Akipsa Zo minam puan leh Zo nikteen puansilh Fashion te ~ Dr. Dongno

Akipsa Zo minam puan leh Zo nikteen puansilh Fashion te ~ Dr. Dongno

Minam khat pepeuhin minam puan, national dress neih ding thupi ahih mah bangin, mi nam tuamtuamte-in amau minam puan nei hamtang ciat uh hi. Tua minam puante thupi bawlin zahtaakna tawh kikem uh aa, ni thupi ni ciangin hoihtak leh kipaaktakin silh ciat uh hi. Ameel-acii, colour, agelh, design leh a puan kikhuidaan, style in bang mi namte’ puan cih ong lak khia pahlian ahih manin hih thum tengin, vaang nei sak aa zahtaak huai sakin, zong etlawm hi.

1966 kumin Zangkong Zomi Siamsin, Sangnaupangte Kipawlna ka phuan khia uh aa, Zomi Siamsin Cultural Committee (anuai aa man) chairman ka sep ciangin, ‘Zomite -in minam puan i neih loh phamawh hi’ ci-in ngaihsutna lianpi kanei hi.

U Ne Win’ uk hun sung hi aa, siamgatna, nasep tawh akivaak mite nangawnin gat ding khau leh animna ngah zo lo-in a dinkhawl hun ahi hi. Kumpi sung pan khau thohh lei ding om lo ahih manin, India panin ziinbeel in asimtham aa kizuakte lei sim-in tua tawh gat ding ahi hi. Khat peuhin kumpi tung ong khia leh, thong sung ong kidenna pah ding aa sang pan ong kihawlkhia lai ding ahi hi. Lau pipi mahin kisem tantan hi. Piang zo dingin ong kimuang lo lua ahih manin ong kikhia lo bilbel aa, dawi-havang-kaal ah suakta-in Zo minam puan anei ihi hi.

Zomite’ vangil pan kila design leh style : Hih Zo minam puan design pen a etlawm lel ding aa kibawl mawkmawk hi lo hi. Zo puan azeem, design taktakte Tedim khua kiim ah zong kawikawi-in, ahoih teng gawmtuahin akhui daan, style, i Zo ngeina lui lian bek kepcing ding ngiimna tawh design leh style ka bawl hi. Tuhun hi leh mobile phone tawh design-te manzaih ziauziau ding pen laidal leh colour pencil khut lom khat keng pahphotin agelh, design tuamtuamte suai-in ka la kawikawi hi. Pasal puan dingin, tualpuan daan hi-in a awm leh anung kiimvelin azepna hoih teng, khiangkawi leh maimu tang, asan leh avom tawh gawmtuahin, abaan bullam, abaan dawn leh anuai ah azepna, khiangkawi, gual thum koihin, numei nik dingin, nik siing mah hi aa, a kawng leh anuailam khuk nuaisiah avom tawh ka behlap hi. (lim kisuai) Minam puan ahih ciangin akhiatna nei lo a, colourful, a hoih mawkmawk dingin kigeel lo aa, i tangvan, taktak teng bek, amangthang lo dingin kepcing ding ngaihsutna tawh akibawl ahi hi.

Chin Usi-in design ong saang : Design nam guk ka suai aa Cultural Committee ka teel sak khit ciangin Chin Uzi zumpi, Haka ah khak to-in Zo Minam Puan dingin kip sak nading ka ngen hi. Lungdamtakin ong sang uh hi. Tua design, pongsan banglianin siamgan set tawh ka gan sak pah uh hi.

Zo Minam Puan kikip sak : February 12, 1967, Union Day ni-in Zangkong Kyaihkasan Hall, Zomi kusale-te tunna mun ah, Zo Zum ulian khempeuh, kusale teng leh National Dress Committee mai ah sangnaupang duang kikhaite-in etlawm mahmahin hih puante silhin Zo lam lamna tawh Zo minam puan in kip sakna kinei hi.

