Zomi mailam kalsuanna ah theihhuai ~ Pau Khat Suan

Zomi mailam kalsuanna ah theihhuai ~ Pau Khat Suan

2015 kitel hunlai in Chin State buppi ah State Parliament MP tutna 24 lak ah NLD 12, Galkap 6, USDP 4 leh ZCD 2 ahi hi. USDP in mun 4 ana zawhkhak pen ZCD kamphatna hi. Azenzen in USDP in mun 3 bek zo a, NLD mun khat bekbek na kibehlap hileh Zomite’ dinmun tampi kilaih ding hi. Khat pan, tuabang mah in Tonzang a NLD mun ZCD in ana ngah hileh ZCD thuneihna lian mahmah ding hi.

Tua hileh…. ZCD in a pawlpihna lamlam ( NLD vs USDP + Galkap ) majority hipah ding a, State parliament ah NLD ahi a , USDP + Galkap ahi zong in ZCD kihta mahmah ding hi.

Ahih hang, tu-a USDP zawhna mun khatpeuh ah CNLD, CPP cihte khat in a na zokha hizen leh NLD + CNLD or CPP = 13 ong hithei hileh ZCD bel tu a i omna tawh kibang hetlo ding hang a, UPC ( 2nd Panglong ) dong ah bangmah a kiman lo ding hiziau mawk ding hi.

Zomite tu a i dinmun, panmun cihte ah i omna Minam minpua party tawh i dinman a hihna leh a hihlohna i ngaihsut kak kawikawi theih ding kisam mahmah hi.

Zomi Minam vai politics a uuk leh field a a kimawl, a sem nuam taktakte bek hilo in, i mipi mahmah in Kumpi gam khat ki-ukna leh tua ki-ukna nuai ah i gam i minam in hamphatna leh kikhangkhanna i muhna ding in.. “legislative power, Executive power, Judiciary” hih 3te ah buu i sep ding kisam ahihlam a theih ding, a tel ding kisam mahmah hi… cih kei mimal ngaihsutna ahi hi.

A diakdiak in Executive power in i zinghuan nitakhuan a kipan i nuntakna ah thuneihna lianpi ong nei a, Legislative power in minambup mailam saupi geelna ah thuneihna lianpi nei hi…. cih mipi in tel mahmah hi lehang i thu ngaihsut zia leh i kalsuan zia kilamdang mahmah khading in ka lam-en hi.

Tua hileh Executive power ah buu i septheihna ding in bang sem a, bangci bang a panlak kul a..
Legislative power ah buu i septheihna ding in bang sem a, bangci bang a panlak kul ding… cihte kikum hiathiat thei pan ding hihang. Tua ciang i gengen Zomi Movement ettheih muhtheih, lawntheih in lawhcing pan ding hi.

Mipi i kithutak theina ding, i kihual theihna ding, kipumkhat a ma i pankhop theihna ding in a kisam pen in theihna tung a kinga, a kibang ngimna leh tupna, lunggulhna ahi hi. Tuabang a lomtat theihna ding a ahuai, a-hualkhawm kimakaihna nakpitak lunggulh leh lam-en mahmah hihang. Pau Khat Suan