A hingtang-in, ki nawmvalh Zomi pawlkhat

A hingtang-in, ki nawmvalh Zomi pawlkhat

The Earth will not swallow a race to extinction, but another [race] will. Sim leh Zo, Sim leh Maal, Sihzaang, Saizaang,Teizaang, Lamzaang, Zo, Dim, Losau a vekpi in, phungkhatsuan minam khat hihang. Ciimnuai tate, koikoi ah a om uhzong, leitungmihing ganhing kuamah in khen kei ta hen.

Khual leh tual, tuipigaal ah, tulai gamvai leh minam vai ah Pasian teeltuam makaai leh khangnote’n hithu thuktak in, ngaihsun bek hilo, lungsim tawng ah naubang paai aa, a kalsuannak uh leh, Zomi leh Zogam mailam limci ding in, ih ki muang hi. Ka gim, ka tawlna, ka thuakna, a tawpna ah ka nunntaakna a bei leh zong, ka iit ka ngaih ka mipih leh ka u leh nau, ka khua leh tui’ mailam ding hi-ta hen, ih cih takpi leh, innkuan lungsim leh unau lungsim neihloh a phamawh hi.

Ka khua leh ka awsuah, ka mimal angsung cih ciangbek hilo-in, minam khat gamkhat in, dinnopna lungsim ih paai peelmawh kuul hi. Tua hi kei leh a beisa bang in, a hingtang in hong kinawmvalh toto lai ding hi. Thei gige napi, a kipeekkhia zolo a ki ommah bang in, a theihloh kaal un zong, a kinawmvalh zong a om ding hi. Kawlgam vaaigam sungbek hilo, tuipi gaalkaai te zong siitlo-in, hong ki nawmvalhvalh ta hi. Tutung zong, Kawlgamhusa thaampi in, bang ai tawh hong khim zeel tam? Pilvang in hak kelkal dihni, guai aw. Hawmtham cinglo lua hihang!

A beisa ah, ih gualtung-tuanna, guallelhna leh khasiatna tuamtuam te, cillum tawh valh zolo in, unau innkuan ki thukkik nopna tawh, kei/ko hun bei kha leh, kei/ko hun hong tung teh, cih lungsimniam tawphah tawh a kalsuan ih omlai leh manlang tak in, khawlhuaita hi. Zomi Zosuan te in, lungsim piicing pua in, khut kilet hun hi. Na awsuah a hihkei leh minamke na kisakna, na kepnop takpi leh Tuunnu Zogam thak zah aa, a dang minamdang te-in hong keppih zolo ding cih phawk ni. Minam dang te’ muanzawknopna sal lungsim na neihkhak leh manlang in paaikhia inla, lungheilo-in, a suakta Zogam innpi ah hong ciah mengmeng in. Na tunding kaal hong kingak lah hi.

Bulkip phalo diak ih hiam? Ih nopsak laitak ulehnau phawk meello, kuamah a thusimzo nawn pha meello, lungsim van ah a kikhai hang-in, ih hatsat hun ah, kiphawk, kingai phadeuh aa, a kidelh tangtang, a ki pumkhat phadiak minam kihi citciat hi. A beisa kum70 sung hatsatna te’n kipum khatna sung ah hong tunpih naikei aa, Zogam laakkikna ding tutung Kawlgaalkapte’n migilo hongsepsak ih cihzawh naikeilai leh bel Pasian in, minam khat kampau kitelkhat in, hong piansakna a sang zolo te ih hi kha maiding uh hi.

Tulaitak Kawlgamhuam Zogam lakkik na ding hunhoih pen a hihi. A hang in, ih gaal kibang in a kidokhop laitak hi aa, nidang sang-in, lam-et huai zawpek hi. Gualzawhna-ni hong tunteh peengnawng lo-in, thaman ih laaktheih pah kei leh, Kawlte thamlo in, ih veng Pawite mahmah inzong a daai sung uh ah, hong pumhen nuam kik zeel ding uh hi. Sial ektam bek leh mimolhtum bek sii-in, district na ngawn zong a ngah zolo, zato gina khatzong a neilo niapnuap cihbang kua mah ih ut nawn kei hi.

