A mangthang kuankuan i Christmas ~ Mungpi Khupson

A mangthang kuankuan i Christmas ~ Mungpi Khupson

Cinema khat ka etna ah a tangvalpa birthday kilawmin gualnuamin a lam ngeingai laitakun a birthday lopsakpa uh omloh lam tel vat uh a, a kuama tek kidong ngeingaiin a zonzon uh hang muzo paklo uh ahih manin , “hmmm leltak aw e” ci in ciah khin uh hi. Hih flim pana ka phawk thu khat hong gen dih ning.

Kumsimin lungdambawl pawi I khaam den a, December hong kipan peuh leh Innsung, Shopping Mall, leh khuasungte kizemin, “Merry Christmas” cih kisuang euaute muh theihin hong kilang pah hi. A suakpa’ min sangin “Christmas sale” cih kammal in i lungsim hong bunzawin I khialahzaw a, naupangten naungek Zeisu sangin Santa Claus teelzaw mawk uh hi. Nu leh Pa tampite’n Bet’len aksi mitsuan loin veng le paamten a tate uh bang leisak uh hiam cih theih sawmin mitsuan uh a, a niampenna muna suak naungek pen, a sangpenna mun pan muak ding vaihawm uh hi.

Khatvei Shopping Mall thupi mahmah khat ka va hawh leh a sungpen nakphatakpi’n na kizemin thupi mahmah hi. Chrismas Tree bang pen Zogama singkung sangpenpen sang zong sangzaw phial leh kilawm hi. Kumpipa teenna ding zaha kilawmin palace dan khong omsak uh a, maan lakpih nuam kiphul nainai uh hi. Ahi zongin tuazah a thupi, tuazah a man tam zepna sungah naungek Zeisu lim khat beek nangawn paalo tazen hi! “Hmmm leltak aw e! a birthday neipa lah om lo a!!” cihnop huai mai hi.

A van khotna ding vua customer a hupna uh bel hi sam. Sumbawl vanzuak pawlkhatten Christmas hun pen bang hang na ngaklah phadiak uh hiam cih khong zong a lamdangpi na hi vet lo! Pawlkhatte bang in customerte pen Messiah phial zah dong na limbawl uh hi! Tuaci kei leh lah a vante uh khong lo zel ding hi mawk a! Thu dang hi kei Lungdambawl zong sumbawlna hunpi hong suak ci mai ni!(Christmas is being commercialize)

Tuhun ciang Mikangten Zeisu suah deihsakna kammal a limzat mahmah uh khat pen “Happy Holiday” cih ahi hi. Western lamah “Merry Christmas, Happy Christmas” cih kammal pen bei hiaihiai hi leh kilawm hi. Cingno’ birthday na deihsakna’n “Happy Birthday Cingno” cilo in “Happy celebration” peuh ci ngaingai mawk lecin Cingno a lungkim zen tam?

Mikang laigelhsiam khat in a gelhna ah, “I tate uh kiangah ‘Santa (Christmas puteek) in bang tengteng hong pia leh deih na hiam’ cin dotna I limzat mahmah laitak, ‘Pasian in bang tengteng hong pia leh deih na hiam’ cih dotna lamsang pen haivai phialin I ngaihsun leuleu hi. Hih society in Christmas hun ah a neipa nangawn saang nuam lo hi” na ci geu hi. 2006 kumin Britain gam sunga Christmas card kikhawng khempeuh pana seh za suah seh khat(1%) bekah Zeisu tawh kisai thu leh lim tuang kici hi!

Europe leh America gam naupangte in Christmas hong tun simin a ngaihsut masak pen uh bang hiam cih leh Christmas puteek (Santa Claus) ahi hi, Christmas pen Zeisu suah pawi ahih lamtak a phawk lo vive hiphial uh hi. Gam gentheizaw Africa leh Asia Christian naupangten ahih leh Lungdambawl pen Zeisu suah pawi ahih lamtak telzaw uh hi. Newsround in survey a bawlna Daily Mail in a suaksakna pan 2006 kumin Britain gam naupang kum 7-11 kikal khempeuh lak pan 44% te bek in Christmas pen Zeisu suah pawi hi ci’n saang uh hi. 64% ten Zeisu suah pawi ahih lamtak phawk khalo zen uh hi veh aw! Iraq gam a gen I hi kei a, Tedim labu sunga la tamzaw a phuakte’ teenna British gam a gen I hi hi!

• Christmas deihsakna kammal dingin Happy Holiday i zat simin Zeisu a nawl I hi hi.
• Christmas ciang Zeisu sangin Santa Claus min limzat zaw I hih leh Zeisu a nawl I hi hi.
• Christmas ciang ei a ding bekbek van lei ding a lunggulh I hih leh Zeisu a nawl I hi hi.
• Christmas ciang letsong saan ding bekbek a lunggulh i hih leh Zeisu a nawl I hi hi.
• Christmas ciang I hunte gualnopsakna bek tawh a beisak I hih leh Zeisu a nawl I hi hi.
• Christmas ciang a kilim zepna mun peuhpeuh i zuat duatduat leh Zeisu a nawl i hi hi.

Kumsimin Zeisu in a suahna ding mun hong zong den lai a, na lungsim sungah mun a awnglai hiam cin hong dong den hi. Zeisu ading mun i piak laiteng Christmas mangthang ngeilo ding hi.

Tedim labu No. 85 tawh I thukhup ni:

“..keima lungsim sung hong om ta in Nanga ding omna a om hi” – Emily E. Elliott, 1836-1879

Mungpi Khupson