Australia ah sangnaupang numei khat ii aphei tungpan Phone puakkham

Australia ah sangnaupang numei khat ii aphei tungpan Phone puakkham

Melbourne Schoolgirl khat ii aphei tungah Mobile Phone khat puakkham ahih manin aphei meikang in liam cih Yahoo News pan kiza hi. Tua numeinu pen sanginn lam zuanin mawtaw tawh apai laitak hi a, Mobile Phone pen aphei tungah akoih apuakkham cihi.

Tua numeino pen Australia, Victoria State sung aom Oxley College ah sang akahkhat hi a, kum 15 aphakhin khat ahihi. Anuno in mawtaw hawlin amahpen Passenger Seat ah atu hi a, lampi ah apailaitak in aphei tungah akoih Samsung Galaxy S4 pen kiphit in puakkham cimawk hi.

Apuakkhap khitciangin Phone pen kiphelkhap in mawtaw sungah kithehthang gawp ci’n numeino ii Aunt Courtney Handley in genkhia hi.

Sangnaupangnu ii genna ah ka phone pen kaphei tungah kakoih hi a, kiphitdan in aging kazak ciangin ka etsukleh agingdankhat za in, tuakhitciang anunglampan meikhu hong pusuak cihi. Tuakhit ciangin nakpitak agin ngaihmahmah in puakkham a, Battery pen lengkhia in anikbawk zong meikang hi.

Hihbangdan apiangding in ka lamen hetkei ci’n Reporters te tungah genkhia hi. Battery akiatsukna munah zong meikuang in, mawtaw Dashboard tungzong meikuang cihi.

Hih Phone apuakkhap laitak in Charging zong akituan cihbang hilohi ci’n Ms Handley in genbeh hi.

Samsung Company te’n agenkhiatna ah hih apuakkham Phone sungah akizang Battery pen Original Battery hilo hi. “Counterfeit product” hi in, Samsung ii bawl Battery te hilo hi ci’n genkhia uhhi.

Samsung Spokeswoman khatin apuakkham Photo ki khahkhia te tungtawn in ka sitcian uhciang in Battery pen Samsung Company ii bawlkhiat Original Battery hilo ahih manin, tuahangin apuakkham hiding ci’n genkhia hi.

Tua numeino inzong Battery pen Samsung Galaxy S4 tawh aleikhop Original Battery hilomah hi ci’n pulakkhia hi. Tua azat Battery pen Online tungtawn in aleibeh cihi.

Samsung Company te’n Battery ahi zongin Samsung Products taktakmah zangzaw unla, kisapna hamsatna aomlehzong Samsung Retail Outlets te leh Authorised Retail Partner te tungah huhna nagen uh ci’n genkhia uhhi.

Samsung Mobile Phone, Smartphone azang khempeuh in theihhuai in, kidop huai mahmah hi. Battery pen asiatleh Original ngiak, Samsung Company te bawlkhiat ngiatmah tawh zatding hoihzaw hi.

More: Samsung Galaxy Note 7 Phone te vanleng sungah zat kiphallo

Hih thuthang tawh kizomvet in Power Bank zong Brand minnei, amuanhuai te mah zat huaizaw hi. Zomi tampitak in Power Bank pen aman ol theithei leiziauziau uh a, Quality ki lim ngaihsut khollo hi. China pan utut in abawlkhiat uh Counterfeit Product akici atuh tamlua ahih manin kidop huai mahmah hi. Power Bank te diakdiak pen Phone sunga Battery maimai te sangin khauhzaw ahih manin, lauhuai zawtham khading hi cih deihsakna tawh ihki phawksak hi. (Lauthawng saknopna hizenzenlo hi) ZD Sawltak #zomidaily