A Haksa Theithei Nget Ding Hizaw

A Haksa Theithei Nget Ding Hizaw

2004 kum in Lamka ah Pu Gin Pian Khup’ hong thugen ka mangngilh thei kei hi. Amah tua hunlai in ZRO ah aseplai ahi hi. “Beh te’n indepence army acih zawzen uh pen tuhun teh independence kingahzo nawn mawk ding a hiam” ci’n kadot ciang a hong dawnna pen hi ka mangngilh theih loh pen. Ama’ hong dawnna ah:

“Kidek lai kulding aih ciang a tua tawh angaihsut kholh uh hi’n teh” (Polical bargain ding ngaihsut kholhna) ci hi. – Nikhat ni teh kiho ong kul veve ding aih ciang a tua ciang a bangzah ciang khiamzo ding cih ngaihsut kholh kul hi ci hi.

Tulaitak a kawlgam buaina zong alang leh alang pan akivatmai sawm tuak hiphot a, Khat in alang Khat avatmai zawh leh bel thukhat hi’n cin, akivatmai zo zawsang a om kei mawk leh kiho loh hong phamawh ding a, tuatak teh alang leh alang in akhiap tuak uh kul veve ding hi.

Hihte pen mihingte’ zia, nainganzi paizia ngeina ahi hi. Ih Thulu Ah Ciahkik Leng: “Ahaksa Theithei Nget Ding” ahi hi. Elijah in Elisha’ kiang ah, ““A haksa na khat nong ngen hi;….” (Kumpite Nihna 2:10) cingeu zen hi.

Elisha in bang ngen hiam? Pasian in Elijah ahingtang in van ah lato ding cih thei ahih man in anung zuih cihtak in zui hi. Atawpna teh Elijah in zong “Bang deih na hiam ?” ci hi. Tua ciang in Elisha in “Kong thuum hi, na kha tanh nih hong luahsak in,” cingeu hi.

Vaisah mahmah hi. “Nang zahnih in Pasian’ sathau nilhna lunggulh ing”, “Nang sang azahnih in Pasian in hong zang zawlai leh ut ing” cihna himawk hi. Elijah in zong:

“A haksa na khat nong ngen hi; ahi zongin, nangma kiang panin kei hong kilak lai takin kei nong muh leh nang adingin tua hong piang ding hi; ahih hangin kei nong muh kei leh tua bangin hong piang lo ding hi,” ci hi.

Elisha in Elijah akilaktoh laitak mukha ahih man in anget ngah hiau hi. Bang cih leng ahaksa Theithei ngen in ngah thei ding ih hiam ?

Atom in “Cihtakna” ahi hi akisampi pen. Elijah in Elisha kiang ah thum vei vilvel “Hongzui nawn Ken” Cici taleh Elisha in zui teeiteei hi.

Kamsang tampite in zong “Bang haina in na siapa’ Nung zuizui na hiam: amah lengto tading hi” Cici tale uh Elisha lungkia lo in zui teeiteei hi.

Atawpna teh Pasian omkhong thei nawnlo in “Bang deih na hiam?” cihiau hi. Hallelujah! Elisha in zong “Na khatanh nih Hong luahsak in” cisuk pah leu lel hi. Tua tak teh laivuanpi (final exam) vuan khapah hi. Tua pen:

“… nangma kiang panin kei hong kilak lai takin kei nong muh leh nang adingin tua hong piang ding hi; ahih hangin kei nong muh kei leh tua bangin hong piang lo ding hi” cih ahi hi.

Atawp dong na cihtak leh na ngah ding hi cihna hi a, Pasian’ deihna a om leh nangah ding hi cihna zong ahi hi. Elisha in athunget ngah hiau hi.

Ute naute tuni in Pasian ih muanna bang ciang hiam cih ngaihsut phat huai kasa hi. Thu ih nget teh apiangthei ding a ih upte bek mah angen ih himai hiam kaci hi.

Nainganzi Vai ah bel apiangthei dingte bek mah Nget ding hi a, Pasian’ tungah thu ih nget ciang in ahaksa theithei, piang ding a a-uphuailo theithei nget ding hilo ahi hiam kaci hi. Cihtakna tawh bel akikop kul ve maw.

Pasian in Moses te Abraham te Elisha te ei sang in itzaw tuan in ka umkei hi. Amaute’ tungah apiaktheih thuphate ei’ tungah zong hong piathei mahmah in ka um hi. Atapa khatbek apiak dong a a-it lak ah ei zong kihel kha in ka um mahmah hi.

A Haksa Theithei Nget Zawk Ding ahi hi. Abaih lua khawng, ei’ septheih gegu ding khawng va ngetnget pen Pasian neubawlna nam khat ahi hi.

Pasian in seplah bawllah nei hetlo hi. Atapa tawh hong leisa ih hih man in kisuanglo tak in nget phiauphiau ding ahi hi. Ih muanna Lian tektek leh amah lungdam tektek Lai ding hi. A Haksa Theithei Nget Ding Hizaw!!! Amen!!! Mung Laan Thang (Tawmvei, Yangon)