Antang ip khat tawh mindai ding maw ~ Job Cinpi

Antang ip khat tawh mindai ding maw ~ Job Cinpi

Antang sai khat ah papi khat pai-in hih bangin gen hi. Ka pu pen kumpi nasem khat ahih manin kumpi huhna pan a ngah antang pawlkhat a kimam zaw deuhin zuak kik nuam hi, na lei kik nuam uh hiam ci hi. Na et nop uh leh ci-in a thungip sung pan antang tawmno khat lak khia hi. Antang sai neite in tua antang a et uh ciangin lei theih sa lel uh ahih manin ip bang zah zuak zo ding, ip khat bang zahin zuak ding ci-in a man ding zah dong pah hi. Ip nih zuak ding om ci hi.

Antang la dingin mipa pai khia a, a sawt loin saihka khat tawh antang ip khat hong pua uh hi. Saihka tung pan antang a suah khiat zawh uh ciangin tua mipa in a ton khoppih saihka hawlpa khiang ah a om lai ip khat pen na la kik inla hong kinawh mahmah in ci-in limtakin thu vaikhawk hi. Saihka hawlpa zong a om lai antang ip khat a la dingin pai khia kik pah hi.

Antang sai neite in zong a lah masak antang tawh a kibang hiam ci-in tua ip sunga antangte en pha kik uh hi. A lah masak tawh kibang ahih manin zuak kik dingin sai sungah koih pah uh hi. Tua ciangin antang zuakpa in sai neite khiang ah, ka pu zum pan a ciah ma-in hih antang zuakna sumte ka piak loh phamawh ahih manin antang ip nih man nong pia thei uh diam ci hi.

Ahi zongin antang leite na hai lo uh hi. Amau khat le kha a kithei ngei zong hi lo bek tham loin antang ip khat bek ngah pan uh ahih manin ip khat bek ngah ka hih manun adang ip khat hong tun ciangin ip khat man hong pia thuah kik thei pan ding hi ung ci uh hi. Tua bang na cih uh leh zong ip khat man hong piak masa lel un ci-in antang ip khat man la-in tua mipa sai sung pan pai khia hi. Hih hun dong kua mi khem hi a, kuate khem thuak cih kitelcian nai lo hi.

Tua antang zuak mipa a pai khiat zawh a sat loin sai mai ah saihka tawh antang ip nihna hong tung kik leuleu hi. Saihka tung pan antang a suah khiat zawh uh ciangin antang sai neite in a cian lai antang ip khat man tua saihka hawlpa tungah pia uh hi. Saihka hawlpa in, “Bang dingin ip khat man bek hong pia na hi uh hiam, ip nih hi lo hiam kong puak ” ci hi. Antang sai neite in ip khat man na lawmpa tungah pia khin ta ung ci hi.

Thu a kigen kik tak uh ciangin pilvangtaka khem thuak ahih lam kithei khia uh hi. Mikhempa in bangci bangin khem hiam cih leh antang sai khat ah adang antang sai khat min tawh antang lei hi. Tua antang saite in mikhempa gen antang sai min thei uh ahih manin sai tun ciangin sum nung piak dingin thukim uh hi. Mikhempa in tua thukimna a ngah zawh ciangin a khem nading antang sai neite tungah antang a zuak ahi hi. A tomin gen ding hi leng antang sai nih kikaal ah ngian tawh na a sem suak hi. Midangte sim theih ding na deihsak leh na share sawn in. Lungdam, Job Cinpi (Zomi Laisim nuamte)