tua khit ciang api kiang hong dong hi. “Hizah aa neu lai … api kawh om ahia nu?”

Tua bang acih kawmkawm in sahangno in kei thakhat in tuisung ah hong lonphei vat hi. Api tung ah akitat kawm in tui ii taih kei hong gal et hi.

Ka nu kiang ah ka ciah kik kei hi.Tui dung zuisuk in mun dang khat ah ka nunta hi. Tua lai pan ka khankhia hi. Kei le kei in an ka zong hi. Ahihang mangsia ka man den hi. Ka mang pen ka nu in sahang an ding aa hong nusiat pen mah hiden hi. Ka mang akipat tung lam pen hoih napi’n atawpna lam ciang mulkim huai mang hong suak den hi. Ka mangsung pan ka khanlawh sim in kei le kei kidong deng in bang hang in awle hi sese ka hia leh…

Ka picing semsem hi. Ka vun te khauh in ka mittang te ciim mahmah ta hi. Hih luigei ah kei kumpi khat bang in ka om hi. Ta zong hon khat ka nei hi. Nu hoih khat ka hih nading ka hanciam hi. Ka ta te ka it hi. Amau te gamsa te gal pan ka dal hi. Kei bek suah tak nading bek in kitom ngeilo ding hing.

Awle nupi hoih mahmah khat om ci in ka omna gamlak teng ah thunamtui kizel hi. Ka ta te hihthu aading in kipak in angtang mahmah uh hi.

Ni khat ka mang pan ka khanlawh leh asan hemham meivang ka mu hi. Naupang te phong in mun dang ka tai uh hi. Hih lai mun asawtlo in vut le vai suak ding hi. Km 20 kim bang gam hong kang in kisia cip hi.

Asawt simpian khat ka pai khit uh ciangin nidang aa ka nu te tawh ka omna mun uh ka tung kik hi. Tua lai ah an haksa hi. Ganhing dang te zong hisang agamla zaw mun ah tai mang khin ta uh hi. Anungta ganhing ka muhloh ni nih bang pha ta hi.

Zingsang khat ka ta neupen tawh an zong ding in gam ka vak khia uh hi. Kamsiatna tawh ka mai ah sahang khat ii ka ta hong pehsak hi. Kei zong nawhtai in ka ta honkhia ding in ka hanciam hi.

Nehphei in tua sahang ka meitawh deihtak vat ding ka cih laitak in tua sahang ii tal ah kil giat anei abem khat ka mu hi. Amah pen gawng mahmah hi. Agil zong thep dikdek hi. An anek loh sawt tuak mahmah hi. Azenzen in an ne kei leh si zo phial in ka um hi. Ken ta tampi nei lel hi veng. Hi sahang om kei leh kei zong tu ni hi ciang tung zolo ding hing.

Sawtvei pi ka lungngai hi.

Atawpna ah ka lehtai kik hi. Agal pan ka leh-etkik kha hi. Ka mit te mang in hoih tak kimu thei nawnlo hi … ka mit ah khitui kidim khinta hi ven… Lailet: Peter Suumpi (Zingsol)