2008 Gambup Thukhunpi leh Zomi State Galetna ~ Bob Tuangpi

2008 Gambup Thukhunpi leh Zomi State Galetna ~ Bob Tuangpi

2008 gambup thukhunpi akilaih zawh masiah tua siksanin kikalsuan ding ahih manin, tua sungah Zomi mailam minamvai leh gam leitang koicih gamkeekin panla lehang muibunzo ding cih 2008 gambup thukhunpi khenpi (53) na sung ka etcianna kong luikhia nuam hi.

2008 gambup thukhunpi khenpi (53) -(a) na ah gambup ah om gamkee (State & Region) tuamtuamte’ leitangvai leh gamgi puahphat ding thu a om leh tua gamkee sungah teeng khuapi huam (Township/သက္ဆိုင္ရာျမိဳ႕နယ္) mipi taangpi taangta’ deihna lakna (Referendum) neih masak ding kisam hi.

2008 Thukhunpi 53- (b) na ah tua bangin gamkee (State & Region) khat sung ah om khuapi huam (Township) leitang ah ateeng mipi deihna akilaak ciangin tua khuapi huam sungah om, meetang (Vote) khiathei (kum 18 tungsiah cihna) mipi deihna alangval ( atawm pen 51% cihna) in gamkee khat ii gamgi puahphat dingvai athukim kei leh kuamah in kheltheilo ding hi.

2008 Thukhunpi 53-(c) na ah tua bangin akisaikha gamkee khat ii khuapi huam (Gtna : Chin State sungah om Township-9 teng lakah Tonzang Township leitang huam gamgi puah nang akisap leh) sung mipi meetang khiathei alangval in gamgi puahphat ding mipi deihna laakna (Referendum) ah athukim uh leh tua gamkee innpi deihna (Gtna : Chin State Parliament/Hluttaw) khensakna laakkul hamtang ding hi.

2008 Thukhunpi 53-(d)na ah tua bang akisaikha gamkee Innpi (State & Region Hluttaw) in athukim khensatna vuah gamkee Innpi taangmi (MPs) vekpi lakah sehli suah sehthumval (75 +%?) gamgi puahphat ding athukim uh leh gambup Innpi (Union parliament) in thukimpih phot ding (Vote khaikullo) aa, tua khit teh gambup makaipi ((President of The Republic of The Union of Myanmar) in kipsakna nei ding hi.

2008 Thukhunpi 53-(e)na ah gambup ah om gamkee khat ii gamgi puahphat dingvai tua gamkee (State &Region) ah om khuapi huam (Township) sungah ateengmipi atamzaw in gamgi puahphat ding thukimna pi’n gamkee Innpi (State &Region Hluttaw) in athukimpih kei leh gambup Innpi (Pyitaungsu Hluttaw/Union Parliament) ngaihsutna leh thukimpihna laakkul ding hi.

2008 Thukhunpi 53-(f)na ah gambup Innpi (Union Parliament) khensatna akilaak ciang’n gambup Innpi taangmi (MPs) sehlisuah sehthumval (75+%?) in athukimpih (Vote khaikul ding) leh gambup makaipi (President of The Republic of The Union of Myanmar) in gamkee khat ii gamgi puahphat ding akisam bangin sem ding hi, ci-in sepzia leh kivaipuakzia limtak gencian hi.

2014 Myanmar Census leh Mailam Zomi State Ding Galetna ( Perspective on 2014 Myanmar Census and Developing Zomi State)

Azenzenin, tulaitak NLD kumpi (2015-2020-?) in tulaitak 2008 gambup thukhunpi puahzo henla akitangkona ah gambup minam tuamtuamte’ santheih kibelpawlna diktak gambup thukhunpi (Democratic Federal Union Constitution) 2020 ma-in kilawhcing zenzen leh gamkee thak ngahtheihna (Organizing New State Act) hong om ding ahih manin, tulaitak mualmi thahat Wa, Ta’ang Palaung, Pa-Oh te in State thak hong ngah pelmawh ding uhhi (Source kician khat pan ka zakna). I mualmi lawmte in khangkhat khangnih bang anavawh uh khaicii a at ding uh hita hi.

Tua ahih leh en bang cih leeng Zomi State ngahzo ding ihiam? Athupi mahmah bulpi khat ah 2014 gambup milip kisimna ah tulaitak Zomi deih teng (Tedim & Tonzang Townships gambup leh leitungbup ah om teng/2014 Census movement ah 914 Zomi agelhte) in 2014 Census hong kitangko teh Chin nuai (Under Chin Category) ah hilo-in Zomi teng ((Tedim, Zo, Dim, Saizang, Teizang, Dim, Vaphei, Losau etc. . .) teng Chin tawh kiliangko kimin Chin State ah minampi Chin leh Zomi cih tawh itaizawh ding hong thupi mahmah ding hi.

Mailam ah Chin pen Zomi ah ilaihnop leh atung aa 2008 gambup thukhunpi khenpi (53)na khenneu -A-B-C-D-E-F lampi zuihkul ding aa tua bel ngaihsutna vet omlo hi. Kalay-Kabaw ngahkik ding cih zong atung aa thukhunte siiksanin en leng piangthei peuhmahlo ding hi.

Tua ahih manin, mualmi sanggam dangte bangin State thak ideih leh bel aciang aciangah thatang (hard power) athu (soft power/national movement and party politics) mahmah ah ithahat kul ding a, lampi khungsiam leh lamzuihsiam (policy maker &strategist) ban ah mihau mipil (academicians, lawyer, business man) tampi omin tua teng in minam nasepna hong tawsawn ding uh kisamlai ding hi.

Tua teng ban ah athupi pen in igengensa bangin 2014 census ah ituam dinzawh ding thupi mahmah ding hi. Thuging pawlkhat genna bangin Chin nuai ah (Zomi, Laimi, Khumi, Cho, Laizo) cihdan hong suah leh Chin pen kipaizohak mahmah lai mawk ding hi. Ahang in gamkhangto sate in gambup milip simna pen kum (10) simin khatveita bang neiden uhhi. Ei gam ah bel kum (30) teh khatvei khong kisim bek’ahih manin, tua sungin thu tampi tak kituantual mahmah ding cihna hizaw hi.

More: Veto Power Leitawina thu ~ Bob Tuangpi

Zomi te pen Myanmar gam aphutkhia minam hihang a, Myanmar gamvai tangthu ah akhangkhangin tangthu hoih aneite ihih manin hiciang dinmun bek ah i om lawmlawm det ding pen Pasian in ei’ading hong koihsaksa nangawn amutheilo, alatheilo ihih khak ding dahhuai leh khasiat huai kasa hi. Bangbang ahizongin, Zomi leh Zogam leitang ngahkik nading kuamah in hong hehpihna tawh hong mawkpiak hetlo ding cih ikitheisak hi. Agelh: Bob Tuangpi (812018)