Zogam, Zomi, Zolai, Zo ngeina – 4

Zogam, Zomi, Zolai, Zo ngeina – 4

(Zomite Pasian Anei Athei Minam leh Ngeina Kician Neite Ihi Hi)

Leitung ah Ngeina kician anei tawm mahmah hi. Adiakin leitung khualzinna leh nekzonna hangin leitung ah minamkim kitengkhawm gawp ta a, ngeina tampi kigawmin ngeina pawlkhat kinusia a, ei ngeina ahilo pawlkhat zong ila izang hi. Gamdang tung Zomite in zong apu apa zat ngeina pawlkhat kimangngilhin pawlkhat mundang ah kizang thei nawnlo a, pawlkhat leuleu ei ngeina hita kei leh minam dangte tawh kikholhna ah izatpih om hi. Midang tawh ikipawlnop leh ei ngeina pawlkhat nusiat kulin minamdangte ngeina pawlkhat zong izatpih kul thei hi.

1. Zomite Pasian Anei Athei Minamte Ihi Hi.
Christian biakna hong tunma hunin Zomite in Ahing Pasian theiin anei minamte ihi hi. Zeisuh min izakma thamin Ahing Pasian khat om hi, Amah in lungsim hoih lua ahih manin ei Zomite aa ding siatna hong bawl ngeilo hi. Dawi leh Kau in hong bawlsia hong susia a, tua te lungkimna dingin biakkul paaikul hi ciin Dawi leh Kaute duh leh deih ding zu, sa, an, vante tawh ibia hi. Dawi leh Kau ibiak hangin thupisa leh um hilo-in kihtakna leh sihna natna zawnna pan isuahtak theihna ding lel a abia ihi hi. Damna Hauhna leh nuntakna Pasian piak ahihlam kithei napi, asusia thei Dawi leh Kau bia kei leng hong sisak nasak zawngsak hausak thei hi ciin ikihtak ilau main ibia a, nuntakna hauhna damna leh cihtheihna pen Ahing Pasian kiang panin hong pai a, amah bek biak leh paai ding hi cih itelloh man ahi hi. Ahi zongin tu-in Christian biakna – Zeisuh Khazih nungzuihna thu itheih itel ciangin iminam bupin ibia izui ta hi.

2. Zomite leh Israel Mite Bek In Ahing Pasian Thei masa uh a, Pasian Piak Ngeina Kician ineihna Kibang Hi.
Thuhilhkikna 4:7-8 sung ah Moses in Israel mite tung ah thu ahilhna ah ” I kisap hun simin kiko leng ahong dawng eite Pasian bang anei minam lian kua om ahi hiam? Eite bangin thukham leh ngeina kician anei minam lian kua om ahi hiam?” ciin Israel mite tung ah gen hi. Israel mite in Pasian neiin Pasian piak ngeina leh thukham kician mahmah nei uh a, Lai Siangtho sung ah Israel mite in thukham 613 aneihna thu imu hi. Zomite in zong Zomite zuih ding ngeina leh thukham kician inei hi. Zomite Pawi leh sagawh, nopna leh dahna ah zuhawm sahawm ngeina kician inei a, tua ingeina koi ah kimu hiam icih leh nopna dahna a kigo ding vok, bawng luang khat tung ah tanu tapa, behlehphung,ulehnau, lawmlehgual ngah leh tan ding sahawmzia sehsa ahi hi. UK leh USA in leitung kiukna thukhun Danbupi kician aneih hangin ulehnau behlehphung lawmlehgual tawh kizopna zuhawm sahawm ngeina kician neiloin amau utbangin deihsak leh tampi pia, deihsak kei leh tawmcik neucik pia hilel a, Zomite in panmun zuiin zuhawm sahawm akikhiam akikhan mawkmawk thei hetlo ngeina kician inei hi. Leitung ah Zomite ngeina banga akician ngeina anei kuamah omlo a, Zomite minam lian ihi hi cih kilang hi.

3. Zomite Pasian Anei Athei Minam Lian ihih leh I Ngeina Kician Neihna in Zeisuh Upna Hisak Ni
Kumsimin angeina bangin lungdampawi ibawl hi. December 25 ni Gumpa Zeisuh Khazih hong suak hi ciin biakinn ah lungdamna ko-in asuak Zeisuh Khazih biakna inei hi. Ahi zongin Zeisuh nei taktaklopi angeina bang ahih leh leitung ah mihamsia pen ihi dinga, Zeisuh Khazih anei ihih leh ineih Zeisuh Khazih in Zomite minam lian a hong bawlna thu itelna hangin leitung ah mihampha pen ihi ding hi. Zomite ihihmanin hampha kisak bekloin Ahing Pasian anei Zomite ihihna hangin mihampha hing acithei dingin Zomite iki deihsak hi. Zomite minam lian a hong bawl ibiak Pasian pahtawina sangpen pia-in Topa sung ah nuam asa mahmah minamte ihih leh Pasian thupha ingah paisuak bek ding hi. Zulehsa khamtheih leh sumlehpai bek ngaihsut a ineih leh leitung a mihamsia pen ihi ding hi. Zomite in Pasian hong piak ingeina hoih ahi zuhawm sahawm zia mangngilhlo-in tanau meltheih naihuai leh lawmlehgual akilawm mun ah akoih thei dingte ihihna dingin Pasian in thupha hong pia ciat ta hen. 2014 Lungdampawi thupha in innsung bangkua leh mimal tung ah hong tung ta hen.

Lang Khan Khai