Tutung Kawlgam vai ah, NUG tawh ih kipawlna pen Kawlte a haksat hun un, ih kipawlpih, a vialpi thumna hita ding a hihi. A masa pen British Empire pan a kipaikhiat pihna, a nihna ah Insein gaal a kici, Zangkong (Rangoon) Kayin khutsung tungding a ki hutkhiatna a hihi. NLD te’ in, a minpua kumpi a sepma unzong, ZNC minnuai ah Pu Chin Sian Thang makaai in, ASSK pawlpih in, gaalkap te a kinawkpihna zong ciaptehhuai ih taangthu a hihi. Tuhun in zong, tua aa Kawlgaalkap te hong bei leh Federal ngahding lam-etna leh ngimna tawh a kipawlpih ki hi gige hi. Thautawi leh mipi makaai khat ciat-in, tua lungsimtawng neih tinten ding ih ki lam-en hi. Hih Kawlgaalkapte hong bei photphot leh cihciangbek a hihleh bel, gimtaak taktak nailothei ding a hihi.

Tulai Kawlgaalkap te hong bei leh, bangdan Kawlgaalkap leh Kawlkumpi hong omthei ding aa, a beisa hong kikhemna te a omkik lohna ding bangcilam tawh maapang leh kigin kholh ding? cih, national, political goal khat nei ding ih ki lam en hi. “Khaikha a gui ah gah, sakhi a piisan a nosan” cih ih paunak phawk kawm ni maw. Ih min nangawn tawh a gina-in, hong samnuam ngeilo khat, khamhtungmi te mawlthei hong cici, sawnsawn khat zong, “lungsim, pumpi , a bul a baal in, ki pumpiak khiat zeel zong”? ngaihsun phatphat huai hi.

မြေမြို၍ လူမျိုးမပြုတ်၊ လူမြိုမှ လူမြိုပြုတ်မည်

Ka kumtawm lai nikhat, Tedim immigration zum ka pai leh, a tung aa Kawllai kisuang ka mu hi.

Mikaang lai in bel, “The Earth will not swallow a race to extinction, but another [race] will” ci uh aa, laimal kamletkhiat hileeng “Lei vuknelh in kimanglo aa, mi nawmvalh in minam ki mang ding” cih a hihi. A beisa kum20 kiimpawl in, Thalmual khua kicim aa, a khua beilo bek hilo-in, Thalmual awkaih zong beituan hetlo hi. A hizong, Zokam pau in, Zomin nei tiikteek nangawn zong, Zogam Zomi iitna a neizo nawnlo ki om thei mawk hi. Pawlkhat te leuleu, mipihte midang te’n a tuatcil ding uh thei gige na pi, phamawh a salo zong omzeel kawikawi hi.

Ih nuntaakna ah, thu leh la, kammal kiciing khat, laksiam leeng in, pilna leh nungtaakna tampi hong guanthei hi. A tung aa kammal zong, hong deihsaklo, hong simmawh, hong paampaih ih cihcih, Kawlte kammal ciinding hoih khat a na hi gige hi.

Hih laimal kamuhcil lai-in, Kawllai simthei ciauciu bek ka hih ban-ah, a gamla pen katunna zong, Kawlpi lansong (Junction) cihbang ciang hi aa, RTC veeng ka nuno te omna a khanglamsiah ah a giak ngeilo ka hih hang hiam? A khiatna ngaihsut ding inzong ka nei ngeikei hi.

Tuhunhun ciang bel, a khiatna kigengen kulnawn in ka um kei hi. Kawlte suahtaakna ah ih kibeelpawl zawh Zomi tampi a hingtang in, hong kinawmvalh khinzo aa, a kinawmvalh nailo pawlkhat zong , guulpi in a ai tawh a khim bang in, gulpi neekding ngak in, a mai ah a lamlam tampi mah ki omlai hi. Christian a kici ten, a piangsakpa geelna tawh a piansak minam sang zolo-in, pumkhat in kigawm zolo uh a hi tam? Zomi unau khat takpi, vot leh vot, sat leh sat khop ding sang-in, namdangte khimhna nuai ah kalsuan in, khutbaai khebaai a ki om ban ah, mual hong liamsansa zong ki omta hi. Ka piilehpu, ka ciin ka tuai aw e, ci-in khasia in, lungngaih luankhii nuulding lo-ngal tampi genbeh theih a om nawn kei hi.

ASSK na ngawn in zong, bangzahtak hatsatna piata leh a pa patsa Kawlgaalkap kipawlna pen innkuan khat bang in, hung tentan hilo hiam?

Israel minam thak a kici, Zomi, Zosuan te lung kihual in, gaaltaai kulnawnlo, gaal-omlo in, lungnuamtak a teenna uh tuagam-nuam ka galmuh khol aa, ka ciah ding kaal, ka ngaklahta hi. Nantal’suan