A Nuamlo in Maban Thanemsak thei

A Nuamlo in Maban Thanemsak thei

Hici koih khinkhian lel leng zong ahi lel ding hi napi nopmawh, nuamlo kasak citciat tampite lak ah khat..

Nidang in lawmte tawh kithuahna, mapanna khat peuh ka neih uh ciang, hanciam mahmah ciat napi ung, khatpa pen nasep laitak khutzep hithiat in anawl khat pan a kisem teng limtak na en gige thei den hi. Bangmah zong pau selo, lah semlo, lah nawngkaisak lo. Ahih hang thu ciapteh bel hat bilbel hi.

Sep le bawl ding teng kizo khin in, maban hialbawl khit ciang nasepna thu a genkik bel kiva peuhmah a, a genkik ciang nakhempeuh ama’ sepsa, ama’ vaihawmsa, ama’ makaih, amah kihel lo hileh a piang vetlo ding suah pahpah bilbel hi.

Hihbang dan khat amunmun, ahunhun, akhangkhang in omthei peuhmah citciat hi. Phamawh lua khollo napi, nopmawh thei peuhmah hi. Khatveivei mi thadah sak thei a, na kisep loh lawh thei hi. Maban thanemsak thei mahmah citciat hi.

Zomi sung ah tuadante awlmawh loh theih hun om a, awlmawh loh theihloh hun om zelzel hi. Mipil misiam, mi thanuam thahatte thadah sak thei a, mipi in kisuplawh thei peuhmah hi.

Seplohpi a min deihna, min deihna tawh angsung mimal hamphatna lunggulhna lian lua thei a, thanuamte thadah sak thei hi. Sep ding leh zawhding tampi kisem lo, ki zolo thei hi.

Tuabang mite kim le pam in thapia thei sawnsawn lai a, tuabang hun ciang mabing mahmah thei hi. Vawhloh tuhlohna a atnop, agah neknop pen mi ginalo, mi gilo ahi hi. Seplohna a mite’ thaman tuhkhiatnop pen guta buluh namkhat mah ahi hi.

Mimal nasepna a hanciamna leh huaihamna mawhsak theih omlo a, ahi zong in mipi’ vai, mipi’ neihsa, mipi’ maban pan a mimal angsung ding huaihamna bel huathuai, kihhuai, luaksuah huai mahmah hi.

Hihbang a nuamlo theite mipi in telsiam tak a i nawlkhin, i pampaih theih hun, nehpik a i nuihsat theih hun ciang Zogam ong paallun pan ding hi. Pau Khat Suan