A (1) veina GZA Makaite Khawmpi Report #1

A (1) veina GZA Makaite Khawmpi Report #1

Ih gelna te ih Pasian in hong thukumpih aa, a khatvei na GZA Makaite Khawmpi (December 14-18, 2011) nuamtak hong zawhpih a hih man in ih biak pa Pasian tungah lungdam thu ihko masa hi.

Laisiangtho sung ah “A hun a cin ciang in” cih kammal muntampi ah ih mu hi. Leitung khuahun te hong kihei toto in, Cope Centennial Jubilee Celebration (November 2010) khawmpi sung in Global Zomi Alliance (GZA) hong kipan khia hi. Tutung in makaite khawmpi a khat veina nuamtak ihnei thei khinta aa, hong pai makai khempeuh leh mipi te kilawp mahmah hi. “A nungta Pasian bulphuh in Zomite ki pumkhat aa a bucing khantohna neihding” ki lunggulh mahmah ta cih teltak in kimu theihi. Khawmpi sungah, tu aa kipan na sepkhiat ding ki thupi sak hi. Sep khiat pah ding leh, mailam aa sepding gelna tampi kinei aa, tua te Report #2 ah kong pulak ding hi.

GZA Khawmpi tawh kisai mipi tung aa zaksak na khen 2 khen 3 suah in kong taangko ding hi. Tutung aa pen Report #1 a hihi.

1). December 13, 2011 ni zintun ni hi aa, khawmpi hong kah makai te a vekpi phial mah in hunlap tak in hong kitung hi.

2). GZA Central Committee 6 te sungpan in Dr. Pau Khan En, Bishop Dr. Felix Lian Khen Thang, Dr. Do Suan Mung leh Dr. Chin Do Kham te hunlap tak in khawmpi bupsung kihel thei uh aa, nasepna leh innkuan vai tuamtuam te hangin Dr. Gin Khan Khual leh Dr. Ngul Khan Pau (JM Paupu) te hong kihel theilo uh hi.

3). Khawmpi kahding aa a kisam Standing Committee 15 sung aa member te leh a tuam aa a kisam Zomi sungpan ih muan ihsuan makai tuamtuam te a kigawm in 345 khawmpi ah hong kah thei uh aa, hongpai makai khempeuh in zong Zomite ki pumkhat aa a bucing khantoh nading lunggulh na leh veina takpi tawh hong kihel ciat uh a hih man in khawmpi hunsung khempeuh lawptak in thu kikupna ki nei ziahziah hi. India lam Zomi te sungpan Rev. Dr. Luai Chin Thang, Sia Dal Sian Pau (Ph.D. cand.) leh Rev. Go Khan Pau te hong kihel thei uh hi. Zomi leh Zogam veina tawh Singapore pan zong mi 6 hong kihel thei uh hi.

4). Local (Innteek) Hosting Committee kinei aa, a maute lawptak aa ma hongpan na hang un ih khawmpi a lawhcing ih hihi. Local Hosting Committee ah makai hongsep sak Rev. Go Za Nang leh committee member khempeuh tungah ih lungdam mahmah hi.

5). Lasa siam Stephen Vocal Band te, Fishers Quartet te, Bethel Bible College (AG) numei quartet te, Zomi Idol 2011 aa a khatna pan a thum nadong a ngah lasa siam te, Cing San, Lengtong Pauno, Lengtong Kam Khen, T.S. Khai, Cingpi, San Lun, ZOMUS group, Siamsin khangno te, lapawl tuamtuam te leh music tumsiam Farcon Band leh Ever Smile Band te ban ah lasiam leh lamsiam mimal leh group tuamtuam te in ih khawmpi hong etlawm leh nopci sak mahmah uh hi.

6). Khawmpi sung khempeuh ah Recording Secretary 3 (Rev. Cin Lian Sum, Siama Ciin Khan Cing leh Sia Gin Khan Suan) kiseh aa a mauteng in a kigen thute khempeuh limtak in laisung ah hong ciaptehsak uh hi.

7). Khawmpi sung khempeuh sunhun leh nitak hun a vekpi in Video kila aa, a phual mah ah video te kilei thei pah hi.

8). Pulpit lam a etlawm theithei dingin siama Ciang leh a lawmte ih nasia tak in hong zepsak uh aa, ih khawmpi hong thupi suahsak tuam mahmah hi.

9). Sunsung makaite meeting khempeuh Agape AG pawlpi ten innteek sem in biak inn hongzangsak uh aa, pawlpi mite in zin hongdo, an hong huansak, niangtui hong bawlsak in, khualpan zin pawl khat zong zin hong tungsak lai uh a hih man in, lungdam na lian mahmah hi.

10). Khawmpi sung nitak sim aa mipi tawh biakpiak na, lasakna leh thugen na khempeuh ZBCM huangsung ah kinei aa, a mun tangzai in a zat nuam mahmah hi. ZBCM tungah lungdam na lian hi.

11). ZYA te in Information leh transportation lam ah nasia tak in ma hongpang uh hi. Siamsin te in zinmuak na lam ah ma hongpang uh hi. Veng hausa te leh papi pawl khat te in Security hong sepsak uh aa, ah uniform uh tawh hong etlawm mahmah uh hi. Zosiam te in khawmpi sung khempeuh aa damlo te aa ding in zatui zaha leh mimal tawh sun leh zan in ma hongpang uh hi.

12). Chin Taungtan Hotel (Ko Ko Thang) ten Central Committee member teng FREE in zin hong tungsak uh hi. Sun leh zan in mei kingah, kisil nading tuisa kingah, room khempeuh ah wrireless internet kingah aa, zintun nuam kisa in ki lungdam mahmah hi.

13). Taung Zalat tuisiang bawlna company pan in, khawmpi sung tuisiang free in hongpia uh aa ki lungdam mahmah hi.

14). Nitak sim in mipi tawh lawptak in biakpiak kikhopna ki neiden aa, a tawpna nitak bang a tawmpen mipi tulsawm (10,000) sang tawmzaw loding hi ci in ki ciamteh hi.

15). Khawmpi nuamtak neih theih nading aa kumpi lampan phalna hong ngahsak sia Gin Khan Pau leh, kumpi lamtawh kisai vai khempeuh ah ma hongpang ZRDP makai pa Vum Za Nang tungah lungdam ihko hi.

16). Khawmpi sunhun sung ah Kalay district aa police a lianpen pa zong hongpai aa khamtheih guihtheih a kizuak loh a kizat loh nading in pastor te tawh na semkhawm ding hihang ci in hanthot na leh zotna thugen na hong nei hi.

17). Khawmpi Program te attachment file tawh hong khak ing. Download le cin ki en thei hi. Khawmpi photo (man) pawl khat zong hong khak ing.

Mipi zakding aa kilawm thute a banban in Report #2 leh #3 sungah kong pulak toto ding hi. Hih lai a simkha mimal khempeuh tungah ih Topa kiangpan hongpai thupha namkim hongtung tahen. GZA Central Committee tangin, Dr. Chin Do Kham, General Secretary