A manpha lungtang kepsiam in ~ Khat Thang

A manpha lungtang kepsiam in ~ Khat Thang

Khatvei, Thomas Edison in mei bulb hong bawl khit ciang, a bawl mei bulb mipi lakah tangko sak ding Media nasem hon khat kai khawm hi. Thulela kan tamsim hong pai ngeingai uh a, tua teng mai ah, a mei bulb bawl lak nuam ahih manin, a nasempa khat mei bulb va la sak hi.

Nasempa zong lawp lualiang hiam, mei bulb tawi in hong tai kawm leh a khe palkha in tul citciat ahih man in mei bulb zong hong kitam lian mawk hi. Hun tampitak la-in a sep a mawkna hong bang phial hi. Ahing zongin Edison in nasempa bang mah cih lo in, Media lengla teng tungah thum in, ka na bawl phakik ding-a, ka zawh teh khatvei kong samkik zel ding hi ci hi. Nasempa ahih leh kisuang lua peuhmah in om hi.

Edison in a mei bulb bawl hong kipankik a, kha khat val bangmah hong buaipih zel hi. Hong zawh ciang’ Media teng kaikhawm zel in, a mei bulb lak dingin hong kithawi hi. Thulela kan lengla teng mai ah nung-a nasempa mah sawlin mei bulb va la sak citciat hi. Nasem tangvalno pa zong nuam mahmahin kidawm takin mei bulb hong tun pih hi.

Vai khempeuh lemtang takin hong zawh khitteh, dotna dawnna hun sungah thukan khat in Mr. Edison aw, bang dingin nung-a mei bulb kitam sak naupang nasempa mah tutung zong mei bulb la ding sawlkik lai mawk na hi hiam? Nasem dang tampi nei napi cin, hih tangvalno pa in hong kitam sakkik leh na mei bulb bawlna in hun tampi sumkik zel ding cih dah se lo na hiam? cih dong citciat hi.

Edison dawnkikna thupi ciapteh huai;

“Hih tangvalno pa mah thei gigu a ka sawl aive! Mei bulb kitam lel bel ken bawlkik thei hiveng, Amah sawl nawn kei mawk leng tangval pa a lungsim kitam ding hi ven ee” ci-in dawng hi.

Leitung mi khempeuh pen I vun puak a vom a kang, a san in kilamdang kha mah ding hi hang, ahizongin I lungtang kibang a, dah theihna, khasiat theihna, lungdam theihna, heh theihna I neikim ciat hi.

Mihingte I lungsim kisia/kitam leh I bawlkik theih ding pen hun a ciangtan om lo hi. Tua ahih manin nang hangin kuamah lungtang kitam, lungsim kisia sak kha het kei in kong it Zomi aw! Khat Thang