Zo minam puan i neih zawh kum 50 val ta : Zo minam puan kiptak aa i neih zawh tu-in kum 50 val khin ta hi. Atung aa i gensa mah bangin 1966 kum aa Zomite neih, ngeina khanglui vangil design-te tawh kibawlin, 1967 kum Union Day ni-in Zo Zum, Chin Usi, in Zo Minam Puan in kikipsak khin hi. Tua ahih manin hih design leh style pen Zo minam puan ahi hi. (lim)

Tua baan ah hih puan pen UN Branch khat ahi, UNESCO International pan ong pai uliante mai ah December 7, 1967 ni-in Inya Lake Hotel, Yangon ah The XVIII (18th) Meeting of Colombo Plan om aa tua lai aa cultural show ah Pi Ciin Man Niang (Pu Khup Khan Thang’ zi, Norman Oklahoma, US) in silhin stage tung ah lak aa, gamdangmi uliante mai ah Zo minam puan akilah khiatna amasapeen ahi hi.

Zomite Fashion Puan : Tu hun ciangin, sum bawlna aa kigan ‘Zo puan’ ci-in atuamtuam tampi ong om hi. A design, ameel-acii leh style nam tampi ong kibawl hi. Mi tampi-in “ I Zo minam puan koi pen hiam; atuamtuam ut bangbangin kibawlin ki silh zeelzuulin, mi’n ong dong leh koi pen i Zo minam puan i ci ding hiam ?” ci-in ong dong uh hi.

Hih atuamtuam aa kibawlte pen Zomite puan fashion hi aa, Zomite nikten puansilh kizep daan apuah to, alaamto, apicing sak, azai sak ahi hi. Zomite-in kizepna puan atuamtuam, ahoih nono, akhel nono anei i suak hi. Fashion pen deih bangbangin kibawl thei hi. Ut bangbangin design tuamtuam a style, etlawm theithei-in kibawl, create thei hi. Kikham theih om lo hi. Zomite bek hi lo, kuakua-in hoih sa-in ong zatpih le-uh nakpitakin aangtan huai hi. Mailam ah zong ahunzui-in ahoih theithei-in design siamte-in ong puah toto lai ding uh hi.

Zo minam puan, leh Zomite fashion puan : Tu-in akikip sak khin sa Zo minam puan, National dress leh hun zui aa Zomite fashion puan , nam nih anei i hi aa i khentel theih ding thupi hi. Tua mah bangin i zatna ah zong ahun, amun tawh kituakin i zat siam ding kisam hi. Gtn. Zo Minam Ni kikhopnate ah adiakdiakin, amai aa ong lehtut thugen ding uliante-in Zomi fashion puan mawkmawk sangin Zo minam puan ong silh le uh kilawmin zahtak baangzawin mipi tangzaw ding hi. Mipi in zong i minam ni i muak ni ahih mah bangin, i minam puan silh ciat leng hoih peen hi. Ahih hangin Zo puan, fashion hoih nono tawh a etlawm theithei-in ki zeemin kipaak khawm leng zong etlawm mahmah veve ka sa hi.

Puansilhin khiatna nei mahmah hi. Ei Zomite-in zong athu tawh kituakin puansilh kizang hi. I pu i pate-in ut bangin na silh het lo uh hi. Gtn. Tangcin pen nidang lai-in gal man, sa (sai, zangsial, humpi, sahang, kamkei, cinghpi, cb.) amante bek zat, puan ahi hi. Gal man, gal that leh sa man lote-in tangcin zang mawkmawk lo uh hi. Tulai hun tawh gen leng pilna lam degree ngah lopi-in degree suang lenlan leng tua tawh akibang isuak ding aa etlawm lo hi.

