Tutung kiteelna ah Zomi Party pomkimzo samlo dingmaw ZOMI

Tutung kiteelna ah Zomi Party pomkimzo samlo dingmaw ZOMI

Dear Zomi U leh Nau; Party khatin Zomi minam vai khempeuh mikim deih bang cingtak in hong sepsakzo, hong vaanzo lo mah dinga, i panpih Party khat makai, MP khat peuh tawh i deihdan kituaklohna om hamtang thei mah dinghi.

Ahi zong atawpna ah Mee piak hun teh party khat mah i pomkim ciat ding thupi ding lamen ingh. Party politics ah party zui-in nasepna hizaw in mu ingh. Election nungah i meepiak party gualzawhna, guallelhna zui-in huzapna mipi tungah hong nei hamtang dinghi.

Party nih bek kidem (USA) danin multi-party kidemna ( Kawlgam) ah party neu khat i huzap zawhna tamlo kha mah dinga, ahi zong Zomi ten i bulphuhpi khat ahi Zomi movement cih bangte ah i panpih party zui-in kilamdanna lianpi om hamtang dinghi ( Zomi vs Chin minpua party).

Mimal khatbek nagawn ei leh ei zong i kithutuak zawh loh hun om thei, i hihnopdan kilaih pahpah thei, nupa khopkhat zong kithuthuakloh hun om mahmah a, kithuthuakloh sim ki-mapah, kikhenpah lo hi hang. Abeisa kum tampi laipan kipan Zomi a ding nasem, i kalsuanpih Zomi Party ma-zo, khen-zo taktak ding i hi hiam?

NLD mee i piakloh hang hong telsiam mahmah ding hi. Hong telsiam khinlua kisa, Pu Thang (Pu Chin Sian Thang) meekuangluina ding mun ah hong demlo ding hikhin hi. Hiciang dinmun tunkhit teh telzo kei mawk leng NLD in Zomite ngaihsutna thuklo lua hongsak ding banah, Politics thusim kikupna ah thu theithei lo Zomite ci-in hong muang gam nawnlo kha ding hi.

2010 Kiteelna ah Zomi Party kidemna ah akihel a om kei a, USDP meepia i tam a, Chin State Parliament ah MP tam i om man in Speaker panmun bang i ngah zo hi. Chin Party zong a pia tawm i om hi. Hamphatna a en i hih leh bang hamphatna gen ding ngah i hi hiam? District ngah ding a kilawm dinmun nagawn ah ei a ding hong pang kei uh a, i ngah kei hi. Myodaw (Capital), District cihte a min bek ahi kei a, hamphatna tampi in a zui pah cih i thei hi. Tua hun in na i sakna te, tu in manggilh pah lawmlawm leng, mailam ah midangten khembaih hongsa lua a, hong enneu mahmah kha ding hi. Tu hun ah Mee deih man in Zomi 1, 2, 3 a cici zong in, a gial kidawksa mu thei sam lo ding i hi hiam?

Kawlten NLD paktakimlo uh hi, ahi zong Suu Kyi hang tawh NLD mah atamzaw in pomzawh tuak uh hi. Zomiten abeisa kum tampitak Zomi a ding mapang Pu Thang ( Pu Chin Sian Thang) hang tawh Zomi Party mah pomkhawm zolo ding i hi hiam? Pu Thang hong dampih lai, Zomi Party amakaih zawh hun lai in, Zomi Party pomkhawmzo bek samlo ding i hi hiam? 1990 Kiteelna kipsakna ki ngahzolo a, tutung a masa penpen ding kiteelna ah Zomi hi ing a cici Zomite in Zomi Party khat bek i neih sunsun pomkhawm zo kei leng khangsawn Zomite in hong bang cih muh tam, i tangthu i –at ei leh ei in zong i simgam ding hiam?

Tutung buang Zomi Party pomkim ciat ni! Deih abat kei uh leh kiteelkik ah pom nawn kei pah ni. Khualhun hong hoih suak nak leh, Kiteelna hong om toto lel ding hi. Bang hang in tutung akipatna ding buangah Zomi Party ( ZCD)pom zo lo ding i hi hiam Zomi U leh Nau aw… Mimal muhna pan, Pa Do Khan Khup