ZIUSA Dahna Pulakna: Mangpha Dr. Mercy Man Khan Niang

ZIUSA Dahna Pulakna: Mangpha Dr. Mercy Man Khan Niang

Dahna Pulakna: Mangpha Dr. Mercy Man Khan Niang
Georgia State, Atlanta khuapi a teng, Dr. Zam Khan Thang’ zi, Dr. Mercy Man Khan Niang in Sept. 6, 2014 ni in, damlohna hang tawh Dekalb Medical Center zatopi panin, a leitung nuntakna hong nusiata hi. Dr. Mercy Man Khan Niang in a hong nusiat laitak in a khan kum (60) a cingkhin pan hi a, a it mahmah a pasal Dr. Zam Thang tawh Malaysia gam tawnin US gam ah ahong peemta’k zawh kum (3) cing nailo hi.

Dr. Mercy Man Khan Niang pen Zomi numei sung ah mipil masa pawl hi a, Yanon Insein khuapi a MIT sangpi ah Khamtung gam panin Laisiangtho sangkah numei masa khat ahi hi. Zonu Tongluan a phutkhia pawl ah kihel in, a tuntunna ah biakna nasep ban-ah minam a’ding nahoih tampi a sem khat ahi hi. Malaysia gam ah a om sungbek inzong Zomi-te kipawlna ZAM pawl ah kum nih sung bang kipiakhia in Makai panmun alen ngei mi thupi khat ahi hi. Zomi-te khantohna ding maban tampi a hawm zolai dingin khangno laibek thamlo, US gam ahzong maban thupi a kipan thei dingin a kilam-et mahmah laitak in, hong nusia ahih manin, hong nusia baihlua kisa a, na kisa mahmah hi.

Dr. Mercy Man Khan Niang hong nusiat manin, adah akap, a pasal Dr. Zam Thang tawh a kibangin, Zomi Innkuan USA, Executive Committee pawlzong kidah mahmah hi.

Dr. Mercy Man Khan Niang mangpha khakna leh hanmual ah khakna pen Sept. 13, 2014 (Saturday) ni in, Zomi Laizom Christian Church pawlpi vaihawmna tawh kibawl ding hi. Ama hong nusiat manin adah akap, Dr. Zam Thang a kipan, meeltheih tanaute, pawlpi mipihte, khuapih tuipihte, leh a pawlpi Zomi Laizom Christian Fellowship ahi zong, a minam min tawh khua leh tui sung ah a kipawlpih Zomi Innkuan Atlanta kipawlna ahi zong, akua mahpeuh tung ah anungta Pasian in hong hehnem in, hong thahat sakkik henla, nisim mabante azomkik zo dingin thupha hong pia tahen.

Dahna tawh;

Executive Committee
Zomi Innkuan USA

Tulsa, OK.
September 11, 2014