Aki theikhollo thu (X Factor)

Aki theikhollo thu (X Factor)

1. Zomite in paunak ah “Hakai pahtak lungheng – a hoih ding a ih upmawh khat a hoihlote” cih ih nei hi. Hoih ding a um ahih manin a suan lai in zong hoihtak mah in suan in vil in hah hi kha ding hi. Himah ta leh lung heng veve hi. Tua hi a, hih laigual ah a kigenlo a kithei khol theilo thu tampi tak na om mawk hi.

Tua aki thei theilo thute pen science dan leh “x” in kiciamteh hi. Na khat peuhpeuh sepna ah ahizong, thu khat pepeuh ah ih hoihtak hanciam mah ta leng lam-et bang, ih muan bang hong pianloh na hang pen ih upmawhloh, ih theih kholhloh thu “x” hang na hi thei hi.

2. Tutung Worldcup ah a kimuang mawhlo Germany te thu tawm en ni.

• 2018 worldcup qualify kimawlnate ah lelh a neilo team ahi hi. Tuamah bangin Fifa top1 team ahi uhi.
• 2014 Worldcup Champion ahi hi.
• Worldcup (21) vei kibawlna ah (19) vei kihel uhi. 1930 kum khual gamlat luatna tawh kihel zolo, 1950 kum kimawl khuan ngahlo (banned) uhi.
• 2018 kum simloh, 18 vei kihel na ah khat vei bek group stage pan in puanlom zial kha uhi.
• Worldcup ah a khatna 4 vei, a nihna 4 vei, a thumna 4 vei ngah uhi. 19 vei kimawlna ah 12 vei medal ngah suak uhi.
• Tutung kimawlna ah a coach pa akipan abeisa in champion ngah ngei mi9 tak kihel kik uhi. A siam a minthang tampi kihel uhi.
• A bei sa Worldcup nunung pen 3 te (2010,2014,2018) goal tam khum pen team ahi uhi.

– Tua mah bangin a thapia ding mipi letmat lei pen Russia te khit ah a tam nihna hilai hi…… hi bang takin tangthu hoih (a beisa le tulaitak a) a nei Germany in Mexico leh S.Korea hong lel in group stage panin puanlom zial hiau uhi. Hi pen 1938 Worldcup khit ah a ngahkik uh guallelhna limci khat ahi hi.

A Coach pa Joachimlow in “S.Korea pen cikmah hun in lel ding a ka ki ngaihsun kha ngei kei” ci’n puanlom zial kawm media te tung genna nei hi.

A thu a la, a siamna tawh en ding hileng German muan huai zaw tham hi, a hizongin kidemna ah hong lel uhi.

3. Tua mah bangin telecomunication company a lian pen khat a hi ngei Nokia pen tuhun ah kiam cihtakcin kiam ziau mawk hi. 2009 ah leitung ah brand manpha pen 5na hi a, 2014 ah 98na, 2017 ah 147na pek ah tungsuk uhi. Upmawh huai hetlo Sen phone, Korea phone te in na makhelh ziau suak hi. A CEO pa in a thugenna khat ah khitui luang kawm sa in “Ko bangmah khialhna bawl kei mata le ung, a guallel suak ungh.” cimawk hi.

4. A muan huai, a thupi, hoih ding a ih upmawh khat pen hong hoihlo vat thei hi. Tua pen leitung dan hi a a piang thei thu ahi hi cih ding simloh bangmah kici theilo suak mai hi.

Khat veivei ciangin ih nuntakna ah zong siamna, hoihna, muanna ih zong a ih ngah takpi thei hi. Ahih hangin tuate tawh gualzawhna 100% kingah pah ding hi cih hilo a gualzawhna ngah nading in a khelthei thu na om veve hi cih phawk huai hi.

Siamna, theihna, hoihna, hatna te bek pen gualzawhna ngah theihna hilo a Pasian ompihna/ompih lohna (mi pawlkhatte cih “Kam phatna/kamsiatna”) ahih kei leh science dan in genleng “x factor” pen a thupi mahmah ahih lam ka phawkthak semsem hi.

Hakai hoih mahmah ding a i lam-et, ih kin, ih puah, ih vel hangin lung a vei teitei na pen akitheilo thu “x” khat hang na hi hi. (Ih kin ih puah kei leh bel vei hamtang ding cih theihsa hi)

Ih mimal nuntakna ah zong thutak tawh nuntakna (realistic, data and facts) ih thupi sak thei hi. Ahi zongin ih gualzawh matutna dingin ah siamna, hoihna, theihna, hatna te bek ahilo akithei theilo “x factor” na om thei a tua thutak icih te mawkmai sak thei ahih lam hong phawk thak sak semsem hi.

Paunak 21:31
Galdo nadingin sakolte a baihsa-in kikoih a, ahi zongin galzawhna pen Topa’ hang hizaw hi.

Nk Khanno (Zingsol)
July 25, 2018
20:30pm