“Asylum-seeker Card” leh “Refugee Card” ih cihcihte bang kilamdang?

“Asylum-seeker Card” leh “Refugee Card” ih cihcihte bang kilamdang?

Atom mahmah in genni cileng mikhatpeuh Refugee in aki ciaptehtheih nadingin UNHCR te tungah ngetna bawlkul a, tuapen Manglai in “Asylum-seeker” akici ahihi. Manglai alaimal ngiatin akhiatna kitel mahmahkhin himahleh Manglai azanglo pawlkhat te adingin telcian hamsa theihi. (Ngetnget kullo in Zomi te Refugee hikhin hilohiam cih ngaihsutna Concept te atuam in koihphot ni) Asylum-seeker te’n Card atawileh “Asylum-seeker Card” hipahding a, laidal atawileh “Asylum-seeker Laidal” hipahhi. “Refugee Card” cihleuleu ciangin Refugee in aki ciamtehsa te tawi Card hipah hi.

Asylum-seeker Card vs Refugee Card

Malaysia UNHCR zumpi pan abei 15 February 2017 (Wednesday) ni in Policy thakkhat tangkona neikhia uh a, Asylum-seeker Card atawi te Renew ciangin laidal bek piatading ci uhhi. Hih Policy thakpen 01 March 2017 ni akipan zangto tading uhhi. Tuathu hangin Asylum-seeker Card leh Refugee Card atelcian nailo leh atel laklawh pawlkhat in midangte lungkhamsak bekthamlo lung am sakgawp uhhi.

Hihthu pen lungkhamluat nading hizenzenlo hi. Asialam in ala pawlkhat te’n Card pianawnloding, UCL laidal bek tawisakding ahih manin “lengsak nawnloding” acihna hi inteh ci’n upmawhthu tawh apheng gengawp ommawk hi. UN Card apiaksa alakik bangdankhat in agengawp zong omthei hi. Banghangin tuabang in ummawh uh ahiam cihleh “Asylum-seeker Card” leh “Refugee Card” namnih te akibatlohzia telcianlo uh ahihman ahihi.

2013 Mobile Registration akibawl masiah inzong UNHCR in Refugee taktak in aciaptehma in UCL Laidal akitawi ngeina mah ahihi. Ahi zongin 2013 Mobile Registration ciangin UCL Laidal zangnawnlo uh a, tuatang in Card hongzangpak bek uh ahihi.

Card apiak zenzen uh hangin Refugee Card hipahlo a, Asylum-seeker Card bek ahihi. Card tuaktuak ahih zenzen hangin “Asylum-seeker Card” leh “Refugee Card” te amanneihna “Value” kibanglo hi. Gentehna in RM1 leh RM100 pen sumlaidal tuaktuak ahih hangin, aman neihna “Value” kibanglo cihdan

March 01 ni akipan Card pianawnlo in, UCL Laidal piading uh a, RSD Interview phitheihding nizong Appointment piapahpah dinguh cihi. Hihpen alungdamhuai mahmah thu hizaw hi. Banghang?

Abeisa in Asylum-seeker te Card pia uh a, tettan pen kum 3, kum 4 bang hisakmawk uhhi. Tua kum 3, kum 4 sungpen Interview bangmah omvetlo in, koihcip uhhi. Kum 3, kum 4 khitciang in tettan Renew sakkikzel uh a, adinmun ki lamdanglo in Asylum-seeker mah hitawntung uhhi.

Ahi zongin March 01 ni akipan Renew ciangin Card tawh apiakloh zenzen hangin RSD Interview Appointment phiniding piapahding ci ahih manin, alungdamhuai mahmah aci kahihi. RSD akici “Refugee Status Determination” philoh in Refugee taktak in kiciamteh theilo hi. Asylum-seeker Card natawi gemgam a, kumtampi hongki koihcip, hongki diahcip sangin UCL Laidal tawi in RSD phithei mengmeng lecin lungdamhuai zawtham hilohiam?

Abeisa abatleh USA alengte genteh pakleng RSD khitciang RST hiding a, RST khitciang OPE (RSC), OPE khitciang DHS (Lawaka), DHS khitciang Medical (sisit), Medical khitciang CO Class (Tentan ihcih Culture Orientation Class). Tuateng diudeu khitciang aki lengtheipan ahihi. RSD > RST > OPE > DHS > Medical > CO Class > Departure

Pawlkhat in “Asylum-seeker Card” tettan Renew bawlkhin in “Card mah tawi khalai” ci’n akisial mahmah omthei hi. Pawlkhat leuleu March 01 ni kipanding ahih manin, Card Renew leng laidal tawikha tading ci’n adah mahmah omleuleu hi.

Aki sialsial tezong kisialhhuai luakhollo a, adah mahmahte zong dahhuai luakhollo hi. Card tettan Renew khinte kum 1 pan kum 3 pian vive hizaw hi. Tulaitak Renew abawlnailo te abawl ciangin RSD Interview tawh asawtlo in kizomsuak theipah hileh, tulaitak Card tawikhalai ci’n aki sialsial te amakhelhziau nahih namel kuan genthei?

Hihpen abeisa pongman apaizia hi a, azi apasal te’n alutpih, nulehpa leh tate lutpihding in angak cihtetawh apaizia kibanglianlo khatheiding hi.

Theiding:

1) Nidang in OPE (Overseas Processing Entity) akici pen tuciangin RSC (Resettlement Support Center) ci’n kilaih hi.

2) RSD, RST, RSC hihtengthuam kivalak mahmah a, ahi zongin atuamtek ahihi. RSD = Refugee Status Determination, RST = Resettlement, RSC = Resettlement Support Center

Meeting: Abeisa 15 February 2017 ni in Kawlgam minam tuamtuampan kipawlna makai “Sub-Ethnic Burmese Minority Leaders” teng UNHCR-CLU in Meeting neihpih uh a, hivai genkhiatna neikhin uhhi.

Tuavaimah genkiknuam uh ahih manin zingciang 27 February 2017 (Monday) ni in Fellowship leh Religious makai, siate Meeting khatvei kaikhawm leuleu uhhi. Malaysia gamsung aom pawlpikem sia, makai, Pastor te’nzong asawtlo in hihvai akicianzaw in hong gencianthei khading uhhi. ZD Sawltak #zomidaily