A Lungdamthei Minam

A Lungdamthei Minam

A min gen dahni Sezang khua ateng papi khat in USA aom a sanggam pa kiangah lungdamko siam ban-ah etteh taaksa ing. USA aom a naupa in a u pa sum khak theizel hi. Khualam aom a upa in a sum ngahte tawh Sikkeu, Bel…cih bang a ki tangsap bangbang leina hi. Tua teng khempeuh laidal ah ciamteh hi. USA aom anaupa in a upa a hopihteh a upa in sum zatna teng ki ciantak in gen hi. A naupa in u aw tua bangin ciamtehteh kei-in na ki tangsapna bangbang leina dingin kong khak hi, laidal in na ciamteh dingin kong khak hilo aa, bang tengah zangh cihzong hong donglo hi ing cihi. A upa in nau aw hilo hi, “nang USA ah na tunga tua hangin ko na seplo in a baihsa lei-in ka ne uh hi, nang’ sepsa tung panin itna tawh nong khak sumte hangin lungdam lua-in a ciamteh ka hi uhhi. Ih van neihte hong theisak nuam hi ung”, ci hi.

A naupa in midangte kiangah a genna ah ka upa in ka sum khakte a mawkna in a zatloh ban-ah lungdam hong ko ciatciat hi. Ka ki hopih laitak un ama theihloh kal in ka ip sungah $ 3.00 bekbek ka neih na leng ka upa ka khak nuam liang hi ci hi. Sanggam khat, pa ta khat ihi zongin lungdam ki ko tangtang huai hi. Lungdamkoh cihpen ki cilbawl thei mahmah a, tu-in cil bawl nawn kei ni. Hong khak ding mah hi ee, hong panpih dingte mah hi ee..cih tawh om mawk mawk ding hi tuansamlo hi.

Bejamin mel mahmah Josept in a muhteh bang zah tak in lungdam hiam? Ki ipip zo nawnlo in lungdam lua in kap khia gawp hi. Itna lungdamna icih ki selsimsim thei hilo hi. Josept te unau a ki it manun ki ngawng kawi in, lungdamna khitui a luang ngelhngelh ahihi. Zomi te hihte unau bangin a ki-it minam, a lungdamthei minam ihih lam phawk sansan ing.

Ciimnuai khua ah Sa ki gawh in Ciimnuai khua ah a lungdamna a thuk kik ma in Geeltui khua ah peem uha, Ciimnuai khua ah Sa a ki gawh pen kum tampi khitteh Geeltui khua ah a lungdamna thukkik tangtang hi cih, ” Ciimnuai a Sa kibaak Geeltui ah ki Thuk” cih Zolai Simbu sungah kisin hi. A khiatna hong gen kik uha, ” Lungdamna manggilh ngeilo Sauveita leh thuk kik teitei”, kici hi. Lungdamna a ki ko tangtang minamte ihihna ki lang hi. Lungdamna ih ki koh ciangin a hi ding mah hi ee kici lo uhhi. Khat leh khat ki panpih, ki dom sang, ki huh ki thapia minam ihihna ki lang hi.

Sa zawi lo pi khat ah Sa awk ngeilo in ki siah ngeilo hi. Zomibup in ih zawi panna ih zuihna bang hiam cih phawk huai hi. Lungdamkoh theihna ding a zawi om tuak hi. Ih ngah zahzah tawh phunphun lo in lungdamkoh huaizaw hi. Ei tungah lungdam hong ki koh theihna dingin ih sep khiatna khat ki sam hi. Hih ciang ih tunna pen Pasian sep khiatna taktak in ih pomleh ama tungah lungdamkoh huai mahmah hi. Nang tungah lungdam hong ko aom ciangin piak beh nop semsemna aom zah khat in Thupha hong piapa tungah lungdam koko leng, ih maban dingte ah lungdam ih koh theih dingin vai hong hawmsak den ding hi. Ka gen theihzel bang hiam cihleh Pasian ih manggilh nini kiamlam a manawh semsem ihihi.

Mi khat ih panpih leh ih panpihna lamlamten tua in hong panpih hi cihthu kiza hizaw leh hoih aa, a ngahlamte adingin zong nuamin a panpih lamte adingin zong thalawp huai semsem hi. Tua hi a zawi zuih siamna. Tua hilo aa, a pia khia lamten ko tua tengtengah pia khia ung ei cih ih gengen pen ki sialhna maw, zuau genna maw cih ki tello hi. A ngah lamten tua in hong pia khia hi cih hileh a pia khiapa miten amah leh amah aki gen kulse lo in thei pah lel hi. Thu namtui ih cih tuate hi.

Dr.JM Paupu in, ” Ei Zomite pen Naupua litlit mah in USA Visa a ngah ziahziah minamte ihihi,”ci hi. hi hi. Pasian hong thupha piakziate ngaihsun phapha leng Pasian tungah lungdam kohkoh huai mahmah hi. A lungdam thei minam ihih manin ih lungdamna phawkkhalo in Biakpiakna lam a manggilh ki tawmnawnlo hi. Thu hong ngetsak Siate, Siampite ki zahko bawl ngamzaw lai mawk hi. Siampi te tung mahmah ah zong lungdamkohkoh huai zaw thamtham hi.

Itna leh veina tawh

Thawn Tuang
Zomi Angvaan
Oct 27,2014