Zomi te leh Israel mite aki lam dan’dan pawlkhat

Zomi te leh Israel mite aki lam dan’dan pawlkhat

Tulai mi pawlkhat te’n Zomite pen Israel mite I hi hi, ci-in a gengen a gelhgelh Mission nasem pawlkhat I om hi. Biblical view tawh enleng Lai Siangtho a umte ading in mikhempeuh minam khat hikhin hi. Tua minam khat sungah Zomite mun min leh mi min pen beh le phung minin I zat mah bangin Israel minamte sungah zong tuasuan tua beh cih bangdan a tuamtuam na om hi. Ahi zongin tulai Zomite tawh I ki bat hetloh na pawlkhat om mawk hi.

1. Israel mite khat minamdangte amat uhteh, a bawlsiat uhteh ami nambup un nasa uha, Israel mi ni le thum leh a galmatte uh aza, atul asim khek ngam uh hi. Zomite I mipihte ki bawlsia, kithat in I tenna gam leitang Kawl kumpi leh Indian kumpi te’n hong laksak hong ukcipta leh apil asiam, ahau a tamzaw in awlmawh vetlo uh hi. Vokpi aki thahnading a gei ah temta ki tattatta leh a ih mut dipdep mah tawh kibang uh hi.

2. Israel mite vantung mi in a pupi uh Jacob akhel mekna kom ahih Israel mite peuhmah akhkel uh kom hi. Zomite khelkom cih bang ki tamgenlo hi.

3. Zomite asuah uhteh naungek peuhmah a tawl or aphei aci tung munkhat peuh a eng tawh ciaptehna(bulemark) omin Israel mite tua bang aom lam kigenlo hi.

4. Israel mite’n a saltanna uh pan leh a tuntunna mun le gam panin agam uading thungenin sum le pai tawh ahih theihna zahzah uh itsitlo in pang uh hi. Zomite a tamzaw in a gam a lei akhua atui uading awlmawh vetlo uh hi.

5. Israel mite makai peuhmah thumanding cihtak ding hanciam uha, Zomi makaite a tamzaw sum leh a tuamtuam ah thanem uh hi.

6. Israel mite’n a tansa uh agam angah kik theihna dingun aomna tek panun pangkhawm ngeingai in sisan naisan luangin hanciam uha, ngah kik uh hi. Zomi te’ a tenna uh leitang leh a inntual zanguah minam dangte’ that in busa in omta leh a tamzaw in awlmawh vetlo uh hi.

7. Israel mite Zomite mah bangin beh le phung tuamtuam in amin uh kikhenta leh a lungsim uh kikhenlo in ki huh ki panpih diamdiam uh hi. Zomite a tamzaw in abeh aphung bek thupisak in a minam uh awlmawhlo in nusiat bawl uh hi.

8. Israel mite in a tuntunna mun le gam panin a Pasian uh thupisak uha, Zomite in a tuntunna mun le gamte pasian thupi a sazaw pawlkhat om hi.

9. Israel mite in a ngeina uh leh a Pawite uh thupisak in khatkia om le uh zong Paisan Pawi bang bawl tangtang uh hi. Zomite pawlkhat in a Ngeina uh zumpih in a ngeina Pawite uh bawl ding nangawn ki kunkun, ki zolzol kullai uh hi.

10. Israel mite sungah numeite kiniam khiat uha, a pasalte uh thumang mahmah uh hi. Zomite sungah pasal a tamzaw in a zite thu uh mang uha, a innkuansung, a pawlpisung uh leh a ki pawlna sunguh a zite uh ngaihsut piak tawh kalsuanpih uh ahih manin buaina tuamtuam omin khangto theilo uh hi. Israel mite a numeite uh sangin a pasalte uh pilzaw ahi diam? Zomite pasalte sangin numeite uh pilzaw ahi diam? Hih pen ngaihsut taksim ahih manin nangma khensat ding cimai ni.

A mah le amah aki neusek leh aki neumuh minam peuhmah khangto ngeilo ding uha, Topa Zeisu in ahih na bangbang tawh ka nung hong zuite keima nungzui suakding hi, acih mah bangin ahih na bangbang tawh Pasian leh minam leh gam ading a itsitlo, a maizumlo minamte khangto ding uh hi. Hun neih leh mailam ah aban zomlai ni.

Khaibawi