Nidanglai-in gal man acihte uh i et ciangin, mun dang aa mi ommuang kimlai peuh ava thatte zong “gal man” ci-in thupi bawlin ‘pasal taktak’ cihna pahtawina tangcin puanza kisilh sak hi. Ataktakin mi that, murderer hi-in criminal ahi gige uh hi. Tu hun hi leh ‘sih daan’, death sentence akipia dingte hi. Hihte pen khanglui khuamial hun sung aa nun zia ahi hi. I pu i pate hun lai mahmahin zong khanglui upate-in hih loh ding thu ciin na nei uh aa, “Tual that peuhmah nuamsa ngei lo, khuasuak ngei lo hi” na ci ngiat uh hi. Gal kidona sung ahih keingaal leh, mi that pen hoih nasa het lo uh hi. Tu-in Topa Hehpihna Grace nuai ah thu um mite ihih mah bangin hoihtak ngaihsun pha kik lehang tua mithat, criminal-te’ kiphatsak pih leh gualtung tuan pahtawina puante tawh tu hun ciangin kizep ding ka ngaihsut ciangin mihing kithahna agu tua design tung ah bang lai dingin ka ngaihsun aa ka cik azee hi. Sa man acihte’ sa matte zong tuhun ciangin kumpi-in protected animals ci-in mat ding akikham ganhingte ahi aa Animal rights-te-in zong criminal zahin taza asuaih ngekngekte uh ahi hi.

Tua mah bangin i Zo ngeina ah, puandum pen numeite bek zat hi aa puanlaisan pen pasalte bekin azat uh ahi hi. Tu hun ciangin, pasal pipi puandum, puan tungsilhin asilh om aa, numei te’n zong puanlaisan, puan-aak leh nik nangawnin kisilh kiteng gawpgawp hi.

Zomite ngeina hoihtak anei minam i hi hi. Tua i ngeinate i kepcing ding, i zahtak bawl ding khanglui ngeinate i kepcing ding khangthakte-in mawhpuak i nei hi. Zo ngeina hoihte asusia ding, alumlet ding i hi kei hi. Apuah, akem azuun ding i hi hi.

Pu Khup Khan Thangin zong i Zo puan tuamtuamte akilawm lo pipi aa kizatnate tawh kisai mun tuamtuam ah genna aneih zeel ban ah lai zong at zeel hi. Tu-in i Zo puan kici ong piang thak puan leh nik tuamtuam tampite en pha kikin ngaihsutna thak anei mi tampi ki om ta hi. Koi pen koi hizaw hiam ci-in alungmang tampi zong ki om hi. I ngeina tawh kituak lo, aki lehbulh pawlkhatte kidop ding, silh huai, silh huai lo ngaihsun pha-in i teel siam ding hi. Tua hi kei leh ngeina kip, ngeina kician anei lo Zomite i suah ding lauhuai hi. Hih lai ah hun om lo ahih ciangin Zosuan momnote-in i Zo ngeina hoih tampi i palsatnate i gen nai kei ding hi.

Tu-in, Malaysia aa om Zomite-in Zo minam puan khat, akibang, uniform in zat ding thu tawh kisai-in ong dotna uh ka lungdam hi. Zomi Cultural Uplift Society in Malaysia Zomi Kipawlna, ZAM tawh thukimin 1967 kum aa Zangkong Siamsin Kipawlna tawh, atung aa kong gen thute leh (lim), aki bawl masapeen leh akikip sak khinsa, pasal tual puan leh numei nik, ‘Zo minam puan hi’ ci-in zat dingin khensat ta uh hi. Maan hi. Hi bek mah ‘official-takin’ Zo minam puan, Zomi national dress cih theih ding ahi hi.

Ataktakin tu phingphing hi lo-in tumaa kum 50 val laipekin Zogam uk Chin Usi uliante-in akipsak sa uh i Zo minam puan, Cultural Committee (pictured) te silh leh lim sung aa bang, ahi hi. Gam tuamtuam kipawlna kikhoppi, UNESCO-te Colombo Plan Meeting mai ah zong akilaksa, hih ‘Zo Minam Puan’ ahih mah bangin kuamapeuhin thei kim ciatin, Kawl gam leh gam tuamtuam aa om sanggam Zomite-in zong ni thupi ni ciangin zahtakna tawh i zat siam ciat nading kong hanthawn nuam hi. I Zo minam puan ahi zongin, Zomi fashion puante ahi zongin amun, ahun tawh kituakin etlawmtakin i zang ciat ding hi. Dr. Dongno Sept. 14, 2018