A mawh baang panmun (sinful role)

A mawh baang panmun (sinful role)

Adam le Eve hong puk zawh uh a kipan a panmun uh pen a mawhbang panmun hong suak ta hi. Pasian seh panmun ah thumang takin nungta lo-in Pasian a langpanna uh huhau-in amaute gel nu pa kizopna hong lipkhap huai ta hi. Eve in a pasal thu dong lo. Adam in Pasian’ thu sangin a zi’ thu ong mang zaw hi.

Khatna ah, a kiseh Adam (pasalte’) lutang hihna panmun pen Eve in a mawh baang lunggulhna tawh a pasal enna, uknopna ong nei tawh kibang hi. Ei numeite zong lutang hi thei lua zen hi hang cih thu hi. Feminism ih cihcih pen hi. Nihna ah, Adam in zong a puk ma vua, Pasian piak ukna, zite hehpih theihna, a lutang hihna panmun pen a mawh kaai, a mawh baang lunggulhna tawh hong kihel ta hi. Tua bangin a mawh baang ci le sa tawh a zi ong ukin ong zothawh ta hi. Zawhthawhna tawh ukna hong suakta hi.

Hih thu pen tuni ciang dong maha hong kizom toto nupa kikal buaina hong hi ta a, zi le pasal kikal siatna buaina piang sak hi. Tua pen Adam’ hang bek zong hi lo, Eve hang bek zong hi lo-in, a nih tuak vua a zuih ding uh Pasian’ piak panmun (role) tavuan (responsibiliies) te a nupa kikal vuah zang lo-in a gamtat tuak man uh ahi hi. Leitung mite’ kicisa thutuahna tawh Pasian in a thu hei ngei lo ding hi. Leitung mi khempeuh a kithutuak zongin Pasian’ thu tawh a kituah kei leh gupna thupha tua laimun ah om ngei lo ding hi.
Tuni-in innkuan sungah buaina pen nupa kikal cidam lohna pan hi masa tawntung hi. Zawltaina, zawlgaina, kitaipih cihte pen a thu kan lecin a nu le a pa’ kikal innkuan, bangkua sung panmun puak cidam lohna hang na hi gige thei hi. Nitumna lam gam, Europe gam, America gamte ah kithahna kitotna le buaina a piangsak tawntung mite pen khangnote vive hi a, tua khangnote pen a hilh ding ama kaih ding nu le pa nei lote, tagahte, a nu le a pa (parents) a kikhenkhente’ tate a tamzaw hi tawntung hi.

Tua ahih manin leitungah daihna le kilemna a om theih nadingin nu le pa kikal kilemna, Pasian ong sehna bangin kithutuak taka ih panmun (role) tuak cidam taka ih puak ding a kulna hong kilangsak hi. Pope Benidict a Sawm le Thumna pa in zong leitungah kilemna daihna a om theih nadingin eimau innkuan sung ciat, eimau bangkua sung ciat pan nu le pa (parents) te in ih tate Pasian’ kammal tawh thu hilh a, ih makaih ding hi masa hi. Innkuan bangkua sung pan’n kipan ciat ni ci-in tangko ngei hi. Thumasa tua hi.

Suang Dal