Athaulua mahmah Chinese khat lampi ah tukin, amathu in thozolo (Sengam ah mithauval tam)

Athaulua mahmah Chinese khat lampi ah tukin, amathu in thozolo (Sengam ah mithauval tam)

Central China ah pasal agolkhia mahmahkhat lampi tungah tuk in, amathu in thokik zolo ciliang hi. Tuapa pen agihna Body Weight pen 220kg (ahih keileh Pound 485) tak hi a, mi 20 val in phonghuan ngeingai in nai 2 sungbang ahanciam mahmah uhhangin phongkhiazo mahmahlo cizen hi.

Anunung ah Police Officers te’n cina damlo te zawnna Stretcher khattung ah hualphei masa uh a, tuakhit ciangin mi 10 valin domhuan ngeingai in phongkhiazopan ci’n Chutian Metropolis Daily te’n genkhia hi. Hih mithau mahmahpa pen kum 27 bek hipan a, Monday ni in Hebei Province, Wuhan khuasung aom zato ah akilak, acihlam ciangin lampitung ah atuk cihi.

Hihpa pen aneutung akipan thaungiat in, golpengpang hi. Abeisa kum 7 sungin thautektek in 220kg bang gikliangta hi. Amahzong Weight khiamding ci’n nung Senkumthak Lunar New Year akipan neklehdawn khiamgawp hi. Anekngei in anek nawnlo ciangin agilpi in thaulah leuleu in gilpi natna ngahlawh ahih manin zato ah akilak cihi.

Monday ni in zato pan atuaklian hi a, innlam aciahna lamkal ah tukin athozolo cimawk hi.

China pen asawtlua nailo kumtawmkhat sungin mithau hongtam mahmah a, leitung ah mithau atampen in akigen US nangawn sangin China ah mithau tawmzawta hi ci’n Lancet Medical Journal te’n nungkum in pulakkhia uhhi.

Tua Report sungah China gambup ah mithauval Obese pasal bekbek 43,200,000 bang om ci a, Obese numei pen 46,400,000 tak om cihi. Leitungbup pasal mithauval khempeuh te ii 16.3% pen Sengam ah om cimawk hi. Leitungbup numei mithauval khempeuh te ii 12.4% zong China ah om ci’n Research abawlte’n pulak uhhi.

Banghangin mithauval hizah in tamhiam cih aki kankhiat ciangin neklehdawn kidawmlo, cidamhuailo cih Poor Diet leh Exercise bawlngeilo cihte hang cimawk hi.

World Obesity Federation te’nzong China pen 2025 kumciangin leitung ah naupang athauval Overweight Children atampen gam hiding hi ci’n nungkum in genkhia uhhi. 2025 kum ciangin China gambup ah khangno athauvallua mi 48.5 Million omding cizen a, tuapen Spain gambup ii mimal phazah Population buptawh kikimdekding cimawk hi.

Nidangin mithau khawng ki thupimuh, mihau sumneiding in ki tuak himahleh tuhun ciangin mithaulua te kipi etlo bekthamlo, ki neu etzaw tamai hi. ZD Sawltak #zomidaily